გურიაში არსებული ეპიდემიოლოგიური ვითარება – არ არის მოსალოდნელი ახალი შეზღუდვების დაწესება რეგიონში?_ „გურია ნიუსის“ ამ კითხვის საპასუხოდ ლაივ ბრიფინგზე დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ განაცხადა, რომ თუ შეზღუდვების დაწესება არ გვინდა, პანდემიის გავრცელების თავიდან ასარიდებლად ეპიდემიოლოგების მიერ გაცემული წესების დაცვა უნდა მოხდეს.
„ასეთი მიკრო შეზღუდვები შესაძლოა იყოს. თუ არ გვინდა შეზღუდვები უნდა დავიცვათ წესები“,_ განაცხადა იმნაძემ.
დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ კი აღნიშნა, რომ კოვიდინფექციის მართვის პოლიტიკა შეიცვალა გაზაფხულის მერე. ფართომასშტაბიანი ჩაკეტვა მოსალოდნელი არ არის, მაგრამ წერტილოვანი შეზღუდვების დაწესება ყველგანაა მოსალოდნელი, სადაც ამის აუცილებლობის საკითხი დადგება.
„კოვიდინფექციის მართვის პოლიტიკა შეიცვალა გაზაფხულის მერე. დღეს უკვე გავითავისეთ რომ ერთ და ორ თვეში ინფექციას ვერ გავაქრობთ და უნდა ვისწავლთ მასთან ერთად, ამიტომ ფართომასშტაბიანი შეზღუდვები არა, მაგრამ წერტილოვანი შეზღუდვები ყველგან იქნება საჭიროების შემთხვევაში“,_ განაცხადა გამყრელიძემ.
შეგახსენებთ, რომ დაბა ლაითურში გადაადგილება ამ დრომდე შეზღუდულია. მოსახლეობა თვითიზოლაციაში იმყოფება და მათ მდგომარეობას ეპიდემიოლოგები აკვირდებიან.
