ა(ა)იპ “ოზურგეთის მუნიციპალიტეტის კულტურის და მოსწავლე ახალგაზრდობის ცენტრის” თანამშრომლები სამსახურიდან დაითხოვეს. ისინი, როგორც თავად ამბობენ, სამსახურიდან ყოველგვარი წინასწარი გაფრთხილების გარეშე გაათავისუფლეს.
“სანამ ბრძანებას დაწერდა, მანამ რომ გავეფრთხილებინეთ დირექტორს, კობა ბანძელაძეს, უფრო დავიჯერებდით, რომ ეს წინასწარ მოფიქრებული და ზუსტად პოლიტიკური და პიროვნული საბაბით არ მომხდარა”, _ ამბობენ “გურია ნიუსთან” საუბრისას გათავისუფლებულები.
ბუნებრივია, ყველა გათავისუფლებას ხელმძღვანელი პირებისგან განმარტება უნდა მოჰყვეს, რა მიზეზით მოხდა ეს.
ჟურნალისტები, წლების მანძილზე, არაერთხელ ვართ მომსწრე იმისა, თუ როგორ უცერემონიოდ ყრიან სამსახურებიდან ხელისუფლებაში მოსული პირველი პირები მათთვის არასასურველ ადამიანებს. მანკიერი სისტემის მეტი არაფერი შეიძლება ეწოდოს იმ ქმედებას, როცა სამსახურიდან ადამიანს უშვებენ სინამდვილეში იმიტომ, რომ ან პოლიტიკურად ვერ თვლიან მათ მომხრედ ან ყოფილი მერის თუ თავმჯდომარის ცოლი, ძმა ან დაა, ან ზოგადად, ოჯახის წევრია. თუმცა, ამას ხმამაღლა არასდროს ამბობენ.
ა(ა)იპ “ოზურგეთის მუნიციპალიტეტის კულტურის და მოსწავლე ახალგაზრდობის ცენტრიდან” გათავისუფლებული ადამიანები _ ლალა ნაკაიძე, რუსუდან მდინარაძე, მაია თანდილაშვილი და ხათუნა ჭელიძე არიან.
რაც შეეხება კულტურის და დასვენების პარკიდან დათხოვნილ თანამშრომლებს, ისინი უმეტესად სხვადასხვა სამსახურში გადაანაწილეს. პროექტების მართვის განყოფილებაში “გურია ნიუსს” უთხრეს, რომ პარკში სულ 15 ადამიანი მუშაობდა. აქედან ერთი, მებაღის პოზიციაზე მყოფი, ქალაქის მომსახურების ცენტრში გადაიყვანეს. სამი მათგანი დაცვის სამსახურშია. სულ 15 ადამიანიდან, ექვსი ადგილზე დარჩა, დანარჩენი გადანაწილდა სხვადასხვა პოზიციაზე. თუმცა, უმთავრესი საკითხი _ პარკის დასუფთავება ამ დროისთვის ღიად რჩება. პარკის სივრცეს არც დამლაგებელი ჰყავს ამ დროისთვის, არც დილის მორიგე, რეორგანიზაცია კი, დასრულებულია. ეს სამსახურებრივი დანაწევრება, რამდენად გამართლებული იქნება, მომავალი აჩვენებს. თუმცა, უმთავრესი მაინც ისაა, რომ პარკი იყოს უსაფრთხო!
_ მრავალი სამწუხარო მაგალითი არსებობს, რა ხდება პარკებში. აქ დადიან ბავშვები, ახალგაზრდები თუ ასაკოვნები. აუცილებლად უნდა არსებობდეს ზედამხედველის შტატი თუ რაც გინდათ, დაარქვით, რომ მაქსიმალურად იქნეს დაცული უსაფრთხოება, _ გვითხრეს აღნიშნულ სამსახურში.
