25 თებერვალს, დილით, ოზურგეთში, გოგებაშვილის ქუჩის ბოლოში, მოსახლეობის წარმომადგენლებმა აქცია გამართეს. როგორც აქციის მონაწილეები ამბობენ, გოგებაშვილისა და ბარათაშვილის ქუჩის კვეთაზე, ბოლო რვა წლის განმავლობაში ითხოვენ დაზიანებული წყალსადენი მილის გაკეთებას, რომელიც, მათივე თქმით, დაზიანებულია და ადგილზე სულ ტბა დგას. იქვეა საკანალიზაციო ჭა, რომელიც ხშირად იჭედება; მერე ფეკალური მასა და სასმელი წყალი ერთმანეთს ერევა და ხალხი ამ წყალს სვამს ისე, რომ არც კი იცის, რას სვამს.
_ მიწაში გვერდი-გვერდ მყოფი ამ ორი კომუნიკაციის _ სასმელი წყლის მილის დაზიანება და კანალიზაციის ჭის ზოგჯერ გაჭედვა იწვევს წყლის და ფეკალიების ერთმანეთში არევას. წვიმიან ამინდში უფრო დიდი გუბეები დგება. ეს მუდმივად ასეა. აქვეა საკანალიზაციო ჭა, რომელიც სულ არა, მაგრამ არის შემთხვევები, იჭედება. გადმოსული ბინძური მასა კი აქვე, გახეთქილი მილიდან გამომდინარე წყალს ერევა. ადვილი მისახვედრია, ეს სიბინძურე ხვდება წყლის მილში და ნახევარი ქალაქი ხშირად სიცოცხლისთვის საშიშ წყალს სვამს.
გასულ წელს ორჯერ მივმართეთ მუნიციპალიტეტის მერიას. ბოლოს ოქტომბერში შევიტანეთ განცხადება. მუნიციპალიტეტის მერი შარაშენიძე შეგვპირდა, რომ დაგვეხმარებოდა საკითხის მოგვარებაში და დაავალებდა სერვისცენტრს საკითხის მოწესრიგებას. მერე გადავამოწმეთ და ვნახეთ, რომ სერვისცენტრში ეს განცხადება ოპერატიულად იყო გადაგზავნილი, თუმცა, არანაირი რეაგირება არ მოჰყოლია. შეგვპირდნენ მხოლოდ, გაგიკეთებთო და მეტი არაფერი, _ გვეუბნება გოგებაშვილის ქუჩის მცხოვრები ზაურ რუსიეშვილი.
_ ერთხელ პირდაპირ ასფალტი ჩაასხეს შიგ. ცოტა ხანს იყო ასე, მერე კი ამოხეთქა ისევ. სერვისცენტრის ამჟამინდელმა უფროსმა დაპირება იცის, მეტი არაფერი. ამდენი წელია ვწვალობთ. ახლა გადავკეტეთ ქუჩა, დავაწყეთ “ბეტონი”. მოვიდნენ და ნახონ, _ ერთმანეთს არ აცლიდნენ საუბარს აქციის მონაწილეები.
აქციის მონაწილეებთან მალე მოვიდა ოზურგეთი-ჩოხატაური-ლანჩხუთის წყალმომარაგების გაერთიანებული სერვისცენტრის უფროსი დავით ცერცვაძე, რომელმაც განაცხადა, რომ ჯერ დანიშნული არ არის ამ თანამდებობაზე. თუმცა, მისი დანიშვნის შესახებ ინფორმაცია ოფიციალურად ერთი კვირის წინ გავრცელდა.
ადგილზე მივიდა ახლანდელი თუ უკვე გათავისუფლებული უფროსი გიორგი ჩხაიძე, რომელმაც, ასევე, განაცხადა, რომ მიდის და მალე ახალმა ხელმძღვანელმა უნდა გააკეთოს ეს საქმე:
_ აგერ არის კაცი, რომელიც აწი იქნება თქვენი უფროსი. ხომ იძახით, ვერ აკეთებო და შენი არ გვჯერაო, ეს გააკეთებს, _ მიუთითა ჩხაიძემ ცერცვაძეზე, _ მე გითხარით, ამინდი როგორც კი გამოვა, დავიწყებთ,-მეთქი… _ მიმართა მან აქციის მონაწილეებს.
