წერილში, რომელიც მიხეილ სააკაშვილმა ციხიდან გამოაგზავნა, წერია, რომ ოპოზიციონერმა პარლამენტის წევრებმა მიბაძონ მამუკა ხაზარაძეს და პარლამენტი დატოვონ.
„ძალიან შთამბეჭდავი იყო გუშინ ბატონი მამუკა ხაზარაძის ნაბიჯი, მთლიანად ვიზიარებ მის ამ პოზიციას და მთლიანად ვეთანხმები ნიკა მელიას გამოსვლას.
ერთი სული მაქვს, როდის შემოგიერთდებით, მაგრამ ამაშიც თქვენი დახმარება მჭირდება. ვერც ერთი ციხის კარები ვერ შეაკავებს ხალხის სამართლიან რისხვას.
ამავე დროს უნდა გვესმოდეს, რომ პარლამენტმა უკვე დაკარგა სახელისუფლებო პლატფორმის ფუნქცია. იქ ვერანაირი გადაწყვეტილება ვერ და არ იქნება მიღებული. ბანდიტებთან საუბარი რეფორმებსა და ქვეყნისთვის საკეთილდღეო ცვლილებებზე მხოლოდ ემსახურება დროის გაწელვას, რათა ჩაქრეს საპროტესტო მუხტი და შიგნითაც და გარეთაც ხელი ჩაიქნიონ ჩვენს ქვეყანაზე.
ამიტომ, ჩემი რჩევა იქნება ყველა ჩემი თანამებრძოლისა და უბრალოდ, პატრიოტებისა და წესიერი ხალხისადმი პარლამენტში, მიბაძონ ბატონ ხაზარაძეს, დატოვონ პარლამენტი და „ოცნება“ დატოვონ საკუთარ თავთან მარტო“, – აღნიშნავს მიხეილ სააკაშვილი წერილში.
მამუკა ხაზარაძეს იმ პარლამენტარების ნაწილმა მიბაძა, რომლებიც “ერთიანი ნაციონალური მოძრაობის“ სიით არიან შესული პარლამენტში. შეიძლება ითქვას, რომ პარლამენტიდან ოპოზიციური ფრთის გამოსვლა იწყება.
ასევე, ვრცელდება ინფორმაცია, რომ შესაძლოა მუნიციპალიტეტების საკრებულოს წევრებმა, რომლებიც “ერთიანი ნაციონალური მოძრაობიდან“ გახდნენ დეპუტატები, მანდატებზე უარი თქვან.
“ერთიანი ნაციონალური მოძრაობის“ ოზურგეთის ორგანიზაციის თავმჯდომარე, დავით მჟავანაძე “გურია ნიუსთან“ საუბრის დროს ამბობს, რომ მიხეილ სააკაშვილის ტექსტში მხოლოდ პარლამენტის წევრებზე იყო საუბარი.
“ჩემი პოზიცია ასეთია: თუ იქნება ერთიან გადაწყვეტილება და პარლამენტს, საკრებულოებს ბოიკოტის ნიშნად დატოვებენ ოპოზიციონერი დეპუტატები, მე მივესალმები. ეს არც არჩევნები იყო და არც არაფერი. ბიძინა ივანიშვილი არ აპირებს არჩევნების გზით ხელისუფლების დათმობას. რამდენი არჩევნებიც არ უნდა ჩატარდეს ყველა არჩევნებს გააყალბებს. ყველამ კარგად დავინახეთ, რა ხდებოდა არჩევებამდე გარეთ და რა მოხდა არჩევნების დღეს. ყველას ატერორებდნენ და მათ თავისუფალი არჩევანის გაკეთებას უშლიდნენ.
ერთეულ შემთხვევებს თუ ექნება ადგილი ამას შედეგზე გავლენა არ ექნება. იმისთვის, რომ მიხეილ სააკაშვილი გამოვიდეს გარეთ, იმისთვის, რომ ქვეყანაში ჩატარდეს რიგგარეშე არჩევნები და ქვეყანაში დასრულდეს ოლიგარქიული მმართველობა, აბსოლუტურად ყველა რესურსი უნდა გამოვიყენოთ, რომელიც კანონის ფარგლებში ექცევა და კანონითაა გათვალისწინებული“, _ გვითხრა დავით მჟავანაძემ.
[sexy_author_bio]
