“მიუსაფარ ცხოველთა პოპულაციის ცენტრი მოიცავს გურიას, ქობულეთს და ფოთს“: პრეზენტაცია ოზურგეთში

ოზურგეთის ფოლკლორის ცენტრში,  მიუსაფარი ცხოველების  მართვის სტრატეგიის დოკუმენტის პრეზენტაცია შედგა.

შეხვედრას ესწრებოდნენ ოზურგეთში მოქმედი არასამთავრობო ორგანიზაციების და საზოგადოების წარმომადგენლები, ჟურნალისტები, დაინტერესებული პირები.

პრეზენტაცია წარმოადგინა და დოკუმენტზე დეტალურად ისაუბრა გურიის სამოქალაქო კლუბის ხელმძღვანელმა ნათია ვაშალომიძემ.

მან განაცხადა, რომ საზოგადოებისთვის აუცილებელია მიუსაფარი ძაღლებისთვის  მართვის ეფექტური სტრატეგიის არსებობა, რომელიც წარმოდგენილია არსებულ სამართლებრივ ჩარჩოში და  მოიცავს ძაღლების პოპულაციაზე კონტროლის ცივილურ ფორმებს, მათთვის ვეტერინარულ დახმარებას. ყოველივე ეს კი ადამიანების და ცხოველების უსაფრთხოების და კეთილდღეობის უზრუნველსაყოფად იქნება მიმართული. ვაშალომიძემ ასევე თქვა, რომ სანამ პოპულაციის მართვის ცენტრი აშენდება, მოწესრიგდება სატენდერო სიტუაცია,  უნდა შეიქმნას მონაცემთა ბაზა და რაც მთავარია, მოსამზადებელ პერიოდში მნიშვნელოვანია თანამშრომელთა გადამზადება.

_პოპულაციის მართვის ცენტრი დაფარავს გურიას, ქობულეთს  და სავარაუდოდ ფოთსაც.  ეს ცენტრი სრულყოფილად უნდა აშენდეს თავისი კლინიკით, კრემატორიუმით და  სავარაუდოდ სამმილიონნახევრამდე ლარი დაჯდება და სახელმწიფო დააფინანსებს. სტრატეგიის განხორციელების შედეგად, მუნიციპალიტეტი დანერგავს მიუსაფარი ძაღლებისადმი ცივილიზებული მოპყრობის ფორმებს, ამასთან ერთად შეინარჩუნებს საზოგადოებრივ უსაფრთხოებას და შეამცირებს მიუსაფარი ძაღლების უარყოფით გავლენას გარემოზე, _ განაცხადა ნათია ვაშალომიძემ.

მიუსაფარი ძაღლების აღრიცხვის მეთოდის გაცნობა და ქრაუდფანდინგის კომპანიის გამოცხადება წარმოადგინეს “მეიჰიუ საქართველოს” მთავარმა ვეტერინარმა ანა მეცხვარიაშვილმა და ოზურგეთის მიუსაფარ ცხოველების თავშესაფარის ხელმძღვანელმა ქრისტი ორაგველიძემ.

როგორც ანა მეცხვარიაშვილმა აღნიშნა, უნდა მოხდეს ძაღლების 70 პროცენტის სტერილიზაცია, რომელიც ცხოველების რეპროდუქციული კონტროლის სამუდამო გადაწყვეტას გულისხმობს. მან თქვა, რომ  მოხდება ძუ ცხოველების სტერილიზაცია, ხოლო ხვადების _კასტრაცია.

“მეიჰიუ საქართველოს” მთავარი ვეტერინარის თქმით, პროცედურაზე მიყვანილი ყველა ცხოველი გაივლის სამედიცინო შემოწმებას, რათა დარწმუნდნენ, რომ ისინი საკმაოდ ჯანმრთელები არიან, რომ მოხდეს მათზე ოპერირება. მოხდება ძაღლების მოდუნება და ოპერაციის დროს გაუკეთდებათ ანესთეზია. ოპერაციის ჩატარების შემდეგ კი ძაღლები იმავე დღეს დაუბრუნდებიან ჩვეულებრივ მდგომარეობას.