ამ წუთებში, თბილისის საქალაქო სასამართლოში ხორავას ქუჩაზე მომხდარი მკვლელობის საქმეზე დაკავებული მიხეილ კალანდიას პროცესი მიმდინარეობს. სასამართლო სხდომა დახურულია. მოსამართლემ შესაბამისი გადაწყვეტილება პროკურატურის მოთხოვნის საფუძველზე მიიღო. დღეს საქმის არსებითი განხილვა დაიწყო.
სხდომის დახურვამდე მიხეილ კალანდიამ სასამართლო პროცესზე განაცხადა, რომ წარდგენილ ბრალდებას არ აღიარებს. მოსამართლის კითხვაზე, დაირღვა თუ არა მისი უფლებები, კალანდიამ აღნიშნა, რომ არ დარღვეულა.
კალანდიას ადვოკატი, ანა კოტეტიშვილი საქმეში მტკიცებულებების არარსებობაზე საუბრობს. კოტეტიშვილი გეგმავს, რომ პატიმრობის შეცვლასთან დაკავშირებით შუამდგომლობის დააყენებს.
“დღეს ბრალდების მხარე თავის შესავალ სიტყვას წარმოადგენს და კონკრეტულად გვეტყვის, თუ რა მტკიცებულებებზე დაყრდნობით აპირებს წარდგენილი ბრალის დადასტურებას, ხოლო დაცვის მხარე ალტერნატივის სახით, რა თქმა უნდა, ბუნებრივია, ჩვენც წარვადგენთ ჩვენს შესავალ სიტყვას. დღეს დეტალურად ვისაუბრებთ იმ გარემოებებზე, თუ რატომ უნდა მიიღოს სასამართლომ გამამართლებელი განაჩენი. ასევე, ვაპირებთ გამოყენებული აღკვეთის ღონისძიების, პატიმრობის შეცვლასთან დაკავშირებით შუამდგომლობის ხელახლა დაყენებას. რაც შეეხება დაცვის ძლიერ არგუმენტებს, არის ის, რომ საქმეში არ არსებობს როგორც არც წერილობითი მტკიცებულებები, არც ნივთიერი მტკიცებულებები, რომელიც წარდგენილი ბრალის დადასტურებაში ბრალდების მხარეს გამოადგებოდა,“ – განაცხადა ადვოკატმა.
გამოძიება მიხეილ კალანდიას დამამძიმებელ გარემოებაში ჯგუფურად განზრახ მკვლელობაში მონაწილეობას ედავება.
