გურიის მდინარეების ხეობებში არსებულ კარიერებზე, ინერტული მასალების მომპოვებელი კომპანიების, უმეტესად, მტაცებლურ, ხეობების გამანადგურებელ და კალაპოტების ამაოხრებელ მუშაობაზე, “გურია ნიუსი” არაერთხელ წერდა.
ადგილობრივი მოსახლეობის წარმომადგენლები, ასევე, ეკოდამცველები, პროტესტს გამოთქვამენ და ხაზგასმით აღნიშნავენ, რომ ისინი არ ეწინააღმდეგებიან აღმშენებლობას, ქვიშა-ხრეშის მოპოვებას, რომელიც ნატანის სახით მდინარეს მუდამ ჩამოაქვს და აუცილებელიცაა კალაპოტების მათგან გათავისუფლება.
_ თუმცა, ის, რაც კარიერებზე ხდება, არის ვანდალიზმი, რომელსაც დასასრული არ უჩანს. ხომ არაერთხელ გავაპროტესტეთ? რამდენი აქცია ჩავატარეთ? მობრძანდით და ნახეთ პირდაპირ ქურდობაზე გადასული კომპანიები, მდინარე სუფსის სანაპირო როგორ გახდა უნაპირო. ხეობაში თავად გაიყვანეს ელექტროხაზები და ახლა გადამცემი ბოძები, რომლებიც მალე პირდაპირ წყალში ჩაცვივდება, ალბათ. საყანეებს ლუკმასავით “სანსლავენ”. ზამთარია, თოვლი დევს მიწაზე და ალბათ, ფიქრობენ, ახლა ნაკლებად მოგვაკითხავენ და დაგვინახავენო და მოსწრებაზე არიან, _ ამბობენ “გურია ნიუსთან” სატელეფონო საუბრისას სოფელ სილაურის მცხოვრებლები.
28 იანვარს, არასამთავრობო ორგანიზაცია “ეკოს” წარმომადგენლებთან ერთად, ჩვენ სუფსის ხეობის იმ მონაკვეთში მივედით, სადაც ერთ-ერთი კომპანია “სამი ძმა” მუშაობდა.
ადგილზე მართლაც საშიში ვითარება დაგვხვდა. სუფსა თითქმის უნაპირო მდინარედ არის ქცეული და თანდათან ტერიტორიის სიღრმეში მიიწევს. ჩაქცეულია სანაპირო ზოლის ყველა მონაკვეთი. მაგალითისთვის ვიტყვით, რომ გასული წლის გაზაფხულსა და ზაფხულში რაც ვნახეთ, მდინარის გასწვრივ, ის ტერიტორია აღარ არსებობს. კალაპოტდაკარგული მდინარე სიღრმეშია შესული.
ყველაზე მთავარი კი მდინარის კალაპოტში უნებართვოდ მომუშავე კომპანიის ქმედებაა _ როგორც გვითხრეს, ის ლიცენზიით გათვალისწინებული კონტურების მიღმა გადის და გამუდმებით გააქვს ინერტული მასალა.
ექსკავატორი, რომელიც მდინარის კალაპოტში მუშაობდა, ადგილზე მისული ჩვენი ჯგუფის დანახვისას, ტრაქტორისთვის დაუჯერებელი სისწრაფით გაიჭრა მდინარის სიღრმეში და ახალ ადგილზე დაიწყო ხრეშის მოგროვება. მოზრდილი გორაც მალე “დადგა”. მემანქანეც, ეტყობოდა, საგანგებოდ იყო წინასწარ გაფრთხილებული, თუ ვინმე გამოჩნდებოდა, სასწრაფოდ დაბრუნებოდა ლიცენზიით განკუთვნილ კონტურებში არსებულ სივრცეს.
არასამთავრობო ორგანიზაცია “ეკოს” წარმომადგენელმა ირმა გორდელაძემ გარემოს დაცვის გურიის რეგიონის სამსახურში დარეკა.
ამჯერად, წარმომადგენლებს ადგილზე მოსვლა არ დაუგვიანებიათ.
მათ მოსვლამდე კი გავარკვიეთ, რომ სუფსის კარიერზე, კომპანია “ნატა 2000”-ის ლიცენზიით შპს “სამი ძმა” მუშაობს.
“ნატა 2000”-ის ერთი ლიცენზიას (#10000689) მოქმედების ვადა ამ წლის 28 აპრილს ეწურება. ხოლო მეორე ლიცენზიას (#10000659) გასული წლის დეკემბერში გაუვიდა.
_ ჩვენ ვიცით, შესწავლილი გვაქვს მოქმედი ლიცენზიის კონტურები. ამ წუთს ისინი სუფსის ხეობაში იპარავენ, სრული ამ სიტყვის მნიშვნელობით, წიაღს. ეს არის სახელმწიფო ქონების ქურდობა. ასევე, კონტურებს მიღმა, მდინარის კალაპოტს ულმობლად აოხრებენ, _ თქვა “გურია ნიუსთან” ირმა გორდელაძემ.
ადგილზე მოსულმა გარემოს დაცვის წარმომადგენლებმა, კარიერზე მომუშავე ექსკავატორისა და სატვირთო მანქანების მუშაობის შეჩერება მოითხოვეს. მათ დააფიქსირეს, რომ კომპანიის ტექნიკა კონტურებს მიღმა მუშაობდა.
