გუშინ, ხვიჩა კვარაცხელიას „ნაპოლიმ“ იტალიის“ სერია A“-ს მეშვიდე ტურში სტუმრად „ლეჩე“ იოლად დაამარცახა – 4:0.
ქართველმა თავდამსხმელმა ისევ კარგად ითამაშა და საგოლე პასი მიითვალა. „ნაპოლი“ მე-16 წუთზე ლეო ოსტიგორმა დააწინაურა, რაც ჯარიმას მოჰყვა, რომელიც ხვიჩამ მოიპოვა. პირველ ტაიმში ქართველს ორჯერ შეეძლო გატანა, მაგრამ ორჯერვე ბურთი კარს ააცილა.
51-ე წუთზე კი ხვიჩამ შესანიშნავი საგოლე გადაცემა მიითვალა, როდესაც შორეულ ძელთან ვიქტორ ოსიმენს ჩაუწოდა და ნიგერიელმაც თავით გაიტანა. ოსიმენმა მხოლოდ მეორე ტაიმი ითამაშა, ხვიჩა კი 58-ე წუთზე შეცვალეს. გუნდის ლიდერებისთვის მცირე სათამაშო დროის მიცემა ამჯერად ნამდვილად როტაციით იყო განპირობებული, რადგან სამ დღეში „ნაპოლი“ „რეალს“ დაუპირისპირდება.
88-ე წუთზე ჯანლუკა გაეტანომ სხვაობა სამამდე გაზარდა, ხოლო მსაჯის მიერ კომპენსირებულ დროში გაეტანომ პენალტიც მოიპოვა, რომელიც გოლად მატეო პოლიტანომ აქცია და საბოლოო ანგარიში დააფიქსირა.
„ნაპოლიმ“ ამ გამარჯვებით 14 ქულა დააგროვა. მომდევნო ტურში, 8 ოქტომბერს, „ფიორენტინას“ უმასპინძლებს, მანამდე კი ჩემპიონთა ლიგაზე მადრიდის „რეალს“ ასევე შინ სამ ოქტომბერს დაუპირისპირდება.
იტალიურმა მედიამ ქართველი ფეხბურთელის თამაში შემდეგნაირად შეაფასა.
Tuttomercatoweb 6.5 ქულა – „ჩაწოდება ოსიმენზე, რომელიც საგოლე პასად იქცა, არის ცისარტყელა, რომელიც თავისი მარჯვენა ფეხით დახატა. კიდევ ერთი პასუხი მათ, ვინც ამბობდა, რომ მან თამაში მარტში შეწყვიტა“.
Sportmediaset 6.5 ქულა – „პირველი ტაიმისა და რამდენიმე გამონათების შემდეგ, მეორე ტაიმის სტარტზე იდეალური საგოლე პასი გაუკეთა ოსიმენს. შესანიშნავი ჩაწოდება, რომლის შემდეგ ნიგერიელს უბრალოდ ბურთი ბადეში ჰქონდა გადასაგზავნი“.
Calcionapoli1926 7 ქულა – „ცოცხალი სტარტი „უდინეზესთან“ მატჩის კვალდაკვალ. 55 წუთი მაღალ დონეზე და დიდებული საგოლე პასი ოსიმენზე“.
Calciomercato.it 7.5 ქულა – “იცავს, ქმნის და ასრულებს. მას გოლი დააკლდა, მაგრამ ერთ საათში ყველაფერი გაიღო. ოსიმენზე პასი კი იმდენად გემრიელია, რომ მას ჩვენგან მატჩის საუკეთესო ფეხბურთელის ჯილდო ერგო“.
Tuttonapoli 7 ქულა – „უდინეზესთან“ გოლმა დაამშვიდა და კვარა ნელ-ნელა თავის საფირმო სტილში თამაშობს. ოსიმენზე ასისტი, რომლითაც წარსულშიც გამოუწვევია აღფრთოვანება, ჩვეული განსაცვიფრებელი სილამაზით გამოირჩევა“.
Calciomercato.com 7 ქულა – „ფლანგზე თავისი მომაჯადოებელი მოქმედებით ბრუნდება, ოსიმენზე საგოლე პასი ულამაზესია“.
გუშინ, ვეტერანმა იტალიელმა ფეხბურთელმა ანტონიო კასანომ ვიქტორ ოსიმენის სკანდალის შესახებ ისაუბრა. კასანოს აზრით, ამ ყველაფერზე პასუხისმგებელი აურელიო დე ლაურენტისია, ხოლო ოსიმენმა ნეაპოლელებთან კონტრაქტი არ უნდა გაახანგრძლივოს და კლუბიდან უფასოდ წავიდეს.
„40 წლის ვარ და ცხოვრებაში პირველად ვნახე, რომ კლუბმა თავის ფეხბურთელს გაცუდებული პენალტის გამო დასცინა. კიდევ უფრო მძიმეა ის განცხადება, რომელიც კლუბმა გამოაქვეყნა და ფეხბურთელს ბოდიშს არ უხდის, უბრალოდ ამბობს, რომ ოსიმენი შეურაცხყოფილი არ უნდა იყოს, რადგან კლუბმა ზაფხულში 1000 წინადადება უარყო. დე ლაურენტისმა უნდა აიღოს პასუხისმგებლობა იმ კატასტროფაზე, რომელიც მან გამოიწვია! სწორი იქნება, თუ ოსიმენი მომავალ წელს ნაპოლიდან თავისუფალი აგენტის სტატუსით, უფასოდ წავა“, – განაცხადა ანტონიო კასანომ.
რამდენიმე დღის წინ, „ნაპოლის“ TikTok-ზე ოსიმენის შესახებ ვიდეო გამოქვეყნდა, რომელიც მალევე წაშალეს, მაგრამ ფეხბურთელმა ეს უარყოფითად მიიღო და კლუბს სასამართლოში ჩივილით დაემუქრა. თავის მხრივ, კლუბმა ვიქტორს ბოდიში არ მოუხადა, მაგრამ განაცხადა, რომ ვიდეოს მიზანი ოსიმენის შეურაცხყოფა ან დაცინვა არ იყო.
ავტორი