ჩვენთვის, ასევე, ცნობილია ის ფაქტიც, რომ ცოტა ხნის წინ, ოზურგეთში სტუმრად მყოფ კულტურის მინისტრს შეხვდნენ მშობლები და მოითხოვეს აღნიშნული სამსახურის ქალაქის ცენტრში გადმოტანა.
ცნობილია, რომ ეს სამსახური, სოფელ ოზურგეთში, ერთ-ერთ შენობაში განათავსეს წინა მერის მმართველობის დროს. მშობლები აღნიშნავდნენ, რომ ადრე ათასამდე მოსწავლე დადიოდა კულტურის ცენტრში, ძირითადად, სოციალურად დაუცველი ფენის შვილები. სამსახურის აქ გადამისამართების შემდეგ კი, 400-მდე მოსწავლე დარჩა. ეს მიუთითებს იმაზე, რომ მგზავრობის საკითხი გართულდა და უჭირთ გადაადგილება.
ჩვენი წყაროს ინფორმაციით, მინისტრი დაიბნა კიდეც, რადგან განაცხადა, რომ არ იცოდა ამის შესახებ და ასე მოულოდნელად, პირისპირ შეხვედრისას გაიგო.
თუ როგორ მოწესრიგდება უახლოეს მომავალში პარკის მართვის განყოფილება, ასევე, თვით შენობის საკითხი და მოსწავლეთა მშობლების პრეტენზიას განიხილავენ თუ არა, ამის შესახებ ჩვენ აუცილებლად ვუამბობთ მკითხველებს. ახლა კი მივუბრუნდეთ სტატიის თემას _ წლის მიწურულს სამსახურიდან დაითხოვეს ოთხი პროფესიონალი კადრი.
_ ვერ გეტყვით, რატომ გამომიშვეს სამსახურიდან. მოსწავლეთა სკოლის დირექტორი ვიყავი 15 წლის მანძილზე. “ნაციონალები” როცა მოვიდნენ ხელისუფლებაში, მაშინვე გამიშვეს. გუბერნიის აპარატში ვმუშაობდი, იქედანაც გამიშვეს. ახლა, “ქართული ოცნების” პირობებში გამათავისუფლეს. ზედმეტად არავის ვეჩრებოდი თვალში. რაც მევალებოდა, მუდამ ვაკეთებდი პირნათლად. ახლა ვიყავი ღონისძიების მოწყობის ორგანიზატორი. მე მაინც ვფიქრობ, რომ თავად დირექტორმა, კობა ბანძელაძემ გადაწყვიტა ეს ამბავი. ხომ უნდა არსებობდეს რაიმე მიზეზი, სარჩული, როცა ასე უცერემონიოდ გაგდებენ სამსახურიდან? ხალხს სიგელებით და ჯილდოებით აქვთ ყუთები სავსე. ჩემთვის, ერთი მადლობაც არავის უთქვამს არასდროს. არც მინიშნება მქონია ოდესმე, რომ მადლიერება გამოეხატათ. თუმცა, არის რაღაცეები, რაც ძალიან გაგიკვირდება ადამიანს, _ ამბობს ლალა ნაკაიძე.
მაია თანდილაშვილი, რომელიც, ასევე, მიზეზის განმარტების გარეშე გაათავისუფლეს, ამბობს, რომ გაკვირვებულია.
_ თეატრალური ინსტიტუტის დამთავრების შემდეგ, 37 წლის განმავლობაში ვიმუშავე კულტურის სამსახურში. ვერავინ იტყვის, რომ არაპროფესიონალი ვარ ან რაიმე დავალება ვერ შევასრულე, ან სადმე რაიმე ზედმეტად ვთქვი. ბუნებით არ ვარ პოლიტიკურად აქტიური. რა ანაზღაურებაც იყო, ასეთ ხელფასზე კვალიფიციური კადრი არც იმუშავებს და ვიღაცას გაეცინება (საშუალოდ, ამ სამსახურში 330 ლარია ხელფასი. ავტ.).