_ ჩვენ რა ვქნათ? რიგითი ადამიანები ვართ, მძღოლები. ვმუშაობთ, გადაგვაქვს ხრეში. მეტი არაფერი ვიცით, _ თქვეს გაჩერებული სატვირთო ავტომანქანების მძღოლებმა.
“გურია ნიუსი” “ენერგო პრო ჯორჯიას” ოზურგეთის სერვისცენტრის მენეჯერს, გია ნაკაიძეს დაუკავშირდა და მდინარის ნაპირის გასწვრივ მდებარე, ელექტრო გადამცემი ბოძების საშიშ მდგომარეობაზე ჰკითხა:
_ გეტყვით, რომ სოფელ სილაურში, სუფსის ხიდის მარჯვენა მხარეს მდებარე მონაკვეთზე და მდინარის გასწვრივ არსებული სადენები ჩვენს კომპანიას არ ეკუთვნის. იქ, როგორც ვიცი, გახსნილი იყო ქვის სამტვრევი პატარა ქარხანა, “დრაბილკას” რომ ეძახიან. ამჯერად მუშაობს თუ არა, არ ვიცი. ჩვენთან არ არის აღრიცხვაზე. ყოველ შემთხვევაში, ეს ბოძები და ხაზები ჩვენ არ გვეკუთვნის, _ გვითხრა ნაკაიძემ.
მდინარე სუფსის არსებულ კარიერზე, კონტურებს მიღმა უნებართვოდ მომუშავე შპს “სამი ძმის” წინააღმდეგ, როგორც მოგვიანებით გვითხრეს, გარემოს დაცვის წარმომადგენელთა მიერ, 28 იანვარს მომხდარ ფაქტზე, აღიძრა ადმინისტრაციული საქმის წარმოება.
_ ჩვენ, როგორც თავად ნახეთ, ფაქტზე დავიჭირეთ ეს კომპანია. ის საკმაო მანძილით იყო გამცდარი თავისი ლიცენზიის კონტურებს. ღიად იპარავდა ინერტულ მასალას, სახელმწიფოს პარავს, თითოეულ ჩვენგანს პარავს. ვნახოთ, რას მოიმოქმედებს გარემოს დაცვის ზედამხედველობის დეპარტამენტი. დაველოდებით პასუხს, _ გვითხრა ირმა გორდელაძემ.
კომპანია “სამი ძმის” ხელმძღვანელს, კახა ჩხარტიშვილს “გურია ნიუსი” დაუკავშირდა. მან ჩვენთან ასეთი კომენტარი გააკეთა:
_ გულახდილად გეტყვით, რომ ეს არის მართლაც პირველი შემთხვევა, როცა ჩვენი ექსკავატორით მუშაობდა ერთ-ერთი ჩვენი მეგობარი. შინაური ადამიანია, ჩვენთან მუშაობს. კომპანია იმ დღეს საერთოდ არ მუშაობდა. იმ დღეს მე ეკლესიაში ვიყავი. ოპერატორიც არ იყო ადგილზე. 450 ათასი კბმ. მასალა უნდა ამოვიღოთ და 28 აპრილამდე აქვს ვადა ლიცენზიას, რა ძალა მადგას? არავითარი საჭიროება ამისა არ არის და რომც იყოს, ბოლოს და ბოლოს, ვთხოვდი ვინმეს. ახალ ვიცი, რომ შედგა შესაბამისი აქტი, აღიარა იმ ადამიანმა, რომ კონტურს მიღმა გავიდა და დააჯარიმებენ. ვიმეორებ, არ მქონდა ამის არც აუცილებლობა, არც საჭიროება და იმასაც ვამბობ, რომ ასეთ ქმედებას კარიერზე ადგილი არ ექნება მომავალში, _ გვითხრა კახა ჩხარტიშვილმა.
თავის მხრივ, “ეკოს” თავმჯდომარე, ირმა გორდელაძე ამბობს, რომ კონტურებს მიღმა შეპარვა და მუშაობა, პირველად არ ხდება და რომ ეს მასალის უკანონოდ მოპოვების ნაცადი ხერხია:
“სოფელ სილაურის სიახლოვეს, მდინარე სუფსის აღნიშნულ კალაპოტში, წიაღის ეროვნულ სააგენტოს, შვიდი ლიცენზია ჰქონდა გაცემული. წიაღის მოპოვებას არავინ ეწინააღმდეგება. ჩვენ ვეწინააღმდეგებით აოხრებას, ჰექტრობით დაჭაობებულ ფართობებს, უამრავი საყანე ფართობის დაკარგვას, იავარქმნილ გზებს, რაც ამახინჯებს ჩვენი გარემოს იერსახეს და გვიქმნის ეკოლოგიური კატასტროფის საფრთხეს. უახლოეს დღეებში ყველა მოქმედ კარიერს მოვინახულებთ. კანონის ფარგლებში, ლიცენზიის მიხედვით განსაზღვრულ კონტურებში უნდა მოხდეს წიაღის მოპოვება. კონკრეტულ პირებს კი რიყეში მილიონების მოპოვება სურთ ამ ქვიშა-ხრეშით. არ დავანებებთ!” _ თქვა “გურია ნიუსთან” ირმა გორდელაძემ.
[sexy_author_bio]
