კატარის მუნდიალზე მაროკოს ეროვნულმა გუნდმა მსოფლიო ფეხბურთის ისტორიაში ახალი ისტორია დაწერა. მაროკო პირველი აფრიკული ქვეყანაა, რომელიც მსოფლიოს ჩემპიონატზე ნახევარფინალში ითამაშებს. გუნდმა ჯგუფში ხორვატიას, ბელგიასა და კანადას აჯობა, მერვედფინალში ესპანეთი დაამარცხა, მეოთხედფინალში კი ვარსკვლავებით დახუნძლული პორტუგალიის ნაკრები შინისაკენ მიმავალ გზას გაუყენა.
მაროკოს ნაკრების მთავარმა მწვრთნელმა ვალიდ რეგრაგიმ პორტუგალიასთან გამარჯვების შემდეგ შემდეგი კომენტარი გააკეთა:
„ესპანეთის შემდეგ ასევე მოვახერხეთ პორტუგალიის დიდებულ გუნდთან გამარჯვება. ყველაფერი გავიღეთ. რამდენიმე ფეხბურთელი ტრავმირებული გვყავს, მაგრამ ვინც ითამაშა, დაღლილობასაც აჯობა! ეს გუნდი მენტალურად ძლიერია. თამაშის წინ ბიჭებს ვუთხარი, რომ აფრიკისთვის ისტორიის დაწერა საჭირო იყო. ჩვენ ეს გავაკეთეთ და მე, ძალიან, ძალიან ვამაყობ მათით“.
ისტორიული შეხვედრის დასრულების შემდეგ მაროკოელთა გულშემატკივრებმა ევროპის რიგ ქალაქებში დიდი ზეიმი მოაწყეს. საფრანგეთის დედაქალაქ პარიზში საყვარელი გუნდის წარმატების აღნიშვნა რიგ ვანდალურ ქმედებებში გადაიზარდა და პარიზის პოლიციას ორმოცამდე „აქტიური“ მაროკოელის დაკავება მოუწია. იმავე დღეს, ოღონდ მოგვიანებით, ამ ქალაქის ქუჩებში უკვე საფრანგეთის ეროვნული გუნდის თაყვანისმცემლები გამოვიდნენ და ინგლისთან გამარჯვება მაროკოელ „ფანებზე“ არა ნაკლებად აღნიშნეს. პარიზის პოლიციას იმ ღამით „სამუშაო“ არ აკლდა. საინტერესოა რა მოხდება პარიზში ნახევარფინალური მატჩის შემდეგ, როდესაც ერთმანეთს საფრანგეთი და მაროკო დაუპირისპირდებიან.
პორტუგალიის ნაკრების მთავარმა მწვრთნელმა ფერნანდუ სანტუშმა მაროკოსთან მარცხის შემდეგ განაცხადა, რომ პორტუგალიის ამ თაობას ქვეყნისთვის ღირებული წარმატების მოტანის შანსი კიდევ ექნება.
„ჩვენთვის ეს ძალიან დიდი იმედგაცრუებაა. გუნდი საკუთარ ძალებში დარწმუნებული იყო, მაგრამ ვერ შევძელით. პირველ ტაიმში მაროკოს დაცვის გასახსნელად კრეატიულობა გვაკლდა, მეორე ტაიმში გავაუმჯობესეთ, მაგრამ ძალიან ვნერვიულობდით, გვინდოდა ბურთი საჯარიმომდე რაც შეიძლება სწრაფად მიგვეტანა. ეს თაობა ამით არ სრულდება და კიდევ ექნება შესაძლებლობა, რომ პორტუგალიური ფეხბურთისთვის რაიმე კარგი გააკეთოს. დარწმუნებული ვიყავით, რომ ფინალში გავიდოდით და გავიმარჯვებდით.
არ ვნანობ, რომ რონალდუ ძირითადში არ იყო. შვეიცარიასთან გუნდმა ძალიან კარგად ითამაშა. კრიშტიანუ უდიდესი ფეხბურთელია და ის შემოვიდა, როცა მივხვდით, რომ ეს აუცილებელი იყო. არ ვნანობ ამ გადაწყვეტილებას.
