ოზურგეთის მუნიციპალიტეტის სოფელ ჭანიეთში, თინა ლომჯარიას საკარმიდამო ფართობში, სახლის გვერდით მდებარე მანდარინის პლანტაციის ფერდობიანი ნაწილი მოულოდნელად წარმოშობილმა მეწყერმა ჩაიტანა. დიდი ზარალის გარდა, ოჯახი უდიდესი საშიშროების წინაშე დგას _ სახლის უკანა მხარეს, 50 მეტრის დაშორებით უფსკრული წარმოიშვა და არავინ იცის, რა მოხდება უახლოეს მომავალში.
თინა ლომჯარია პენსიონერია, მეუღლე ადრე გარდაეცვალა, ახლახან, მოულოდნელად დაიღუპა მისი ახალგაზრდა რძალი. ახლა შვილის და შვილიშვილების იმედს, როგორც დედა და ბებია, ის წარმოადგენს. მტირალ ქალბატონს, რომელსაც ჯერ ოჯახის უმძიმესი ტრაგედია არ განელებია, დიდი მატერიალური ზარალიც მიადგა.
_ ორი დღის წინ, შუაღამისას, გავიგონე შრიალი. არ ავმდგარვარ, რადგან ძროხის სადგომი ახლოს არის და ვიფიქრე, პირუტყვი თუ მოძრაობს,-მეთქი. დილით ვნახე _ სადღაა ჩემი ეზო და მანდარინის ნახევარი ბაღი _ შუა საუკეთესო ნაწილი, ტალახიანი მასა ისე იყო ატივტივებული და დაბლა ჩაქცეული, გეგონებოდა, ტალახის მდინარეს ნაფოტები ჩაეტანა. მანდარინის ხეების უმეტესობა დაიმარხა. რაც მოძრავ მიწის მასაზეა დარჩენილი, ის რაში გვარგია _ ახლოს ვერავინ მივა შიშით. ახლა იმისთვის ვწირავ უფალს მადლობას, რომ დღე არ იყო და როცა მანდარინს ვკრეფდით, მაშინ არ მოხდა ეს საშინელება, თორემ მკვდარსაც ვერავის ვიპოვიდით. რამხელა მიწის მასაა მოწყვეტილი და წასული, ამის დაჯერება ჩვენც გვიჭირს და ვინც ნახა, ყველა გაოგნებულია, _ გვიამბობს ქალბატონი თინა.
გარდა იმისა, რომ ათეულობით ძირი მსხმოიარე მანდარინის საუკეთესო ხეებია დამეწყრილი, მიწის მასამ ჩაიყოლა, ასევე, ეზოს ბოლოში არსებული თხილის პლანტაცია, ახალი ნარგავები, სხვადასხვა ხეხილი.
ოჯახის უმცროსი წევრი, თემურ ლომჯარია, რომელიც 22 წლისაა, განსაკუთრებული შრომისმოყვარეობით გამოირჩევა და უსაზღვროდ უყვარს სამეურნეო საქმიანობა. ჰყავს ფუტკარი, შინაური პირუტყვი და განსაკუთრებით უყვარს ხეხილის მოშენება, ბავშვობიდან დაუფლებულია ფუტკრის მოვლის და ხეხილის მყნობის ხელოვნებას.
ახლახან დედა დაკარგა. ძალიან ნერვიულობს ყველაფერზე, იმასაც, საკუთარი ხელით დამყნილი მრავალი ძირი ატამი თუ ვაშლი მეწყერმა რომ ჩაიყოლა.
_ ჩემი კარმიდამო უსაზღვროდ მიყვარს, აქედან სად უნდა წავიდე?! ძალიან მწყდება გული იმის გამო, რაც ბუნებამ ქნა, მაგრამ რას ვიზამ? ჩემს საყვარელ საქმიანობას ისევ გავაგრძელებ, _ გვეუბნება ის.
ოზურგეთის მუნიციპალიტეტის მერის მოადგილემ ირაკლი სირაძემ მადლობა გადაგვიხადა ინფორმაციის მიწოდებისთვის და გვირჩია, ინფრასტრუქტურის სამსახურისთვის მიგვემართა. აღნიშნული სამსახურის ყოფილმა უფროსმა, რომელიც ამ დროისთვის გათავისუფლებულია და ამ პოსტზე ჯერ დანიშნული არავინ არის, გვირჩია, რომ დაზარალებული ოჯახის უფროსმა განცხადებით მიმართოს ამ სტრუქტურას და რომ ჯერ ადგილზე უნდა მივიდნენ სოფლის ხელმძღვანელობასთან.
რაც შეეხება სოფელ ჭანიეთში მერის წარმომადგენელს, ამ დროისთვის, როგორც ოზურგეთის ყველა დანარჩენ სოფელში, ხელშეკრულების ვადის გასვლის გამო, უფლებამოსილება აღარ აქვს, დანიშნული არ არიან არც თანაშემწეები.
როგორც ინფრასტრუქტურის სამსახურში გვითხრეს, აუცილებელია გეოლოგიურმა ჯგუფმა შეისწავლოს ეს კარმიდამო. თუმცა, ადგილზე ასეთი კადრები არ ჰყავთ და საჭიროების შემთხვევაში, თბილისიდან გამოძახება ხდება.
ფაქტია, რომ ლომჯარიების ოჯახს ყურადღების მიქცევა სასწრაფოდ ესაჭიროება, რადგან, სახლი საკმაო მაღალ გორზე მდებარეობს, მეწყერი საცხოვრებელთან 50 მეტრის მანძილზეა წარმოქმნილი და ბაღის ასე ერთბაშად განადგურებას რომ თავი დავანებოთ, ადამიანების სიცოცხლეა საფრთხის ქვეშ. არავინ იცის, რა მოხდება კიდევ, რადგან წარმოუდგენლად დიდი მიწის მასაა ერთბაშად მოხეთქილი და საშიშად ამოძრავებული.
_ ხომ ხედავთ, ამხელა მანდარინის ხეები ისეა აცურებული, გეგონება, ასანთის ღერები იყოს ჩარჭობილი ტალახის მასაში. თუ გაახმაურებთ ამ ამბავს და გააგებინებთ მთავრობას, იქნებ, დროულად მოგვეშველონ. მე, ჩემს შვილებს და შვილიშვილებს არასდროს არავინ შეგვიწუხებია. კი ხედავს სოფელი, როგორ ვშრომობთ. წელს ჩვენთვის მოიცალა ყველა უბედურებამ. ბუნების წინააღმდეგ ვინ წავა? მადლიერი ვიქნებით, თუ დაგვეხმარებიან, _ გვეუბნება თინა ლომჯარია.
