“მთავრობას რომ სჭირდება, ვეხმარებით, ახლა თავად დაგვეხმაროს!”

პირველ აპრილს, ოზურგეთის მუნიციპალიტეტის სოფელ წითელმთაში მოსახლეობის წარმომადგენლებმა საპროტესტო აქცია გამართეს. პროტესტი მდინარე ბჟუჟიდან ინერტული მასალის ამოღებას უკავშირდება, რაც ერთნაირად აზიანებს, როგორც მდინარის კალაპოტს, ისე  ეკოლოგიას. ამან საფრთხე შეუქმნა მდინარე ბჟუჟზე აგებულ ხიდს, რომელიც ორ სოფელს _ წითელმთას და მაკვანეთს ერთმანეთთან აკავშირებს.

_ 70 ტონა ტვირთი გადააქვთ მანქანებს. ნახეთ, რას ჰგავს ხიდის ზედაპირზე ასფალტის საფარი. ეს ბზარები ერთი კიდიდან მეორემდე გასდევს. აწი ახალ ხიდს ვინ აგვიშენებს?! რაც გვაქვს, იმას გვანგრევენ თავზე! გზა არ გადაგვიკეტავს, აქციას ვაწყობთ, რომ მოგვხედონ და ძალიან ნუ გაგვამწარებენ, თორემ ამასაც ვიზამთ. უნებართვოა ეს კარიერები, ვინაა პატრონი? მერმა არ იცისო, გუბერნატორმა არ იცისო, აბა, ვინ იცის?! ყველამ იცის და არავინ ხმა არ იღებს. მოგვაშორეთ ეს მანქანები და ეს ხალხი აქედან, _ ამბობენ წითელმთის მკვიდრები: გია და გოჩა მიმინოშვილები, ელგუჯა ვანიძე, ავთო თოდრაძე, დათო ჩხაიძე, გოჩა მუჯირი და სხვები.

აქციის მონაწილეებმა კატეგორიულად მოითხოვეს ბჟუჟის ხეობის ნაკრძალად გამოცხადება.

_ ბჟუჟიდან გააქვთ ეს ქვა-ღორღი, დაშრა ჭები, მთას ძირი გამოუთხარეს. მალე სასაფლაოსაც წაიღებს მდინარე. იმდენს იზამენ, ამ ხიდსაც გამოუთხრიან ძირს და ჩავარდება. საფლავის ძირის გამოთხრა სად გაგიგიათ?! რაღაცამ ხომ უნდა შეგაშინოს, რაღაცას ხომ უნდა მოერიდო? სასწრაფოდ უნდა შეჩერდეს აქ კარიერების მუშაობა. ყველაფერს აქვს საზღვარი. არ გავატარებთ აქ ამ მანქანებს! _ ბრაზობდნენ აქციის მონაწილეები.

კოტე თოდრაძე, წითელმთის მკვიდრი: _ ინერტული მასალა სჭირდება გზების თუ სხვა მშენებლობებს _ ეს ყველას ესმის. ძლივს გვეღირსა გზა და მოსპეს ისევ ამ მძიმე გამავლობის მანქანებმა. ჯერ ის თუ იციან, რომ ზღვიდან 20-25 კილომეტრის მანძილზე ინერტული მასალის აღება არ შეიძლება?! გადაშენდა ძირძველი კალმახი მდინარეში. ჭებში რომ წყალი ქრება, ვტყუით? გუშინ ოთხი მანქანა იყო ამოსული. უსაშველო დატვირთული გავიდა. ორი მასეთი გავლა მოსპობს გზას. როგორმე უნდა შეჩერდეს ეს განუკითხაობა, _ გვითხრა მან.

აქციაზე ოზურგეთის მუნიციპალიტეტის მერიის წარმომადგენლები მივიდნენ.

_ მთავრობას რომ სჭირდება, გვერდით ვუდგავართ, ვეხმარებით, ახლა თავად დაგვიდგნენ გვერდით და დაგვეხმარონ. დაგვეხმარონ, თორემ ცუდია ხალხის ბუნტი, იცოდეთ! _ თქვა წითელმთის მკვიდრმა გია მიმინოშვილმა.

ოზურგეთის მუნიციპალიტეტის მერიის ეკონომიკური განვითარების და ქონების მართვის სამსახურის სპეციალისტმა ბუნებრივი რესურსების სარგებლობის საკითხებში, ირინა ინარიძემ “გურია ნიუსთან” ასეთი კომენტარი გააკეთა:

_ ჩვენ მოვუსმინეთ მოსახლეობის წარმომადგენლებს და მათ გვერდით ვდგავართ. დავგეგმეთ შეხვედრა და შევჯერდებით, დავიცავთ მათ ინტერესებს.