“ლელო -ძლიერი საქართველოს” ლიდერი ჩოხატაურში, მალხაზ ჩხიკვაძე “გურია ნიუსთან” ამბობს, რომ სახელმწიფო რწმუნებულის ცვლილება გურიის რეგიონში და ამას გარდა, ბათუმისა და ქობულეთის მერების გადადგომა “ოცნებაში” წმენდას უკავშირდება.
„მხოლოდ გურიაში არ ხდება გადაადგილებები და ამას ორი მიზეზი აქვს. ერთი მიზეზია შიდაპარტიული კლანებს შორის ბრძოლა და მეორე- მზადება არჩევნებისთვის, რომლის ძალიან ეშინია „ქართულ ოცნებას.“
შიდაპარტიულ ბრძოლაში კობახიძემ მეფის კარზე პირველი ვეზირობისთვის ბრძოლა მოუგო ღარიბაშვილს და ახლა რეგიონებში მიდის მიდის წმენდა და გავლენებისთვის ბრძოლა. გუბერნატორის თანამდებობა ისედაც სიმბოლურია და თვითმმართველობის კუთხით დიდად არც არაფერი შეიცვლება. ეს „ბელადის კარის თამაშები“ ყველაზე მეტად აჭარაში ჩანს, სადაც საღამოს არ იციან, რომ დილას თანამდებობაზე აღარ იქნებიან და გადადგომის შესახებ მოუწევთ განცხადების გაკეთება.
“ოცნების” შიდაგადაადგილებები ძალიან ჰგავს ერთ იგავს, სადაც მუსიკის არმცოდნე ტყის ბინადრებმა ვერნაირად ვერ მოახერხეს მუსიკის დაკვრა, მიხედავად იმისა თუ რომელი სად დაჯდებოდა. საშველად ბულბულსაც მიმართეს და მანაც ზუსტად დაუსვა დიაგნოზი:
“საქმე ის კი არ არის,
სად და როგორ ზიხართო!
ის არის, რომ დამკვრელად
თქვენვე არ ვარგიხართო”
ზუსტად ასეა “ოცნების” საქმე. სახელმწიფოს მართვა არ იციან, მათთვის თავისუფლება და დემოკრატია უცხო ხილია და როგორც არ უნდა გადაადგილდენენ არაფერი გამოუვათ და მაინც მოუწევთ მიტაცებული ძალაუფლების დათმობა”,_ ამბობს მალხაზ ჩხიკვაძე ჩვენთან საუბრისას.
რაც შეეხება მოახლოებულ თვითმმართველობის არჩევნებს, ჯერჯერობით პარტიას განცხადება არჩევნებში მონაწილეობის შესახებ არ გაუკეთებია, თუმცა, მალხაზ ჩხიკვაძე გვეუბნება, რომ “ოცნებას” მოახლოებული არჩევნების ეშინია.
“რაც შეეხება მოახლოებულ არჩევნებს, ყველაზე კარგად თვითონ “ქართულ ოცნებაში” იციან თუ რამდენად მძიმედ აქვთ საქმე, განსაკუთრებით თბილისსა და სხვა თვითმმართველ ქალაქებში. როგორც არ უნდა დამალონ თავიანთი შფოთვა ეს მათ ქმედებებდან ჩანს. ამის ყველაზე მკაფიო დასტურია ის ცვლილებები რაც თვითმმართველოს არჩევნებისთვის გააკეთეს. 1. გაზარდეს მაჟორიტარების რაოდენობა პროპორცულთან შედარებით და 2. მაჟორიტარებისთვის არსებული 40%-იანი ბარიერი გააუქმეს, რადგან მშვენივრად იციან რომ 40%-იანი ბარიერის გადამლახავი მაჟორიტარი კანდიდატების პოვნა ძალიან გაუჭირდებათ. მიუხედავად ამ ცვლილებებისა, მაინც შიში აქვთ და “ოცნების” ლიდერების ომახიანი საუბარის ხანგრძლივობა იქამდე გრძელდება სანამ კამერაა ჩართული.
ოპოზიციურად განწყობილი მოქალაქეების რაოდენობა 2024 წლის არჩვენებშიც აღემატებობადა “ქართული ოცნების” მომხრეების რაოდენობას და ეს უპირატესობა ოპოზიციის სასარგებლოდ კიდევ უფრო გაიზარდა კობახიძის 28 ნოემბრის განცხადების შემდეგ”,_ ამბობს მალხაზ ჩხიკვაძე.
ინფორმაციისთვის, სანამ დედაქალაქსა და სხვადასხვა რეგიონებში საპროტესტო აქციები მიმდინარეობს უცვლელი მოთხოვნებით- დაინიშნოს ახალი საპარლამენტო არჩევნები და გათავისუფლდნენ აქციების პერიოდში დაკავებული პირები, ქვეყანაში თვითმმართველობის არჩევნები ახლოვდება, რომელიც 2025 წლის 4 ოქტომბერს უნდა ჩატარდეს.
ავტორი
