EURONEWS-ის ინფორმაციით, სოციალურ მედიაში პოპულარული გახდა ვიდეო, სადაც ჩანს თურქი დაქირავებულები, რომლებიც რუსეთის სასარგებლოდ აპირებენ ბრძოლას უკრაინასთან ომში.
“ჩვენ მოვდივართ ალაჰის დახმარებით. ჩვენ გვაქვს ჩვენი დროშა… ჩვენ წავალთ და დავბრუნდებით ალაჰის დახმარებით”, – ამბობს ვიდეოში მამაკაცი, რომელსაც თურქული დროშა აქვს მიმაგრებული ტყვიაგაუმტარ ჟილეტზე.
ვიდეოში მეორე პიროვნებას ხელში თურქეთის დროშა უჭირავს და მის ფორმაზე თურქული და რუსული დროშებია გამოსახული.
ასო ‘Z’ ჩანს რუსეთის დროშაზე – სიმბოლო რუსეთის მიერ უკრაინაში შეჭრისა, რაც მიუთითებს იმაზე, რომ ვიდეო ბოლოდროინდელია.
კლიპი პირველად ორშაბათს გამოაქვეყნა პრორუსულმა ტელეგრამის არხმა, სადაც ნათქვამია, რომ “თურქი ლეგიონერები შეუერთდნენ რუსეთის ჯარს და მონაწილეობას მიიღებენ უკრაინაში მიმდინარე საბრძოლო ოპერაციებში”.
მაგრამ ვიდეომ უფრო დიდი ყურადღება მიიქცია, როდესაც Nexta-მ გააზიარა.
ისმის კითხვა, მართლა იგზავნებიან თუ არა თურქი დაქირავებულები უკრაინაში რუსეთის მხარეს საომრად?
Euronews-ის თურქულენოვანი სამსახურის ჟურნალისტებმა დაადასტურეს, რომ მამაკაცები საუბრობენ თურქულ დიალექტზე, მაგრამ არ არიან თურქეთიდან.
ამ დიალექტსა და ზოგიერთ რუსულ სიტყვას შორის შერევა მიანიშნებს იმაზე, რომ ეს კაცები, სავარაუდოდ, აჰისკა თურქები არიან (ასევე ცნობილი როგორც მესხი თურქები).
უმცირესობებისა და ძირძველი ხალხების მსოფლიო დირექტორიის მიხედვით, თურქ-მესხი თურქები ცხოვრობდნენ თურქეთ-საქართველოს საზღვართან და 1944 წელს იოსებ სტალინმა გადაასახლა ცენტრალური აზიის საბჭოთა რესპუბლიკებში, როგორიცაა უზბეკეთი და ყაზახეთი.
1989 წლის ივნისში უზბეკეთში თურქ აჰისკებს თავს დაესხნენ უზბეკები, რის შედეგადაც 100-ზე მეტი დაიღუპა. საბჭოთა ჯარებმა კი რუსეთში გადაასახლეს 87000-ზე მეტი აჰისკა თურქი.
ბევრი მათგანი მას შემდეგ გადავიდა აზერბაიჯანში, საქართველოში, ყაზახეთსა და რუსეთში, მათ შორის ჩრდილოეთ კავკასიაში (როგორიცაა ჩეჩნეთი და ჩრდილოეთ ოსეთი).
Euronews ესაუბრა საზღვარგარეთ აჰისკის თურქების წარმომადგენელს, რომელმაც დაადასტურა, რომ ვიდეოში გამოსახული მამაკაცები აჰისკის დიალექტზე საუბრობენ.
მას მიაჩნია, რომ ესენი არიან რუსეთში მცხოვრები მამაკაცები და ამიტომ არიან მობილიზებულები უკრაინაში საომრად.
მან ასევე განმარტა, რომ რადგან აჰისკა თურქები თავს თურქებად თვლიან, ამიტომაც ჩანს, რომ ჯარისკაცები თურქეთის დროშას აფრიალებენ ვიდეოში.
ამას გამოეხმაურა ჩრდილოეთ კავკასიაში მცხოვრები ჟურნალისტი ალიკ პუჰატიც.
„ჩვენ გვყავს ოსეთში მცხოვრები თურქ-მესხების პატარა თემი და ისინიც ისევე იყვნენ მობილიზებული, როგორც ყველა“, – განუცხადა მან Euronews-ს.
ორი კვირის წინ ალიკ პუჰათიმ გამოაქვეყნა ფოტოები, რითაც ამტკიცებდა, რომ ოსეთში მობილიზებულთა შორის იყო თურქი აჰისკა.
ვიდეოში გამოსახული ჯარისკაცების მსგავსად, მამაკაცს ასევე აქვს ინსიგნია, რომელზეც გამოსახულია თურქული დროშა, ასო “Z” , ოსეთის დროშის მაღლა.
ოსეთის სამხედრო კომისარიატის მოადგილის ინფორმაციით, უკრაინაში საბრძოლველად 400-ზე მეტი კაცია მობილიზებული. მიზანი ოსეთის რეგიონში კიდევ 1000-ის გაწვევაა.
InformNapalm, ინტერნეტ მცოდნეთა საერთაშორისო თანამეგობრობა, ამტკიცებს, რომ მათ დაადგინეს ვიდეოში გამოსახული ერთ-ერთი მამაკაცი, რომელიც ამბობს, რომ ის ცხოვრობს პროხლადნიში, ჩრდილოეთ კავკასიის რეგიონში და არის აჰისკის თურქი.
აქედან გამომდინარე, ნაკლებად სავარაუდოა, რომ ეს კაცები იყვნენ არა თურქი დაქირავებულები, არამედ რუსეთში მცხოვრები ეთნიკური უმცირესობები, რომლებიც მობილიზებულნი იყვნენ უკრაინაში საბრძოლველად.