ახლა ჩემს მომავალზე საუბრის დრო არაა. ლისაბონში დავბრუნდებით და შევხვდები პრეზიდენტს, რომელთანაც განვიხილავ, რა არის უკეთესი პორტუგალიის ნაკრებისთვის“.
პორტუგალიის ნაკრების ნახევარმცველმა ბრუნო ფერნანდეშმა მაროკოს ნაკრებთან მატჩის შემდეგ არგენტინელი მსაჯები გააკრიტიკა.
„უცნაურია, რომ შეჯიბრში პორტუგალიელი მსაჯები არ არიან, მაგრამ არიან არგენტინელები, როცა მათი ეროვნული ნაკრები აგრძელებს ტურნირში მონაწილეობას. ჩვენი მსაჯები მსაჯობენ ჩემპიონთა ლიგის მატჩებს და აქვთ საკმარისი დონე, მათი მსაჯები კი არ არიან მიჩვეულები ამ დონის მატჩებს. ისინი არ ერგებიან ტემპს. პირველ ტაიმში აშკარა პენალტი იყო. ცხოვრებაში არასდროს მივცემ თავს დაცემის უფლებას, როცა მეკარის წინ მარტო ვარ“.
ანალოგიური განცხადება გააკეთა პორტუგალიის ნაკრების მცველმა პეპემაც:
„მაროკოს გაუმართლა გოლის მომენტში. ჩემი თანაგუნდელებით ვამაყობ, მატჩის მოგება ვცადეთ. ერთადერთი გუნდი ვიყავით, რომელსაც ფეხბურთის თამაში სურდა. მსოფლიოს ჩემპიონატის მოგება შეგვეძლო, მაგრამ არ გამოვიდა. მატჩის შემდეგ ისეთი განცდა მაქვს, რომ მსაჯები ქედმაღლები იყვნენ. ჩემპიონი არგენტინა გახდება. მას შემდეგ, რაც გუშინ ვნახეთ, როცა მესი წუწუნებდა, ჩვენს თამაშზე 5 არგენტინელი მსაჯი დაგვინიშნეს. შეუძლიათ თასი არგენტინას გადასცენ. სხვა რა ვთქვა? ვნახოთ რა მოხდება“.
და კრიშტიანო რონალდო?… პორტუგალიის ნაკრების ვარსკვლავმა, კრიშტიანუ რონალდუმ მატჩის დასრულების შემდეგ ცრემლები ვერ შეიკავა…
საინტერესოა, რომ როგორც სტატისტიკური პორტალი „Squawka“ გვამცნობს, კრიშტიანუმ ეროვნული გუნდის მაისურით 196-ე მატჩი ჩაატარა, რითიც კუვეიტის ნაკრების მსოფლიო რეკორდსმენის, ბადერ ალ–მუტავის რეკორდი გაიმეორა.
საფრანგეთის ნაკრებმა დაძაბულ ბრძოლაში ინგლისის ნაკრები დაამარცხა და ზედიზედ მეორე მსოფლიოს პირველობაა ნახევარფინალში იასპარეზებს.
მატჩის შემდეგ მთავარმა მწვრთნელმა დიდიე დეშამმა თამაში შეაფასა:
„ზღაპრულია! ეს დიდებული მატჩი იყო, ძალიან კარგ ინგლისის ნაკრებს შევხვდით. ძალიან სასიამოვნოა ნახევარფინალში გასვლა. მიზანს მონდომებით და გულით თამაშით მივაღწიეთ. მაროკოსთან თამაშისთვის სერიოზულად მოვემზადებით, ეს გუნდი იმსახურებს დაფასებას და აღიარებას. მისი შედეგი სიურპრიზის გარდა ყველაფერია, შესაბამისად, ძალიან სერიოზულად მივუდგებით“.
ინგლისელთა დამრიგებელი გარეთ საუთგეიტის კომენტარი შემდეგი გახლდათ:
„თამაშით მეტს ვიმსახურებდით, მაგრამ რა თქმა უნდა, გოლები გადამწყვეტია. ფეხბურთელებს ვუთხარი, რომ მათ მეტის გაცემა არ შეეძლოთ, ძალიან კარგად ითამაშეს ტოპ გუნდის წინააღმდეგ. ეს კარგი ზღვარია. მშვენიერი ტურნირი ჩავატარეთ. მსაჯზე ლაპარაკს აზრი არ აქვს, მირჩევნია ჩემს ფეხბურთელებს ვისაუბრო და საფრანგეთს მივულოცო. არ მგონია, რომ მეტის გაკეთება შეგვეძლო, ჩემი გუნდით ვამაყობ.
