,,მინდა, კობახიძემ თავის თავზე გააგრძელოს მუშაობა“- ალექსანდრე ქანთარია

მმართველ გუნდში არსებულ შესაძლო კრიზისთან დაკავშირებით ,,გურია ნიუსი“ ,,ქართული ოცნების“ წევრს, ალექსანდრე ქანთარიას ესაუბრა.

_ პარლამენტის თავმჯდომარე არასწორი განცხადების გაკეთებაში გადანაშაულებთ. მისი თქმით, შეცდომა დაუშვით, როდესაც თქვით, რომ  გუნდი, შესაძლოა, სხვა დეპუტატებმაც დატოვონ თუ პროცესები ისე გაგრძელდა, როგორც დღეს ვითარდება. როგორ ფიქრობთ, რამ გამოიწვია კობახიძის გაღიზიანება? როგორ აფასებთ მის განცახდებას?

_ სანამ ვინმეს შეცდომებს მოვკითხავთ, საკუთარ თავში ჩავიხედოთ და საკუთარი შეცდომები გავაანალიზოთ და ამის შემდეგ მივუთითოთ სხვას. შეუმცდარი არავინ ვართ, მაგრამ პარლამენტის თავმჯდომარეს ევალება, იყოს შემაკავშირებელი და არა ავტორიტარული რიტორიკის მქონე. სხვათაშორის, პრემიერმა საკმაოდ კარგად გამოხატა საკუთარი პოზიცია, ეს იყო ხელმძღვანელისა და მართლაც, პოლიტიკოსის პოზიცია, განსხვავებით პარლამენტის თავმჯდომარისგან. კვირიკაშვილს მიაჩნია, რომ ის, რაც გუნდში ვითარდება, არის ცოცხალი პროცესი და მეც ვეთანხმები.  განსხვავებული აზრები და განსხვავებული პოზიციები შეცდომა არ არის. პარლამენტში განსხვავებული აზრების მქონე  არა 3-4 დეპუტატი, არამედ 80 და შეიძლება, უფრო მეტია.

_ ბატონო ალექსანდე, თქვენ თქვით, რომ შეუმცდარი არავინ არის, ხომ არ ფიქრობთ, რომ თქვენ მიერ გაკეთებული განცხადება ნაჩქარევი იყო?

_ ირაკლი კობახიძის რიტორიკა იყო აბსოლუტურად შეუსაბამო, ალბათ, გამოუცდელობის ბრალია. რასაკვირველია, მგონია, რომ კრიტიკა კარგია, უბრალოდ, კარგ მთქმელს კარგი გამგონე სჭირდება. მიმაჩნია, გედი ფოფხაძის ნაჩქარევმა, ემოციურმა გადაწყვეტილებამ პარლამენტის თავმჯდომარე დააბნია. კობახიძის, როგორც ერთ-ერთი პირველი პირის, ძირითადი მოვალეობა უნდა იყოს, რომ პროცესები სწორად წარმართოს, ამ მიმართულებით პრობელმა არ არის, მაგრამ საჭიროა შესაბამისი თვისებები და უნარი გამოიჩინოს.

_ ,,ქართული ოცნებაში“ შესაძლო დაპირისპირებაზე რას გვეტყვით? ფიქრობთ თუ არა, რომ მმართველ გუნდში დღეს კრიზისია?

_ გუნდში განსხვავებული აზრები ნამდვილად არის, რასაც ყველა ნორმალურად აღიქვამს. ამ პროცესებს დაპირისპირებას ნამდვილად ვერ დავარქმევ. ვფიქრობ, თავად პარლამენტის თავმჯდომარე კარგად უნდა იყოს გარკვეული ამ პროცესებში. მე-9 მოწვევის პარლამენტარებს აქვთ განსხვავებული აზრები, რაც ყველასთვის ნათელია, ბუნებრივია, ყველა ერთ პოზიციაზე ვერ ვიდგებით.

_ თქვენ განაცხადეთ, რომ პარლამენტის თავმჯდომარეს გამოუცდელობით მოსდის გარკვეული შეცდომები. მმართველ გუნდში ხომ არ განიხილება ირაკლი კობახიძის იმპიჩმენტი?

_ ასეთი განწყობა, ჯერჯერობით, არ არის, თუმცა, ბუნებაში მოულოდნელი არაფერია. მინდა პარალემენტის თავმჯდომარემ მაქსიმაულარდ ჩართოს ყველა რესურსი იმისთვის, რომ  მდგომარეობა დადებითად შეიცვალოს და თავის თავზე მუშაობა გაგრძელოს.