_ბატონო გიორგი, ეს ადამიანები ამბობენ, რომ ნოემბერში მიმართეს მერიას და განცხადებაც ოპერატიულად გადმოგეგზავნათ. ნოემბრის მერე ამინდი ვერ შეარჩიეთ?
_ იცით, რაშია საქმე?! აქ ბევრი კომუნიკაციაა _ ქსელები, ფოსტა, გაზგაყვანილობა. ყველაფერ ამას შეთანხმება უნდა, სათითაოდ უნდა შეათანხმო ყველა სამსახურთან, რომ მუშაობა დავიწყოთ. აწი გაკეთდება.
_ აქამდე რატომ ვერ მოახერხეთ ეს?
ამჯერად “გურია ნიუსის” კითხვას ჩხაიძემ არ უპასუხა.
თითქმის იგივე გაიმეორა დავით ცერცვაძემ:
_ ჯერ მე დანიშნული არ ვარ. თუმცა, დღესვე მაინც არ დაიწყება ამის გაკეთება, რადგან ყველასთან შეთანხმებაა საჭირო. ხედავთ აგერ, “დენის კიოსკი” დგას. მიწის ქვეშ არის წყლის, კანალიზაციის, ფოსტის კომუნიკაციები. ერთადაა თავმოყრილი ყველაფერი ეს ამ გზაჯვარედინზე. ამას კი დრო სჭირდება. მე რა გითხრათ? ჯერ დანიშნული არ ვარ, _ არაერთხელ გაიმეორა ცერცვაძემ.
გოგებაშვილის ქუჩის მცხოვრებმა ალიკა კოსტავამ საყვედურით მიმართა სერვისცენტრის ახლანდელ ხელმძღვანელს, გიორგი ჩხაიძეს:
_ მსახიობ კახი კავსაძის არ იყოს _ გვეშველება რამე? რა გააკეთე?! სულ გვატყუებ! არ გვჯერა ამ კაცის. წავიდეს და თუ ახალიც არაა დანიშნული, მაშინ ჩვენ _ ხალხი გადავწყვეტთ, რა როგორ უნდა გაკეთდეს, _ თქვა მან.
აქციის მონაწილეებმა ჩხაიძე გოგებაშვილის ქუჩის ბოლოში, სხვა ადგილზე დაზიანებული მილების სანახავად წაიყვანეს, სადაც ბევრგან ასფალტის საფარი აყრილია, რაც ისედაც დაზიანებული მილების კიდევ უფრო მწყობრიდან გამოსვლას უწყობს ხელს. როგორც ქუჩის მცხოვრებლები ამბობდნენ, არ დაიშლებოდნენ, სანამ არ მიიღებდნენ დამაიმედებელ პასუხს.
მოგვიანებით ჩვენ ისევ დავუკავშირდით გოგებაშვილის ქუჩის მცხოვრებლებს.
როგორც ქუჩის ერთ-ერთმა მცხოვრებმა ზაურ რუსიეშვილმა გვითხრა, აქციის მონაწილეები და გაერთიანებული სერვისცენტრის მოქმედი და მომავალი უფროსები შეთანხმდნენ, რომ ამინდის გაუმჯობესებისთანავე შეუდგებიან მუშაობას და რამდენიმე დღეში მოაწესრიგებენ წყალგამტარი მილების პრობლემას.
აღნიშნულ პრობლემასთან დაკავშირებით კომენტარისთვის “გურია ნიუსი” ოზურგეთის მუნიციპალიტეტის მერიას დაუკავშირდა. როგორც მერიის პრესსამსახურიდან მოწოდებულ წერილში ვკითხულობთ, მერიამ გოგებაშვილის ქუჩის მცხოვრებთა განცხადების მიღებისთანავე აღნიშნული წყალგაყვანილობის მილის შეკეთების თაობაზე მიმართა გაერთიანებული სერვისცენტრის დირექტორს, გიორგი ჩხაიძეს, რომ გაეთვალისწინებინა მოსახლეობის ინტერესები და დაეწყოთ მილის შეკეთების სამუშაოები.
როგორც აქციის მონაწილეებმა მოგვიანებით შეგვატყობინეს, მოსახლეობამ წყალმომარაგების გაერთიანებული სერვისცენტრიდან პრობლემის უახლოეს დროში მოგვარების პირობა მიიღეს.
“გურია ნიუსი” დააკვირდება ამ პრობლემის მოგვარების პროცესს.
