მზოვრეთის მამათა მონასტერი საზოგადოებაში გავრცელებული ცრუ ინფორმაციის და მომლოცველების მიერ მონასტერში ქცევის წესების არ ცოდნასთან დაკავშირებით განცხადებას ავრცელებს.
როგორც მზოვრეთის მამათა მონასტერი აცხადებს, რომ გარკვეულ ადგილებში თაფლის და სხვა საეკლესიო ნივთების მონასტრის სახელით გაყიდვა მიმდინარეობს, მაგრამ მონასტერს აღნიშნულთან კავშირი არ აქვს.
მონასტერი ასევე განმარტავს, რომ მზოვრეთის მამათა მონასტერს არანაირი კავშირი არ აქვს ტაქსებთან, რომლებიც მომლოცველებს მონასტერში აყვანას გარკვეულ საფასურის სანაცვლოდ სთავაზობს.
„მონასტერში მოვიდა ინფორმაცია, რომ ჩვენი მონასტრის სახელით გარკვეულ ადგილებში იყიდება თაფლი, ხატები და სხვა საეკლესიო ნივთები; მომლოცველებისგან ასევე ხშირდ ისმის კითხვები ჩვენს მონასტერთან მდგარ ტაქსებთან და მათ ტარიფებთან დაკავშირებით.. გაცნობებთ, რომ ჩვენი მონასტერი არ ყიდის არანაირ საეკლესიო ნივთს, არც თაფლს და არც სანთელს; მონასტერს არავითარი კავშირი არ აქვს პირებთან, რომლებიც, გარკვეული საფასურის სანაცვლოდ, მომლოცველებს ჩვენს მონასტერში აყვანას სთავაზობენ; ღვთისა და ღვთისმოყვარე ხალხის წყალობით ჩვენს მონასტერს არ აქვს იმის აუცილებლობა, რომ ხორციელი თუ სხვა საჭიროებისათვის თავისი ხელსაქმე გაყიდოს, ამიტომაც მიგვაჩნია, რომ ამ მდგომარეობაში, ჩვენი მხრიდან რამე დამატებით შემოსავალზე ზრუნვა-უმადურობა და სიხარბე იქნება ღვთის წინაშე; ჩვენ ამაში ღვთის კურთხევასა და მოწოდებას ვხედავთ- „ნუ ზრუნავთ“ მიწიერისათვის, არამედ „ეძიეთ პირველად სასუფეველი ღვთისა და სიმართლე მისი და ეს ყოველივე შეგემატებათ თქვენ““;- და ამის თვალსაჩინო დასტური თვალწინ გვაქვს- შემოსავლისთვის არ გვიზრუნია და უმთავრესს – სულიერ საქმიანობას არ მოვწყვეტილვართ და ღვთის წყალობით ათიოდე წელიწადში ნანგრევებში და მიწაში ჩაფლული ადგილი ლამაზ ციხე-მონასტრად იქცა, რომელიც ალბათ არ შევცდებით თუ ვიტყვით, რომ-) ყოველი მორწმუნისა და ქართველის გულს ახარებს და ღვთის სადიდებლად აღძრავს“,_ ნათქვამია მზოვრეთის მამათა მონასტრის მიერ გავრცელებულ განცხადებაში.
მონასტერი ასევე მოლოცვასთან დაკავშირებულ პრობლემებზე საუბრობს და მწუხარებას გამოთქვამს, იმის გამო, რომ მომლოცველთა უმრავლესობამ მონასტერში ქცევის წესები არ იცის.
„მონასტერი მიესალმება ყველა იმ მორწმუნეს ვინც წრფელად, ღვთისა და ეკლესიის სიყვარულით მოდის მონასტრის მოსალოცად, ვისაც ესმის თუ რა და რისთვის არის მონასტერი, გვწამს და ვიცით, რომ ღმერთი მათი კრძალვისა და რწმენისაებრ მიაგებს მათ, მეორე მხრივ ვწუხვართ, რომ მომლოცველთა დიდი უმრავლესობისთვის მონასტერში ქცევის ელემენტარული წესების შეხსენება გვიწევს, ვფიქრობთ, რომ მართლმადიდებლურ ქვეყანაში არ უნდა გვიწევდეს მომლოცველებისთვის იმის ახსნა, რომ მთვრალები არ უნდა მოვიდნენ, რომ ქალბატონებმა თავშლები უნდა დაიფარონ, რომ არ იხმაურონ, რომ მონასტრის წევრებს შეურაცხყოფა არ მიაყენონ.
ვწუხვართ იმაზე, რომ მომსვლელთა უმეტესობა მონასტერს აღიქვამს როგორც ტურისტულ ზონას, როგორც ლამაზი სურათის გადასაღებ ადგილს და არა როგორც ღვთის სახლს და როგორც სიწმინდეს“,_ ნათქვამია განცხადებაში.
მზოვრეთის მამათა მონასტერი მომლოცველებს სთხოვს გაგებით მოეკიდონ მონასტრის თხოვნებს და ასევე, მომლოცველებისგან შენდობას ითხოვს.
„მონასტერი შენდობას სთხოვს ყველა იმ მომლოცველს, რომელსაც დიდი ხანი უწევს რიგში დგომა მონასტრის მოსალოცად და რომელსაც შიგნით შესულს მალევე სთხოვენ იქაურობის დატოვებას – და გთხოვთ რომ გაგვიგოთ-მონასტრის შიდა სივრცე პატარაა, მომლოცველები კი ბევრნი, ამიტომაც იძულებულნი ვართ ასე მოვიქცეთ, შენდობას გთხოვთ იმისთვისაც, რომ ხშირად და მკაცრად მოგიწოდებთ წესრიგისკენ- სხვაგვარად მონასტერი ვერ შეძლებს არსებობას, შენდობას გთხოვთ იმისთვისაც თუ რამდენიმე ათას ადამიანთან ურთიერთობით დაღლილებს რამე შეგვეშალა- არ გვაქვს ილუზია რომ წმინდანები ვართ, მაგრამ გვერწმუნეთ, ნამდვილად ვშრომობთ იმისათვის, რომ განვიწმინდოთ და ღმერთს სათნო ვეყოთ. გაგვიხარდება, თუ ამაში ცოტა თქვენც დაგვეხმარებით და გაგებით მოეკიდებით ჩვენს თხოვნებს“,_ ნათქვამია მზოვრეთის მამათა მონასტრის მიერ გავრცელებულ განცხადებაში.