თუ ჩემი მეუღლის გამო გამათავისუფლეს, რომელიც წინ მერის მმართველობისას, მომსახურების ცენტრის ხელმძღვანელი იყო, ესეც სასაცილოა. ახლა ჩატარებული რეორგანიზაციის შედეგად, ვინც გაათავისუფლეს, მერე სხვადასხვა სამსახურში გადაანაწილეს. ეს გადანაწილება მცირე რაოდენობაზე, ანუ ჩვენზე, ოთხად ოთხ ადამიანზე არ გავრცელდა და ულაპარაკოდ გაგვიშვეს სამსახურიდან, _ გვითხრა ქალბატონმა მაიამ, რომელიც ხელოვნებათმცოდნეა და მას ოზურგეთში იცნობენ, როგორც კვალიფიციურ კადრს და საუკეთესო ადამიანს.
გათავისუფლებულთაგან ერთ-ერთი რუსუდან მდინარაძეა, ოზურგეთის მუნიციპალიტეტის ყოფილი მერის, კოტე შარაშენიძის მეუღლე.
ქალბატონი რუსუდანი, როგორც თავად გვეუბნება, 22 წლის განმავლობაში მუშაობდა კულტურის სამსახურში:
_ იმდენად მიყვარს ჩემი საქმე, თავაუღებლად ვმუშაობდი წლების მანძილზე. ბუნებით მშვიდი ადამიანი ვარ. ზედმეტი არასდროს სიტყვაც არ მითქვამს და არ გადამიდგამს ნაბიჯი. გასაგებია, რატომაც გამათავისუფლეს, თუმცა, არა უშავს, _ გვითხრა ქალბატონმა რუსუდანმა, რომელმაც, ასევე, აღნიშნა, რომ ბოლო პერიოდში სამსახურში ოციოდე დღის მანძილზე ვერ მივიდა შვილის ავადმყოფობის გამო _ თბილისში მოუხდა წასვლა, თუმცა, ამის თაობაზე ხელმძღვანელები ინფორმირებული იყვნენ.
_ აქ მხატვარ-დიზაინერად ვმუშაობდი, რაც სხვადასხვა ღონისძიების გაფორმებას ეხებოდა. თეატრში იყო თუ სხვაგან, სულს და გულს ვდებდი საქმეში. ღამეები თავზე მათენდებოდა და დაკისრებულ მოვალეობას ვასრულებდი.
თუ ამდენი თანამშრომლიდან ვინმე მუშაობდა, ერთ-ერთი პირველი მეც ვიყავი ასე გადაწყვიტეს ახლა… მთლად კობა ბანძელაძის ინიციატივა არ მგონია ჩემი გათავისუფლება. თუმცა, ვიდრე ბრძანებას დაწერდა, შეეძლო, ეთქვა. ბრძანების დაწერის შემდეგ დამირეკა, ჯერ მომიკითხა, შემდეგ კი… უნდა გითხრა სამწუხარო ამბავი, თქვენი შტატი გაუქმდაო… რა უნდა თქვა ასეთ დროს? გასაგებია, რატომ დაავალეს მას ეს ყველაფერი, _ გვითხრა ქალბატონმა რუსუდანმა.
“22 წელი ვიმუშავე მოსწავლე-ახალგაზრდობის სახლში მხატვარ-დიზაინერის პოზიციაზე და ჩემ მიერ უამრავი ღონისძიება გაფორმებულა. შემიძლია ვთქვა, რომ პირნათლად ვასრულებდი დაკისრებულ მოვალეობას, დღეს კი, აღარ ხარ საჭიროო, არა უშავს…” _ დაწერა რუსუდან მდინარაძემ სოციალურ ქსელში.
