რა იგეგმება მუნიციპალიტეტში _ ჩოხატაური “ქალთა და კაცთა თანასწორობის შესახებ’’ ევროპულ ქარტიას  შეუერთდა

ჩოხატაურის მუნიციპალიტეტი  საქართველოს ადგილობრივ თვითმმართველობათა ეროვნული ასოციაციის (ათეა) მხარდაჭერით, ,,ადგილობრივ ცხოვრებაში ქალთა და კაცთა თანასწორობის შესახებ’’ ევროპულ ქარტიას  შეუერთდა. ხელი დოკუმენტს ჩოხატაურის მუნიციპალიტეტის მერმა, დავით შარაშიძემ მოაწერა. რითაც, როგორც საქართველოს ადგილობრივ თვითმმართველობათა ეროვნული ასოციაციის გვერდზე ვკითხულობთ,  დაადასტურა, გენდერული თანასწორობის პრინციპების დაცვის მზაობა და მხარდაჭერა საკუთარ მუნიციპალიტეტში.  ცნობისთვის, შარაშიძის გარდა, მსგავს დოკუმენტს ხელი მოაწერეს  ზუგდიდის, ზესტაფონის,  სამტრედიისა და ბაღდათის მერებმაც.

რაც შეეხება დოკუმენტზე ხელმოწერის ცერემონიას,  ეროვნული კონფერენციის – ,,გენდერული თანასწორობის დღის წესრიგი ადგილობრივ დონეზე: ძირითადი გამოწვევები და სამოქმედო ნაბიჯები” ფარგლებში გაიმართა, რომელიც საქართველოს ადგილობრივ თვითმმართველობათა ეროვნული ასოციაციის ორგანიზებით, გაეროს ქალთა ორგანიზაციისა და შვეიცარიის განვითარებისა და თანამშრომლობის სააგენტოს მხარდაჭერით მოეწყო.

კონფერენციაზე ასოციაციის ვიცე-პრეზიდენტმა გიორგი ტყემალაძემ, გენდერული თანასწორობის მიმართულებით, მუნიციპალიტეტების მნიშვნელოვან როლზე ისაუბრა და აღნიშნულ პროცესში, ათეას ჩართულობასა და ასოციაციის მიერ განხორციელებულ პროექტებზე გაამახვილა ყურადღება, რომლებიც საერთაშორისო ვალდებულებების შესრულებაზეა ორიენტირებული.

ცნობისთვის, ევროპული ქარტია,  ევროპის რეგიონთა და მუნიციპალიტეტთა საბჭოს (CEMR) მიერ, 2006 წლის მაისში შეიქმნა, მუნიციპალიტეტებში გენდერული ბალანსის დამკვიდრებასა და ქალთა და კაცთა თანასწორობის გასაუმჯობესებლად, საკუთარი იურისდიქციის ფარგლებში, ღონისძიებების გატარებას ისახავს მიზნად.

საქართველოს ადგილობრივ თვითმმართველობათა ეროვნული ასოციაციაში ამბობენ, რომ  ქალებსა და მამაკაცებს შორის თანასწორობა წარმოადგენს ფუნდამეტურ უფლებას და არსებით ფასეულობას ყველა დემოკრატიისათვის. იმისათვის, რომ ეს უფლება რეალიზებულ იქნას, არა მარტო კანონით უნდა იქნას აღიარებული, არამედ ეფექტურად უნდა იქნას გამოყენებული ყველა ცხოვრებისეულ ასპექტში.

უფრო ვრცლად იმის შესახებ თუ კონკრეტულად რა ღონიძიებები გახორციელდება  ჩოხატაურში და რა ვალდებულება აქვს მუნიციპალიტეტს აღებული ჩოხატაურის მერიის ადმინისტრაციის სამსახურის უფროსს, თეა უჯმაჯურიძეს ვესაუბრეთ.

_  ,,ჩოხატაურის მუნიციპალიტეტი, 2023 წლის 9 ოქტომბერს, საქართველოს ადგილობრივ თვითმმართველობათა ეროვნული ასოციაციის (ათეა) მხარდაჭერით, ,,ადგილობრივ ცხოვრებაში ქალთა და მამაკაცთა თანასწორობის შესახებ“ ევროპულ ქარტიას შეუერთდა, რითაც როგორც ხელმომწერმა მუნიციპალიტეტმა აიღო ვალდებულება, ქარტიის ფუნდამეტური პრინციპების პრაქტიკულ განხორციელებასა და ჩოხატაურის მუნიციპალიტეტში ქარტიით გათვალისწინებული ვალდებულებების შესრულებაზე”,_ გვპასუხობს უჯმაჯურიძე.

