გუშინ, იტალიურმა გამოცემამ „Foot Mercato“ საინტერესო ინფორმაცია გაავრცელა. აღმოჩნდა რომ „მილანი“ ფრანგული „მეცის“ ქართველი თავდამსხმელი გიორგი მიქაუტაძის შეძენას გეგმავს.
მიქაუტაძის ტრანსფერზე „მილანის“ ტექნიკური დირექტორო პაოლო მალდინი უკვე მუშაობს და საქართველოს ნაკრების 22 წლის შემტევს უკვე რამდენჯერმე ესაუბრა.
„ჩვენი ინფორმაციით, ბოლო პერიოდში მოლაპარაკებებმა წინ წაიწია. „მილანი“ სერიოზულად არის დაინტერესებული და მზადაა, მიქაუტაძის სანაცვლოდ 10 მილიონი ევრო გადაიხადოს. ეს საკითხი მალდინის აქვს ჩაბარებული, რომელიც ფეხბურთელს არაერთხელ ეკონტაქტა. იგეგმება, რომ ქართველი თავდამსხმელის ტრანსფერის შემთხვევაში, ის მომავალ სეზონშიც „მეცში“ იქნება განათხოვრებული, ოღონდ, მაშინ თუ ეს კლუბი ფრანგულ ლიგა 1-ში აღზევდა. მიქაუტაძეს დიდი ინტერესით აკვირდებიან ვენსან კომპანი და მისი „ბარნლიც“, – დაწერა ვებგვერდმა.
გამოცემა „Corriere dello Sport“ კი ამტკიცებს, რომ „ნაპოლის“ პრეზიდენტი აურელიო დე ლაურენტისი მუდმივ კონტაქტზეა ლუის ენრიკესთან, რათა დაითანხმოს სარფიან ხელშეკრულებაზე.
დე ლაურენტისი ესპანეთის ნაკრებისა და „ბარსელონას“ ყოფილ მწვრთნელს სთავაზობს ორწლიან კონტრაქტს, რომლის ჯამური ღირებულება 10 მილიონი ევროა შემდგომი მომატების პერსპექტივით.
იტალიური მედიის ინფორმაციით, კრისტიანო ჯუნტოლი „იუვენტუსს“ ხუთწლიან ხელშეკრულებაზე უკვე მოელაპარაკა, თუმცა ჯერჯერობით რჩება „ნაპოლის“ სპორტულ დირექტორად.
ჯუნტოლი „ნაპოლიში“ 2015 წელს მივიდა. მისი სწორი მუშაობის წყალობით, გუნდში გამოჩნდნენ ახალგაზრდა ფეხბურთელები ხვიჩა კვარაცხელია და კიმ მინ-ჯე, რომლებმაც დიდი როლი ითამაშეს ნანატრი სკუდეტო მოგებაში.
„იუვენტუსთან“ ჯუნტოლის ჯერ მხოლოდ სიტყვიერი შეთანხმება აქვს, რომელიც ითვალისწინებს წლიური 1.5 მილიონი ევროს ანაზღაურებას.
და რა ხდება ლუჩანო სპალეტის ირგცლივ? ხელშეკრულების თანახმად, მწვრთნელს „ნაპოლისთან“ თანამშრომლობის შეწყვეტის შემთხვევაში 8 მილიონი ევროს გადახდა მოუწევს (გუნდში მუშაობის ორი წლის განმავლობაში სულ 5.6 მილიონი გამოიმუშავა), თუმცა კლუბის პრეზიდენტი აურელიო დე ლაურენტისი კომპენსაციის გარეშე დაემშვიდობება.
კონტრაქტის პირობების მიხედვით, სპალეტის ერთი წელი სხვა გუნდში დასაქმების უფლება არ ექნება და თუ შეთანხმებას დაარღვევს, კომპენსაციას გადაახდევინებენ.
გავრცელებული ინფორმაციით, ლუჩანო სპალეტი ერთწლიანი პაუზის აღებას აპირებს, თუმცა დე ლაურენტისი შეეცდება გუნდში დარჩენაზე კიდევ ერთხელ დაითანხმოს.
სპალეტის კონტრაქტი 2024 წლის ზაფხულამდე აქვს გაფორმებული და დე ლაურენტისს სურს, დამშვიდობება მშვიდობიანად და მხარეთა ურთიერთშეთანხმებით მოხდეს.
გამოცემა „Corriere dello Sport“-ის მტკიცებით, ხვიჩა კვარაცხელია „ნაპოლისთან“ კონტრაქტს უახლოეს დღეებში გაახანგრძლივებს და შეთანხმება უკვე მიღწეულია.
ახალი ხელშეკრულება ერთი წლით, 2028 წლის ივნისამდე გაგრძელდება. ქართველის ანაზღაურება 1.4 მილიონიდან 2.5 მილიონამდე აიწევს, მაგრამ ბონუსების ჩათვლით, სავარაუდოდ, თანხა 4 მილიონს შეადგენს.
ამასთან ერთად, საბოლოოდ გადაწყვეტილია, რომ მცველი კიმ მინ-ჯაე „მანჩესტერ იუნაიტედში“ გადავა და ინგლისელები სამხრეთკორეელის გამოსასყიდ თანხას, 70 მილიონ ევროს გადაიხდიან.
ასევე ცნობილი გახდა, რომ „მანჩესტერ იუნაიტედს“ ვიქტორ ოსიმენის დამატებაც ძალიან სურს და ამ ორი ფეხბურთელის სანაცვლოდ 191 მილიონ ფუნტს იხდის.
ავტორი
