გუშინ, ფეხბურთში ევროპის ჩემპიონთა ლიგის კიდევ ერთი განმეორებითი ნახევარფინალური შეხვედრა გაიმართა. მადრიდში „ატლეტიკომ“ თანაქალაქელ „რეალს“ უმასპინძლა. მეტოქეების პირველი მატჩი „სამეფო კლუბის“ დამაჯერებელი გამარჯვებით დასრულდა – 3:0.
გუშინდელი შეხვედრა დიეგო სიმეონეს გუნდმა აღმაფრენით დაიწყო და სენსაციის მოხდენასთან ახლოს იყო. მეოცე წუთისთვის „ატლეტიკო“ უკვე 2:0-ს იგებდა და ორი მატჩის ჯამში წონასწორობის აღსადგენად ერთი გოლი ესაჭიროებოდა. მათდა სამწუხაროდ მეტის გაკეთება ვერ მოახერხეს, პირიქით, ტაიმის დასასრულს საკუთარ კარში ბურთი მიიღეს. საბოლოოდ „ატლეტიკომ“ 2:1 გაიმარჯვა, რაც ფინალში გასასვლელად საკმარისი არ გამოდგა.
ევროპის ჩემპიონთა ლიგის მიმდინარე გათამაშების გადამწყვეტ შეხვედრას, 3 ივნისს, ქალაქი კარდიფი უმასპინძლებს. მიმდინარე სეზონში როგორც „რეალი“, ასევე „იუვენტუსი“ შესანიშნავ თამაშს უჩვენებენ. ალბათ ეს ის შემთხვევაა როდესაც გამარჯვებულის წინასწარ დასახელება საკმაოდ რთულია. ფაქტია, 3 ივნისს დიდი საფეხბურთო საღამო გველის.
დღეს ევროპის ლიგის ორი განმეორებითი ნახევარფინალი გაიმართება. ჟოზე მოურინიოს „მანჩესტერ იუნაიტედი“ ესპანურ „სელტას“ უმასპინძლებს. ამ გუნდების პირველი შეხვედრა ინგლისური კლუბის გამარჯვებით დასრულდა – 1:0.
ლიონში ადგილობრივი გუნდი ამსტერდამია „აიაქსს“ მიიღებს და ურთულესი ამოცანის გადაჭრას შეეცდება. პირველ მატჩში ჰოლანდიურმა გუნდმა დამაჯერებლად იმარჯვა – 4:1.
გუშინ იაპონიაში ჩატარდა რაგბიში 2019 წლის მსოფლიო თასის გათამაშების წილისყრა. საქართველოს ნაკრები D ჯგუფში მოხვდა. მისი მეტოქეები იქნებიან ავსტრალია, უელსი, ოკეანეთის შესარჩევი ჯგუფის გამარჯვებული და ამერიკის კონტინენტის მეორე გუნდი. სავარაუდოდ ეს გუნდები ფიჯი და კანადა ან აშშ იქნებიან.
რა თქმა უნდა ურთულეს ქვეჯგუფში ავღმოჩნდით. „ბორჯღალოსნებს“ ავსტრალიასთან და უელსთან უმძიმესი ბრძოლების გადატანა მოუწევთ. რასაკვირველია მეტოქეთა სიძლიერისაგან გამომდინარე მათი დამარცხება რთული იქნება. სამაგიეროდ დანარჩენ ორ მეტოქესთან წარმატებაზე ფიქრი შეიძლება და იმედია მათთან შერკინებებს ჩვენს სასარგებლოდ დავასრულებთ.
მიმდინარე წლის 8-30 აგვისტოს საქართველო ხელბურთში 19-წლამდელთა ვაჟთა მსოფლიო პირველობას უმასპინძლებს. გუშინ შვეიცარიის ქალაქ ბაზელში, ხელბურთის საერთაშორისო ფედერაციის ოფისში ამ შეჯიბრების წილისყრა გაიმართა. საქართველოს ნაკრები B ჯგუფში მოხვდა. მისი მეტოქეები იქნებიან გერმანია, ისლანდია, ჩილე, იაპონია და ალჟირი.
გუშინ მილანის „ინტერი“ მთავარი მწვრთნელის გარეშე დარჩა. არადამაკმაყოფილებელი შედეგების გამო კლუბის ხელმძღვანელობამ თანამდედობიდან გაათავისუფლა „ინტერის“ ამჟამინდელი მთავარი მწვრთნელი სტეფანო პიოლი. მის ნაცვლად დროებით სტეფანო ვეკი დაინიშნა.
ცნობილია რომ „ინტერს“ ლონდონის „ჩელსის“ დამრიგებელი ანტონიო კონტეს გადმობირება სურს. კულუარული ცნობით, იტალიის ეროვნული გუნდის ყოფილი თავკაცი ისტორიულ სამშობლოში დაბრუნებაზე თანახმაა. გუშინ გავრცელდა ცნობა რომ ლონდონური გუნდის ხელმძღვანელობას კონტეს დაკარგვა არ სურს და უახლოეს დღეებში მას, ახალ, გაუმჯობესებულ კონტრაქტს შესთავაზებს.
