BBC-ის ინფორმაციით, 76 წლის ქალის მგლოვიარეები გაოგნებულები დარჩნენ, როდესაც ქალმა სუნთქვა დაიწყო. შემთხვევა ეკვადორში მოხდა.
როგორც ცნობილია, ქალი გარდაცვლილად საეჭვო ინსულტის შემდეგ გამოაცხადეს.
პარასკევს, დაკრძალვის წინ, ნათესავებმა ნახეს, რომ ის სუნთქავდა.
ქალი ახლა დაბრუნდა საავადმყოფოში ინტენსიური თერაპიის განყოფილებაში და ეკვადორის ჯანდაცვის სამინისტრომ შექმნა კომიტეტი მომხდარის გამოსაძიებლად.
სამინისტროს განცხადებაში ნათქვამია, რომ ქალს დაემართა კარდიორესპირატორული გაჩერება – სუნთქვისა და გულის ფუნქციის დაკარგვა – და არ უპასუხა რეანიმაციაში ექიმების მცდელობას, რომ გადაერჩინათ.
მისი გარდაცვალება მორიგე ექიმმა დაადასტურა.
შვილი, გილბერ როდოლფო ბალბერან მონტოია, მედიასთან ამბობს, რომ დედამისი “მიიყვანეს დაახლოებით 09:00 საათზე და შუადღისას ექიმმა მითხრა, რომ გარდაიცვალა”.
შემდეგ ქალბატონი მონტოია კუბოში მოათავსეს რამდენიმე საათის განმავლობაში, სანამ ოჯახის წევრებმა არ დაინახეს, რომ სუნთქვას ცდილობდა.
სოციალურ ქსელში გამოქვეყნებულ ვიდეოში ჩანს, რომ ის წევს თავახდილ კუბოში და მძიმედ სუნთქავს, მის ირგვლივ კი რამდენიმე ადამიანი იყრის თავს.
შემდეგ ჩანს, რომ მოდიან და აკვირდებიან ქალბატონ მონტოიას, სანამ მას საკაცით და სასწრაფო დახმარების მანქანაში გადაიყვანენ.
ახლა ის იმავე საავადმყოფოში რეანიმაციულ განყოფილებაშია, სადაც ექიმებმა მისი გარდაცვალება გამოაცხადეს.
საინფორმაციო სააგენტო AFP ციტირებს ბ-ნ ბალბერანს: “ნელ-ნელა ვხვდები, რაც მოხდა. ახლა მხოლოდ ვლოცულობ, რომ დედაჩემის ჯანმრთელობა გაუმჯობესდეს. მინდა ის ცოცხალი და ჩემს გვერდით იყოს.”