ხათუნა ჭელიძე, რომელიც აღნიშნულ ორგანიზაციაში 15 წლის მანძილზე მუშაობდა, ჩვენთან საუბარში ამბობს, რომ ყოველთვის თავშეკავებული იყო პოლიტიკური საკითხების მიმართ. უკვირს, ამხელა კოლექტივში, მხოლოდ ოთხი ადამიანი რატომ გაათავისუფლეს (ხათუნა ჭელიძე შალვა ბოლქვაძის მეუღლეა. შალვა ბოლქვაძე სხვადასხვა დროს მუშაობდა ძალოვან სტრუქტურებში, სხვადასხვა თანამდებობაზე და მერის წინა არჩევნებზე საპირისპირო მხარედ მოიაზრებოდა; ავტ.).
_ 330 ლარი მქონდა ხელფასი. 15 წელი ვიმუშავე კულტურის განყოფილებაში. რა უნდა იფიქრო, როცა მოულოდნელად გეტყვიან, რომ შენი შტატი გაუქმდაო? მე მალე ისედაც წასვლას ვაპირებდი, შვილი უცხოეთში მყავს. თუმცა, ადამიანის უფლების დაცვა, თანამშრომელთან კეთილსინდისიერად მოქცევა ოდესმე ხომ უნდა ისწავლონ? ჩვენი გათავისუფლება ნამდვილად იყო პოლიტიკური და პირადი ნიშნით გადაწყვეტილი. დაავალეს კობა ბანძელაძეს და მან შეასრულა, _ თქვა ქალბატონმა ხათუნამ, რომელიც დიდხანს მუშაობდა კულტურის სფეროში და მისთვის მტკივნეული აღმოჩნდა მოულოდნელად გათავისუფლება.
“გურია ნიუსი “ესაუბრა ა(ა)იპ ოზურგეთის მუნიციპალიტეტის კულტურის და მოსწავლე-ახალგაზრდობის ცენტრის დირექტორს, კობა ბანძელაძეს. ის დაგვპირდა, რომ პასუხს სოციალურ ქსელში სასაუბროთი მოგვაწვდიდა.
მოგვიანებით, აღნიშნული სამსახურის პრესის განყოფილებიდან ასეთი მოკლე პასუხი გამოგვიგზავნეს:
“ა(ა)იპ ოზურგეთის მუნიციპალიტეტის კულტურის და მოსწავლე-ახალგაზრდობის ცენტრში ცვლილებების პროცესი იყო აბსოლუტურად გამჭვირვალე. ყველა თანამშრომელი მიმდინარე პროცესთან დაკავშირებით ინფორმირებული იყო და თუ ვინმე თვლის, რომ მის მიმართ კანონი დაირღვა, რა თქმა უნდა, უფლება აქვს, მიმართოს სასამართლოს”.
როგორც “გურია ნიუსთან” გათავისუფლებულებმა განაცხადეს, ისინი არ აპირებენ სასამართლო დავას:
_ რა აზრი აქვს? ნერვები უნდა დავიგლიჯოთ. სამართალს სად ვიპოვით, როცა აგერ ასე თვალის დახამხამებაში სამსახურიდან მხოლოდ ოთხ პროფესიონალს გვაგდებენ. მით უფრო, ა(ა)იპ ორგანიზაციების თანამშრომლებს არც გვთვლიან საჯარო მოხელეებად. ჩვენ მხოლოდ მიზერულ ხელფასზე მაქსიმუმის გაკეთებას გვთხოვენ… _ თქვეს მათ.
ჩვენს მკითხველებს შევახსენებთ, რომ წლების მანძილზე ვესწრებოდით სასამართლო პროცესებს, როცა ა(ა)იპ ორგანიზაციების თანამშრომლებს ითხოვდნენ სამსახურებიდან, განწყობის და პოლიტიკური ნიშნის მიხედვით. სამწუხაროდ, სასამართლოს არც ერთხელ დადებითად არ გადაუწყვეტია საკითხი. უარყოფითი გადაწყვეტილების საფუძვლად კი, ასახელებდნენ საჯარო სამსახურის სტატუსს, რომლის მატარებლად ა(ა)იპ სამსახურები არ მიიჩნევა.
ავტორი
