მწვანე კორიდორი გაიხსნა – სუმის ოლქიდან მშვიდობიანი მოსახლეობის ევაკუაცია იწყება. ამის შესახებ უმაღლესი რადა საკუთარ facebook გვერდზე ავრცელებს ინფორმაციას, რომ პოლტავიდან სუმის ოლქში 35 ავტობუსი მიდის _ ავტობუსებს წითელი ჯვრის წარმომადგენლები და ექიმები მიჰყვებიან. ასევე, ოლქში იგზავნება 20 ტონა ჰუმანიტარული დახმარება _ საკვები და მედიკამენტები.
როგორც რადას განცხადებაშია აღნიშნული, ეს ფაქტი ოფიციალურად დაამტკიცა რუსეთის თავდაცვის სამინისტრომ წითელი ჯვრის საერთაშორისო კომიტეტისთვის გაგზავნილ წერილში.
ჰუმანიტარული დერეფნის მოქმედების ვადა დილის 9 საათიდან საღამოს 9 საათამდეა.
,,შესაბამისად, როგორც წითელ ჯვარს, ასევე, ჩვენ, როგორც მხარე, ვისთანაც შეთანხმებული იქნა ჰუმანიტარული დერეფნის გახსნა, გვაქვს დოკუმენტური მტკიცებულება
ჰუმანიტარული დერეფნის ერთი მარშრუტია ხალხის ევაკუაციისთვის: სუმი, ჰოლუბივკა, ლოხვიცია, ლუბნი, პოლტავა. სხვა მარშრუტები არ იყო შეთანხმებული.
ჩვენ უკვე გვაქვს ინფორმაცია, რომ რუსული მხარე ჰუმანიტარული დერეფნების მუშაობის ჩაშლას გეგმავს. მარშრუტთან მანიპულაციები მზადდება, რათა აიძულონ ხალხი სხვა გზით წავიდნენ. არ არის შეთანხმებული და არ არის უსაფრთხო“, _ წერია განცხადებაში.
ასევე უკრაინის რადა რუსულ მხარეს მოუწოდებს, რომ დაპირება შეასრულოს.
შესაბამისი კოლონების გადაადგილებისთვის ყველა დაბრკოლება უნდა მოიხსნას მთელი მარშრუტის გასწვრივ – როგორც ქალაქ სუმის დატოვებული ადამიანებისთვის, ასევე ქალაქ სუმიში მიტანილი ჰუმანიტარული საქონლისთვის.
ჰუმანიტარული საქონლის კოლონა გადავა ქალაქ სუმის მიმართულებით მარშრუტის გასწვრივ: ლოხვიცია, ანდრიაშივკა, რომნი, ნედრიჰაილივი, სუმი.
ჰუმანიტარული დერეფნის მარშრუტის გასწვრივ ცეცხლის რეალური შეწყვეტა იქნება ევაკუაციის შესაძლებლობის შესახებ საზოგადოების ინფორმირების საფუძველი.
ცნობისთვის, რუსეთ-უკრაინის მოლაპარაკებების მე-3 რაუნდის შემდეგ უკრაინის პრეზიდენტის მრჩეველმა, მიხაილო პოდოლიაკმა თქვა, რომ შეხვედრაზე ჰუმანიტარული კორიდორის ლოჯისტიკის გაუმჯობესების თვალსაზრისით გარკვეული პოზიტიური წინსვლები იყო.
ჰუმანიტარული დერეფნებისა და მშვიდობიანი მოსახლეობის ევაკუაციის საკითხი 3 მარტის შეხვედრაზეც განიხილეს. რუსეთმა სიჩუმის რეჟიმი 5 მარტს გამოაცხადა, თუმცა უკრაინელი თანამდებობის პირების ინფორმაციით, ოკუპანტებმა შეთანხმება დაარღვიეს და ჰუმანიტარულ დერეფნები დაბომბეს, რის გამოც ხალხის ევაკუაცია შეჩერდა.