კეინის პენალტი? ვიგებთ და ვაგებთ გუნდურად, რამდენიმე საგოლე მომენტი ვერ გამოვიყენეთ. კეინი ჩვენთვის საოცარი და სანდო ფეხბურთელია, რომ არა ის, ახლა აქ არ ვიქნებოდით. ჩემი მომავალი? ყოველი ტურნირის შემდეგ სიტუაციას ვაჯამებთ, გადაწყვეტილების მისაღებად გარკვეული დრო დაგვჭირდება“, – განაცხადა გარეთ საუთგეიტმა.
აღსანიშნავია, რომ მსოფლიოს ჩემპიონატების ისტორიაში, მეოთხედფინალურ ეტაპზე ყველა მეტჯერ ინგლისი გამოეთიშა (7-ჯერ).
ინგლისის ნაკრების კაპიტანმა ჰარი კეინმა ინგლისელებთან მატჩში ორიდან ერთი თერთმეტმეტრიანი ვერ გამოიყენა. მუნდიალის დატოვების შემდეგ ფეხბურთელმა შემდეგი კომენტარი გააკეთა:
„ყოველთვის ვემზადები იმისთვის, რომ შესაძლოა თამაშში ერთი ან ორი პენალტის შესრულება მომიხდეს. ყოველთვის მაქვს წარმოდგენა იმაზე, თუ როგორ შევასრულებ მათ. ვერ დავადანაშაულებ მატჩისთვის სამზადისს ან სხვა რამეს. უბრალოდ, ამ საღამოს დარტყმები ასეთი გამოვიდა. პირველი ბრწყინვალე იყო, მეორე კი… ბურთს ზუსტად იქ ვერ დავარტყი, სადაც მსურდა.
პასუხისმგებლობას საკუთარ თავზე ვიღებ. ეს მატჩი ტკივილს მთელი ცხოვრების განმავლობაში მოგვაყენებს. გვჯეროდა იმის, რისი მიღწევაც გვსურდა. როგორც კაპიტანი, ვამაყობ ბიჭებით. გვქონდა ბრწყინვალე ბანაკი, ბრწყინვალე მუნდიალი, მაგრამ ყველაფერი ერთმა პატარა დეტალმა გადაწყვიტა, რომლის გამოც პასუხისმგებლობას საკუთარ თავზე ვიღებ. არ ვშოფთავ გუნდის და იმის გამო, როგორ აისახება ეს მასზე. დარწმუნებული ვარ, ეს მტკივნეული არამხოლოდ ჩემთვის, ყველასთვის იქნება, მაგრამ ასეთია ფეხბურთი. ეს სპორტია, სადაც ზოგჯერ გიწევს მსგავსი რაღაცების ატანა“.
ახლო წარსულში ლეგენდარულმა ინგლისელმა ფეხბურთელმა გარი ლინეკერმა სოციალურ ქსელში საფრანგეთთან წაგების შემდეგ პოსტი გამოაქვეყნა და ინგლისის ნაკრები შეაქო.
„კიდევ ერთხელ გულსატკენია, მაგრამ დიდებულ საფრანგეთის ნაკრებთან წაგება სირცხვილი არაა და მათ ვულოცავ. ამ შესანიშნავმა ახალგაზრდა ინგლისმა ყველაფერი გაიღო და მომავალში მხოლოდ უკეთესი გახდება. მათი დროც მოვა“.
„BBC“–ის მიმომხილველები და ვეტერანი ფეხბურთელები – იან რაიტი, როი კინი და გარი ნევილი თვლიან, რომ საუთგეიტმა მუშაობა უნდა გააგრძელოს. გარეთმა ნაკრები 2016 წელს, საშინელი შედეგების შემდეგ ჩაიბარა და მას შემდეგ ნაკრების ჯერ მუნდიალის ნახევარფინალში, შემდეგ ევროპის ჩემპიონატის ფინალში და ახლა უკვე მსოფლიოს ჩემპიონატის მეოთხედფინალში გაიყვანა.