_ რა მდგომარეობაა დღეის მდგომარეობით,  ჩოხატაურის ადგილობრივ ცხოვრებაში ქალთა და კაცთა თანასწორობის თვალსაზრისით ? ( რა გამოწვევებია, რა კეთდება გამოწვევების აღმოსაფხვრელად? )

_ ჩოხატაურის მუნიციპალიტეტში გენდერულ საკითხებზე სისტემური და საქართველოს პარლამენტის მიერ შექმნილი გენდერული თანასწორობის მუდმივმოქმედ საპარლამენტო საბჭოსთან კოორდინირებული მუშაობის უზრუნველსაყოფად, შექმნილია გენდერული თანასწორობის საბჭო. ასევე განსაზღვრულია გენდერულ საკითხებში პასუხისმგებელი პირი.

გენდერული თანასწორობის საბჭომ, გენდერული თანასწორობის ღონისძიებათა 2022-2023 წლის სამოქმედო გეგმის ფარგლებში, უზრუნველყო შემდეგი ღონისძიებების განხორციელება:

– სოფლებში ქალთა საინიციატივო ჯგუფების შექმნა და მათი ხელშეწყობა;

– ჩოხატაურის მუნიციპალიტეტში ფოკუს ჯგუფებთან კვლევის ჩატარების თემატიკის შერჩევა, რომლის ფარგლებშიც ჩატარდა შეზღუდული შესაძლებლობის მქონე პირების დედების საჭიროებათა კვლევა;

– შემუშავდა საბიუჯეტო ინიციატივები და წარედგინა მუნიციპალიტეტის მერიას, რომლის მიხედვით, სტატუსის მქონე მარტოხელა მშობლების ყოველთვიური ფულადი დახმარება განისაზღვრა 100 ლარის ოდენობით, შშმ პირთა დედების ეკონომიური გაძლიერების მიზნით მათი მცირე ბიზნეს იდეების დაფინანსება – 5000 ლარით და  ქალთა ეკონომიკური გაძლიერების მიზნით კონკურსის ჩატარება და გამარჯვებული პროექტის დაფინანსება- 5000 ლარით;

– საბჭომ დაიწყო საქველმოქმედო კამპანია-აქცია „თაობები ერთმანეთისთვის“, რომელიც უწყვეტად მიმდინარეობს;

– ჩატარდა საბჭოს გასვლითი სხდომა მაღალმთიან სოფელში – ჩხაკაურაში, მოხდა გენდერული და სოციალური პროგრამების გაცნობა ადგილობრივი ქალებისთვის, პროფესიული განათლების ხელმისაწვდომობისა და სხვა მნიშვნელოვანი ინფორმაციების გავრცელება, შეიქმნა ქალთა საინიციატივო ჯგუფი;

– 2023 წლის 20 ივლისს გენდერული საბჭოს ინიციატივით, საკრებულოსა და მერიის მხარდაჭერით ჩატარდა ქალთა ფორუმი-„ქალები ცვლიან…“,  ასევე მოეწყო ადგილობრივ შემოქმედ ქალთა ნამუშევრების გამოფენა-გაყიდვა.

– ასევე წარდგენილ იქნა ინიციატივა მუნიციპალიტეტის ბიუჯეტში გენდერული თანასწორობის ხელშეწყობის პროგრამის და კოდიფიკაციის შესახებ და 2023 წლის ბიუჯეტში გენდერული თანასწორობის ხელშეწყობას აქვს ცალკე საბიუჯეტო კოდი, რომელშიც ასახულია სამოქმედო გეგმით გათვალისწინებული ყველა ღონისძიება და შესაბამისი ფინანსური რესურსი.

_ რა შეიძლება შეიცვალოს ევროპულ ქარტიაში მუნიციპალიტეტის შესვლის შემდეგ? რა მოლოდინები გაქვთ?

_ რაც შეეხება სამომავლო გეგმებს:

მუშავდება 2024-2025 წლების გენდერული თანასწორობის ღონისძიებათა გეგმა;

მიმდინარეობს მზადება, ძალადობის წინააღმდეგ ბრძოლის კვირეულის (25 ნოემბერი – 10 დეკემბერი) ჩასატარებლად;

მუნიციპალიტეტი და გენდერული თანასწორობის საბჭო აგრძელებს მუშაობას გენდერული მეინსტრიმინგის მიმართულებით.

და რაც მთავარია: ჩოხატაურის მუნიციპალიტეტმა ადგილობრივ ცხოვრებაში ქალთა და მამაკაცთა თანასწორობის შესახებ“ ევროპული ქარტიის მოთხოვნათა შესაბამისად, უნდა დანერგოს ქარტიით გათვალისწინებული ვალდებულებები. უნდა შემუშავდეს თანასწორობის სამოქმედო გეგმა და შესაბამისი პროგრამები, სათანადო ფინანსური და ადამიანური საშუალებებით და მათი განხორციელებისთვის საჭირო რესურსით, რომელიც აუცილებელ ინსტრუმენტს წარმოადგენს ქალებსა და მამაკაცებს შორის თანასწორობის გასაზრდელად.