საქართველოს პარლამენტის თავმჯდომარეს ირაკლი კობახიძეს გუშინ ,,TV პირველთან“ საუბრისას არ დაუმალავს, რომ ბიძინა ივანიშვილი მმართველი გუნდისთვის საუკეთესო საპრეზიდენტო კანდიდატი იქნებოდა. პარლამენტის თავმჯდომარის განცხადებით, ივანიშვილი ამ ეტაპზე საპრეზიდენტო არჩევნებში მონაწილეობას არ გეგმავს.
,,გამომდინარე იქიდან, რომ ბიძინა ივანიშვილის სურვილი იყო პოლიტიკისგან დისტანცირება, ის, ბუნებრივია, თავად არ განიხილავს თავის ამ პოსტზე, თუმცა შემიძლია გითხრათ, რომ ბატონი ბიძინა იქნებოდა ჩვენთვის საუკეთესო კანდიდატი, გამომდინარე ჩვენი საარჩევნო ამოცანებიდან“,_განაცხადა კობახიძემ.
პარლამენტის თავმჯომარის განცახდება ხომ არ არის ერთგავარი მესიჯი იმისა, რომ მმართველმა გუნდმა საპრეზიდენტო კანდიდატად სწორედ ბიძინა ივანიშვილი წარადგინოს? _ ამ საკითხზე პოლიტიკის ექსპერტს ვახტანგ ძაბირაძეს ვესაუბრეთ.
_ მგონია, რომ ივანიშვილი პრეზიდენტობას არ მოინდომებს. ივანიშვილის პრეზიდენტად მოსვლა ნიშნავს იმას, რომ საქართველო გახდება არაფორმალური საპრეზიდნტო რესპუბლიკა. თუ ივანიშვილს უნდა ხელისუფლებაში და პოლიტიკაში დაბრუნება, ჩემი აზრით, ის პრეზიდენტი კი არ უნდა იყოს, არამედ უნდა გახდეს პრემიერ -მინისტრი და ქვეყანა მართოს ისე, როგორც საჭიროა.
_ ბატონო ვახტანგ, როგორ ფიქრობთ, თავად მმართველ გუნდს რატომ აწყობს ბიძინა ივანიშვილის გაპრეზიდენტება?
_ არ ვარ დარწმუნებლი, რომ მმართველი გუნდისთვის საპრეზიდენტო კანდიდატად ბიძინა ივანიშვილის წარდგენა ძალიან მიმზიდველია. წესით და რიგით, ივანიშვილს თავად არ უნდა უნდოდეს პრეზიდენტობა. გულწრფელად გითხრათ, ძალიან გაოცებული დავრჩები ივანიშვილმა რომ წამოაყენოს კანდიდატურა და გახდეს პრეზიდენტი. ეს რაღაც ახალი, მოულოდნელი და საკმოდ დამაფიქრებელი იქნება. ვთვლი, რომ მისი მხრიდან საპრეზიდენტო არჩევნებში მონაწილეობა ძალიან არასწორი ნაბიჯი იქნება და მივესალმები თუ დაბრუნდება, როგორც პრემიერ-მინისტრი.
