მეცნიერებს მიაჩნიათ, რომ რაც უფრო მეტ ენერგიას ხარჯავს ადამიანი მრისხანებასა და სიბრაზეზე, მით უფრო ცუდად გრძნობს თავს.
მრისხანება – ეს გახლავთ მდგომარეობა, როცა ადამიანი ემოციურად გაუწონასწორებელია, რასაც ორგანიზმი, როგორც სტრესს, ისე აღიქვამს, ხოლო სტრესი ის ერთ-ერთი მთავარი მიზეზია, რომელიც მთელ რიგ დაავადებებს იწვევს.
მეცნიერებმა დაამტკიცეს, რომ მრისხანების ხშირი გამოვლინება გულის დაავადებებისა და ინსულტის რისკს ზრდის, აგრეთვე ხელს უშლის ჭრილობების სწრაფ შეხორცებას და იმუნურ სისტემას აქვეითებს.
გამოკვლევების შედეგად დადგინდა, რომ თუ ადამიანი წარსულში ჩადენილ შეცდომებს ხშირად სიბრაზით იხსენებს, ეს ტვინის ნეირონების ურთიერთქმედებაზე აისახება, გულისცემის რიტმი იზრდება, მასთან ერთად, იმატებს არტერიული წნევა, კუნთებს სისხლის ნაკადი გაძლიერებულად მიეწოდება, სისხლში შაქრის შემცველობა მატულობს და ბოლოს დამატებითი რაოდენობის ადრენალინი გამოიყოფა. ერთი სიტყვით, ორგანიზმი ბრძოლისთვის ემზადება.
იშვიათ სტრესულ სიტუაციაში, სადაც საჭიროა სწრაფი რეაქცია და მყისიერი მოქმედება, მაშინ ეს ნამდვილად გამოგვადგება, მაგრამ, თუ ორგანიზმი ასეთ მდგომარეობაში დიდი ხნის მანძილზე და ხშირად ხვდება, ის აუცილებლად დაუძლურდება და გამოიფიტება. ასე რომ, თუ თქვენ სიბრაზე დიდ ხანს მიგყვებათ, ამით მხოლოდ საკუთარ თავს ვნებთ.
ავტორი