გუშინ, ცნობილი გახდა რომ ფიფამ ნიდერლანდებისა და არგენტინის წინააღმდეგ საქმე აღძრა. მიმდინარე მუნდიალზე გამართულ მეოთხედფინალურ შეხვედრაში დაძაბულობამ პიკს მიაღწია და ფეხბურთელებს შორის ხშირად იყო ფიზიკური თუ სიტყვიერი დაპირისპირება.
ფიფა ნიდერლანდელებს ერთ მე-12 (მოთამაშეებისა და ოფიციალური პირების არასწორი საქციელი) , ხოლო არგენტინელებს ორ მე-12 და მე-16 (წესრიგი და უსაფრთხოება მატჩების მიმდინარეობისას) მუხლების დარღვევაში ედავება. საქმეს ფიფას სადისციპლინო კომიტეტი განიხილავს, თუმცა ჯერჯერობით არაა ცნობილი დარღვევის დადასტურების შემთხვევაში რა ტიპის სასჯელი ელით დამნაშავეებს.
პრესაში გავრცელებული ინფორმაციის თანახმად, გამოძიება არგენტინის ნაკრების რამდენიმე მოთამაშეზეც დაიწყება. საუბარია ემილიანო მარტინესის, ლიონელ მესისა და ლეანდრო პარედესზე. მარტინესმა და მესიმ შეხვედრის შემდეგ მატჩის მთავარ მსაჯზე მატეო ლაოსზე უარყოფით კონტექსტი ისაუბრეს, ხოლო პარედესს სასჯელი მოედანზე გამოვლენილი საქციელის გამო ემუქრება.
იმ შეხვედრის შემდეგ, ლეო მესი ჟურნალისტებს ინტერვიუს აძლევდა, რა დროსაც ნიდერლანდების ფორვარდს ვუტ ვეგჰორსტს შეურაცხყოფა მიაყენა.
„სულელო, რას მიყურებ? აქედან გაეთრიე“, – მიმართა ლეომ ვუტ ვეგჰორსტს.
ნიდერლანდელი მოთამაშის მიერ ამ ინციდენტის შეფასება შემდეგია:
„თამაშის შემდეგ მესისთვის ხელის ჩამორთმევა მინდოდა, რადგან როგორც ფეხბურთელს, მას დიდ პატივს ვცემ, თუმცა არგენტინელმა ჩემთან საუბარი არ ისურვა. ესპანურს კარგად არ ვფლობ, მაგრამ მივხვდი, რომ მესიმ უხეშად მომმართა, ძალიან იმედგაცრუებული ვარ“, – განაცხადა ნიდერლანდელმა თავდამსხმელმა.
გუშინ, ბრაზილიის ნაკრების შემტევმა ვინისიუს ჟუნიორმა სოციალურ ქსელში პოსტი გამოაქვეყნა და დაწერა, რომ ბრაზილია 2026 წელს მსოფლიოს დაიპყრობს.
„მინდორზე ვტიროდი, გასახდელში ვტიროდი, თვითმფრინავში ვტიროდი, სახლში ვტიროდი და ყოველჯერზე ვიტირებ, როცა ვიფიქრებ რამდენად ახლოს ვიყავით. ეს ძალიან ცუდი დღე იყო. უდავოდ ძალიან მოწყენილი ვარ.
რამდენჯერმე დავწერე ეს ტექსტი და მერე წავშალე. სიტყვები არ მაქვს იმედგაცრუების აღსაწერად, მხოლოდ ცრემლები დამრჩა. მიყვარს ფეხბურთი და ეს მომცემს ახალ შესაძლებლობას, რომ იქამდე მივიყვანო ბრაზილია, სადაც ნამდვილად იმსახურებს ყოფნას – მწვერვალზე.
უფრო ძლიერები დავბრუნდებით, ვიდრე ოდესმე. ბოდიშს ვუხდი მთელ ბრაზილია და მადლობა მხარდაჭერისა და სიყვარულისთვის. ერთიანი ბრაზილია მსოფლიოს 2026 წელს დაიპყრობს, დაიმახსოვრეთ“, – დაწერა ვინისიუსმა.
ავტორი
