რუსეთში რამდენიმე დღის წინ დაწყებული ფეხბურთელთა მსოფლიო პირველობა ჯერჯერობით სერიოზული ექსცესების გარეშე მიმდინარეობს. ჩემპიონატი ძალ-ღონეს იკრებს და უკვე რამდენიმე შესანიშნავი შეხვედრა ვიხილეთ. დაფიქსირდა ერთი მოულოდნელი შედეგიც, არგენტინის ეროვნულმა გუნდმა ისლანდიის დამარცხება ვერ შეძლო.
ბრიტანული გამოცემა “დეილი მეილის“ ჟურნალისტმა რობერტ ჰარდმანმა მსოფლიოს ამჟამინდელი პირველობა, მისი ორგანიზატორები, ასე ფიფა-ს მაღალჩინოსნები დაუფარავად გააკრიტიკა. რობერტმა „მუნდიალი -2018“ 1936 წელს ნაცისტურ გერმანიაში ჩატარებულ ზაფხულის ოლიმპიურ თამაშებს შეადარა. ჩვენი ბრიტანელი კოლეგის მტკიცებით 1936 წელს გამართული ოლიმპიური თამაშები ადოლფ ჰიტლერისა და მისი ნაცისტური იდეების დაუფარავ პროპაგანდას ეწეოდა. ანალოგიური რამ ამჟამად რუსეთშიც ხდება, ოღონდ ჰიტლერის ადგილი ვლადიმერ პუტინს უკავია.
„რუსეთში მიმდინარე მსოფლიო პირველობა ერთ დიდ პოლიტიკურ ცირკს მაგონებს. რომ დავფიქრდი არაერთი მსგავსება აღმოვაჩინე 1936 წელს გერმანიაში გამართულ ზაფხულის ოლიმპიურ თამაშებთან. იქ ყველაფერი ადოლფ ჰიტლერის პროპაგანდას ემსახურებოდა, აქ კი ვლადიმერ პუტინის კულტის ზღვარგადაცილებულ რეკლამას ვხვდებით“. – განაცხადა რობერტ ჰარდმანმა.
ორი დღის წინ რუსულ მასმედიაში საინტერესო ინფორმაცია გაჟღერდა. მსოფლიო პირველობის დაწყებამდე რამდენიმე დღით ადრე რუსეთის შინაგან საქმეთა სამინისტრომ ქვეყნის ყველა რეგიონში განლაგებულ პოლიციის განყოფილებებში საიდუმლო ბრძანება დააგზავნა. მისი არსი იმაში მდგომარეობს რომ ჩემპიონატის მიმდინარეობის დღეებში რუსეთის პოლიციის ქვეგანყოფილებებმა დაფიქსირებული დამნაშავეობის სტატისტიკა და შემთხვევები არ უნდა გამოაქვეყნოს. რუსი ჟურნალისტების მტკიცებით თუ ამ დღეებში სხვადასხვა რეგიონების შინაგან საქმეთა სამიბისტროს ვებგვერდებს ესტუმრებით იქ მხოლოდ რამდენიმე „უბრალო“ შემთხვევას წააწყდებით. მაგალითად უსახლკარო ლეკვების პოვნისა ან რამდენიმე ბომჟის დაკავების ფაქტებს. ჟურნალისტების გამოთვლებით, მსოფლიო პირველობის დაწყებამდე საშუალოდ ერთი კვირის განმავლობაში შინაგან საქმეთა სამინისტროს ოფიციალურ ვებგვერდზე დაახლოებით1400 კრიმინალური შემთხვევის ფაქტი იდებოდა. მსოფლიო პირველობის დაწყებამდე ბოლო შვიდ დღეს მათი რაოდენობა 20-ჯერ შემცირდა.
გამოცემა „ნეზავისიმაისა გაზეტას“ ჟურნალისტები კრასნოდარის ერთ-ერთ პოლიციის განყოფილებას დაუკავშირდნენ. პოლიციელებმა დაუდასტურეს რომ მოსკოვიდან საიდუმლო მითითება მიიღეს რომ მსოფლიო ჩემპიონატის დღეებში კრიმინალური სტატისტიკა არსად არ გამოაქვეყნონ.
რუსები დროებით დამნაშავეობას „ხელოვნურად ამცირებენ“, მაგრამ ამ სახის ფაქტები მაინც ხდება, უფრო მეტიც, დაკავებულთა შორის ფეხბურთის უცხოელი გულშემატკივრებიც არიან.
რუსეთში პირველი დაპატიმრებული უცხოელი მოქალაქე 40 წლის პერუელი ქალბატონი აღმოჩნდა. სამხრეთამერიკელი დიაცი რუსეთს პერუს ეროვნული გუნდის საგულშემატკივროდ თანამემამულეების ერთ ჯგუფთან ერთად ეწვია. პერუს ნაკრები გუშინ მორდოვას დედაქალ სარანსკში დანიის ეროვნულ გუნდს ხვდებოდა. სამწუხაროდ ეს გულშემატკივარი მას ვერ დაეწრო, რადგან ჯერ კიდევ მოსკოვში ყოფნისას „მოახერხა“ და მავანი რუსეთის მოქალაქის საფულე მოიპარა. ამჟამად „დოყლაპია ქურდი – გულშემატკივარი“ მოსკოვში, ცნობილ პეტროვკა 38-ში განთავსებულ საგამოძიებო იზოლიატორში იმყოფება. რუსული მხარე პერუს საელჩოს უკვე დაუკავშირდა და „რეციდივისტს“ სამშობლოში იძულებითი ექსტრადაცია ემუქრება.
ზემოთნახსენებ ქალბატონს არ გაუმართლა და რუსი სამართალდამცველების კლანჭებში აღმოჩნდა. უფრო ბედნიერ ვარსკვლავზე დაბადებული ინგლისის ნაკრების ყოფილი კაპიტანი ტერი ბუტჩერი აღმოჩნდა. მისტერ ტერი მოსკოვში იმყოფებოდა. ინგლისის ნაკრები პირველობის სასტარტო შეხვედრას18 ივნისს ვოლგოგრადში ჩაატარებს. სერ ტერის თავისუფალი დრო გამოუჩნდა, თავდაპირველად მოსკოვის ღირთშესანიშნაობები დაათვალიერა, შემდეგ კი ერთ-ერთ ადგილობრივ რესტორანს ეწვია. სადილად შემწვარი კარტოფილი და ბოსტნეულის სალათი შეუკვეთა. როდესაც დანახარჯის გასტუმრების დრო მოვიდა აღმოაჩინა რომ დამატებით კეტჩუპის ღირებულებაც უნდა გადაეხადა, არადა ის მენიუში შეტანილი არ გახლდათ. „განრისხებულმა“ ყოფილმა ფეხბურთელმა კეტჩუპის ფასის გადახდაზე მტკიცე უარი განაცხადა, ოფიციანტმა და რესტორნის მთავარმა მენეჯერმაც უკან არ დაიხიეს და პოლიცია გამოიძახეს. ბოლოსა და ბოლოს ბუტჩერის ყოფილმა ფეხბურთელობამ გაჭრა და პოლიციის განყოფილებაში გადაყვანას გადაურჩა. ინგლისის ნაკრების ყოფილი კაპიტანი რუსეთში მყოფ თანამემამულეებს აფრთხილებს რომ ადგილობრივ რესტორნებში კეტჩუპის მოთხოვნისაგან თავი კატეგორიულად შეიკავონ, რადგან საკმაოდ ძვირი, დაახლოებით 2-3 ფუნტი სტერლინგი ღირს.
