მიუსაფარი ცხოველების თემა ბოლო დროს საკმაოდ აქტუალური გახდა საზოგადოებაში, “გურია ნიუსმა” ჩოხატაურში ჩაატარა ქუჩის გამოკითხვა _ გამოკითხულთა უმრავლესობა ამბობს, რომ ქუჩაში მყოფი ძაღლების ეშინიათ და მთავრობის მხრიდან ამ საკითხზე რეაგირებაა საჭირო.
ხალხის ნაწილის თქმით, ჩოხატაურში ე. წ. “ქუჩის ძაღლები” მომრავლდნენ და საჭიროა მათი აცრა, სტერილიზაცია თუ კასტრაცია, ასევე, კარგი იქნებოდა მათთვის გამოეყოთ ადგილი, სადაც შეძლებდნენ ყოფნას. რამდენიმე მოქალაქე პატრონობს მიუსაფარ ძაღლებს _ აძლევს თავშესაფარს და კვებავს მათ. ასევე, ერთ-ერთი აფთიაქის გვერდით არსებულ შენობაში, ამავე აფთიაქის თანამშრომლებმა მიუსაფარი ძაღლებისთვის ღამის გასათევად დადგეს მუყაოს ყუთები, ჭურჭელი წყლისთვის და საკვებისთვის, ასევე, საჭიროების შემთხვევაში, მკურნალობენ კიდეც მათ.
ქუჩაში, ბევრგან შეხვდებით იარლიყიან ძაღლებს, რაც მათ აცრილობაზე მიანიშნებს, მაგრამ, ზოგი გამოკითხულის თქმით, რეალურად მათ არ ჯერათ, რომ ეს ძაღლები არიან აცრილები და მათი მაინც ეშინიათ. ამიტომ, უმრავლესობა, დაკბენის შემთხვევაში, სამედიცინო დახმარების ცენტრს მიმართავს.
ერთ-ერთი გამოკითხული, რომელიც გვთხოვს, რომ მის სახელსა და გვარს ნუ გავახმოვანებთ, ამბობს, რომ მიუსაფარი ძაღლების მსხვერპლი ცოტა ხნის წინ გახდა:
_ სამსახურიდან სახლში ვბრუნდებოდი. ქუჩაში გადაადგილება საღამოს საათებში, ხან ძალიან გვიანაც მიწევს. ე. წ. “აკაციებთან” ვერ ჩაივლი, იმდენი ძაღლია მუდმივად თავმოყრილი. მანქანას გაედევნენ, ვიფიქრე, გავეპარები-მეთქი, მაგრამ ვერ გადავურჩი მათ რისხვას _ 5 ძაღლი დამესია ერთად. სახეზეც კი ნაკბენი მაქვს. რას აკეთებს იმ დროს ადგილობრივი ხელისუფლება, ან სამსახურები, რომლებსაც ამ პრობლემის მოგვარება ევალებათ? სხედან მაღალ ჯიპებში, ღრუბლებში დაფრინავენ და არ ანაღვლებთ, რა ხდება მიწაზე! _ გვეუბნება გ. გ. და სახეზე იარას გვაჩვენებს.
მიუსაფარი ცხოველების არსებობასა და მათთან დაკავშირებულ პრობლემებზე ჩოხატაურის მუნიციპალიტეტის მერს, დავით შარაშიძეს ვესაუბრეთ:
_ ბატონო დავით, არის თუ არა ჩოხატაურში არსებული მიუსაფარი ცხოველებისთვის ბიუჯეტიდან გამოყოფილი თანხა, რაც უნდა მოხმარდეს მათ სტერილიზაციას, კასტრაციას და აცრას?
_ მიუსაფარი ცხოველები ძალიან დიდი პრობლემაა და ასევე, დიდი გამოწვევაა ჩვენთვის. აღნიშნული მიმართულებით არის გამოყოფილი თანხა, მაგრამ, სამწუხაროდ, ვფიქრობ, რომ შექმნილი მდგომარეობიდან გამომდინარე, ამ თანხის დახარჯვა არ იქნება მართებული, რადგან გურიაში არის კომპანია, რომელსაც შეუძლიათ მიმართონ _ მოვლენ წაიყვანენ მიუსაფარ ძაღლებს, გაუკეთებენ აცრას, კასტრაცია/სტერილიზაციას და უკან დააბრუნებენ. თუმცა, ვფიქრობ, რომ ამით მათი პრობლემა მაინც არ გვარდება და სანამ თავშესაფარი ან რაიმე მსგავსი არ გაკეთდება, ვფიქრობ, რომ ბიუჯეტიდან ნაკლები თანხა უნდა გავიდეს.
_ ხომ არ იგეგმება მათთვის პატარა სახლების დადგმა, როგორც ეს, მაგალითად, ნასაკირალზე გაკეთდა?
_ მიუსაფარი ცხოველებისთვის სახლების დადგმას მივესალმები, მაგრამ ამის გაკეთება ბიუჯეტიდან ვერ მოხდება. საბიუჯეტო დაფინანსებაზე ფიქრი შეგვიძლია ინტერმუნიციპალური თავშესაფრის შექმნით, რომელიც არა მხოლოდ ჩოხატაურს არამედ, მაგალითად, მთლიანად გურიას მოემსახურება, მაგრამ ამ თავშესაფრის გასაკეთებლად ძალიან დიდი ფინანსებია საჭირო. დაფინანსების მოსაპოვებლად უკეთესი იქნება სხვადასხვა პროგრამებში ჩართვა ამ მიმართულებით _ საგრანტო პროექტებს ვგულისხმობ.
_ ე. წ. “დაბირკულ ძაღლებზე” ადამიანების კატეგორია ფიქრობს, რომ მათ რეალურად აცრა არ აქვთ გაკეთებული. თქვენ რას გვეტყვით ამის შესახებ?
_ დაკბენის შემთხვევაში აუცილებლად უნდა მივმართოთ სამედიცინო დაწესებულებას, მაგრამ დარწმუნებით შემიძლია გითხრათ, რომ “ბირკას” ტყუილად არ დაადებენ _ ყველა “ბირკიან” ძაღლს აცრა აქვთ ჩატარებული, _ ამბობს მუნიციპალიტეტის მერი.
ავტორი: მარიამ ცენტერაძე
