არაბეთის გაერთიანებული საემიროების პრეზიდენტის ოფიციალური ვებგვერდი mohamedbinzayed.ae საქართველოს პრემიერ-მინისტრის ირაკლი კობახიძის არაბეთის გაერთიანებულ საემიროებში ვიზიტის შესახებ ინფორმაციას აქვეყნებს.
„არაბეთის გაერთიანებული საემიროების პრეზიდენტი, მისი აღმატებულება შეიხ მოჰამედ ბინ ზაიდ ალ ნაჰიანი შეხვდა საქართველოს პრემიერ-მინისტრს ირაკლი კობახიძეს, რომელიც სამუშაო ვიზიტით იმყოფება არაბეთის გაერთიანებულ საემიროებში.
კასრ ალ შატიში შეხვედრისას მისმა უმაღლესობამ საქართველოს პრემიერ-მინისტრს, საქართველოსა და მის ხალხს წინსვლა და კეთილდღეობა უსურვა.
ორმა ლიდერმა განიხილა არაბეთის გაერთიანებულ საემიროებსა და საქართველოს შორის თანამშრომლობის გაღრმავების გზები, როგორიცაა ინვესტიციები, ვაჭრობა, ეკონომიკა, სოფლის მეურნეობა, განახლებადი ენერგია, გარემო და მდგრადობა _ ეს სექტორები, ორი ერის ერთობლივი განვითარების პრიორიტეტების ნაწილია.
მათ, ასევე, გაცვალეს მოსაზრებები რამდენიმე რეგიონულ და გლობალურ საკითხზე, განსაკუთრებით მშვიდობის, უსაფრთხოების, სტაბილურობისა და განვითარების ხელშეწყობის საკითხებზე.
მისმა უმაღლესობამ შეიხმა მოჰამედ ბინ ზაიდ ალ ნაჰიანმა კიდევ ერთხელ დაადასტურა არაბეთის გაერთიანებული საემიროების ერთგულება სხვა ქვეყნებთან ძლიერი პარტნიორობის განვითარების მიმართ, მათ შორის, ისეთ სფეროებში, რომლებიც ხელს უწყობს ურთიერთგანვითარებას.
მისმა უმაღლესობამ ხაზი გაუსვა ორ ქვეყანას შორის ყოვლისმომცველი ეკონომიკური პარტნიორობის შეთანხმებას (CEPA), რომელიც ძალაში შევიდა გასულ წელს, როგორც მთავარ ეტაპს ორი ქვეყნის ეკონომიკურ თანამშრომლობაში და ხაზს უსვამს არაბეთის გაერთიანებული საემიროების ვალდებულებას, განახორციელოს თავისი მიზნები საერთო განვითარებისთვის.
საქართველოს პრემიერ-მინისტრმა მადლობა გადაუხადა მის უმაღლესობას თბილი დახვედრისთვის და ხაზი გაუსვა საქართველოს ერთგულებას არაბეთის გაერთიანებულ საემიროებთან თანამშრომლობის გაღრმავების პროცესში, საერთო ინტერესების წინსვლის, მდგრადი ეკონომიკური ზრდისა და კეთილდღეობის მხარდასაჭერად.
ორივე მხარემ გამოთქვა რწმენა, რომ არაბეთის გაერთიანებული საემირო-საქართველოს ურთიერთობები უფრო მყარად მომავალში გაგრძელდება.
მისმა აღმატებულებამ შეიხმა მოჰამედ ბინ ზაიდ ალ ნაჰიანმა და საქართველოს პრემიერ-მინისტრმა ხელი მოაწერეს საქართველოში განვითარების პროექტების დასანერგად ინვესტიციების შესახებ ურთიერთგაგების მემორანდუმს.
მემორანდუმს ხელი მოაწერეს, აგრეთვე, მისმა აღმატებულებამ მოჰამედ ალაბარმა, Eagle Hills Abu Dhabi-ს დირექტორთა საბჭოს თავმჯდომარემ, ხოლო ქართული მხრიდან მისმა აღმატებულებამ, საქართველოს პირველმა ვიცე პრემიერმა და ეკონომიკისა და მდგრადი განვითარების მინისტრმა ლევან დავითაშვილმა, მისმა აღმატებულებამ, აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ, რამდენიმე ოფიციალური პირის თანდასწრებით“, _ იუწყება mohamedbinzayed.ae.
