ცნობილია რომ იტალია ევროპის 2032 წლის ჩემპიონატს მიიღებს. დღეისათვის ვიცით რომ ტურნირს სამი ქალაქი – რომი, ტურინი და მილანი უმასპინძლებს.
თუმცა, იტალიამ და უეფამ სხვა ქალაქებიც უნდა შეარჩიონ. ერთ-ერთი ვარიანტია ნეაპოლი, მაგრამ პრობლემა “სტადიო მარადონაა”, რომელსაც მასპინძლობის კრიტერიუმების დასაკმაყოფილებლად აუცილებლად რეკონსტრუქცია სჭირდება.
გუშინ, გამოცემამ „Il Mattino“ გაავრცელა ცნობა, რომ კლუბმა და ქალაქის მერიამ დაიწყეს მოლაპარაკებები სტადიონის რეკონსტრუქციაზე. ჯერჯერობით, უცნობია დეტალები, მაგრამ თუ სტადიონზე სარემონტო სამუშაოები დაიწყება, ნაპოლის დროებით შეიძლება სხვა ქალაქში მოუწიოს საშინაო შეხვედრების ჩატარება.
ვარიანტი ორია – ბარის “სან ნიკოლა” და პალერმოს “რენცო ბარბერა”, რადგან სამხრეთში მხოლოდ ეს ორი სტადიონია, რომელიც უეფას შესაბამის ლიცენზიას ფლობს. არსებობს მეორე გზაც: ნაპოლიმ სტადიონის რეკონსტრუქციის პარალელურად მაინც ითამაშოს “სტადიო მარადონაზე”. ეს აპრობირებული მეთოდია, ჯერ ერთი სექტორი დაიხურება, შემდეგ მეორე, შემდეგ სხვა და ა.შ. თუმცა, ეს სამუშაოების შენელებას გამოიწვევს.
თუ სტადიონის რეკონსტრუქცია დაიწყება, ეს მხოლოდ მომავალი სეზონიდან დაიწყება. მიმდინარე სეზონში „ნაპოლი“ მშობლიურ ქალაქში ითამაშებს.
გამოცემამ „Gazzetta Dello Sport“ გაავრცელა ინფორმაცია, რომ ხვიჩა კვარაცხელიამ შეიძლება ზაფხულში „ნაპოლი“ დატოვოს.
როგორც გაზეთი აღნიშნავს, კვარაცხელიას დიდი მატჩების ამბიცია აქვს და თუ „ნაპოლი“ ჩემპიონთა ლიგის საგზურს ვერ მოიპოვებს, ეს შეიძლება პრობლემა იყოს ქართველი ფეხბურთელის შენარჩუნებაში.
„ნაპოლის“ მთავარმა მწვრთნელმა ფრანჩესკო კალცონამ „სასუოლოსთან“ მატჩის (6:1) შემდეგ ისაუბრა:
„ოსიმენი თავის დონეზე ბრუნდება. არ იყო საუკეთესო კონდიციაში, რადგან, როგორც გასულ კვირაში ვთქვი, აფრიკის თასი ფეხბურთელებისთვის რთულია. კვარამაც მძიმე პერიოდი გამოიარა, მაგრამ დღეს აჩვენა, როგორი ფეხბურთელია.
ოსიმენს და კვარას სხვადასხვა მიზეზით გაუჭირდათ, მაგრამ მათ მუშაობა დაიწყეს. ისინი დიდი ფეხბურთელები არიან და არ ვარ გიჟი, რომ ამ კალიბრის მოთამაშეებზე უარი ვთქვა. სხვა საკითხია მათი შეცვლა, თუ ვატყობ, რომ ინტენსივობას ვკარგავთ“.
ხვიჩა კვარაცხელიას მიმდინარე სეზონში ყველა ტურნირზე 34 მატჩში 8 გოლი აქვს გატანილი, 5-ჯერ საგოლე პასი გააკეთა და 2-ჯერ პენალტი მოიპოვა.
„ნაპოლიმ“ 40 ქულა დააგროვა და სატურნირო ცხრილში ჯერ ისევ მეცხრე ადგილზეა, მაგრამ ევროზონასთან ჩამორჩენა შეამცირა, ხოლო მომდევნო შეხვედრას 3 მარტს, შინ ტურინის „იუვენტუსთან“ ჩაატარებს.
ცნობილი გახდა, რომ ლუქსემბურგის ნაკრებს საქართველოს ნაკრებთან მოახლოებულ მატჩში ერთ-ერთი მნიშვნელოვანი ფიგურა, ცენტრალური მცველი მარვინ მარტინში დააკლდება.
ვენის „აუსტრიას“ ფეხბურთელმა „რაპიდთან“ ბოლო შეხვედრაში ტრავმა მიიღო, რომელიც სერიოზულია და სამ კვირაში თბილისში გასამართი შეხვედრა გაუცდება.
ლუქსემბურგს მარტინშის გარდა, ვინსენ ტილი და დანიელ სინანიც დააკლდება.
შეგახსენებთ, რომ საქართველოსა და ლუქსემბურგის მატჩი 21 მარტს, თბილისში გაიმართება.
გუშინ ესპანურმა გამოცემამ „GOL digital“ გიორგი მამარდაშვილს წერილი მიუძღვნა და მისი მომავალის შესახებაც ისაუბრა.
„ვალენსიაში კარგად აქვთ გააზრებული, რომ გიორგი მამარდაშვილი მიდის, ამდენად, მისი შემცვლელი უნდა მოძებნონ. ქართველი მეკარე ამჟამინდელი „ვალენსიას“ ერთ-ერთი ნათელი წერტილია, თუმცა, კლუბში მისი დღეები დათვლილია. მამარდაშვილს ეჭვი ეპარება, რომ უახლოეს წლებში „ვალენსია“ ევროტურნირებზე თამაშს მოახერხებს, ამდენად, დარჩენის სტიმული არ გააჩნია.
ხმები, რომ მამარდაშვილი „ვალენსიას“ დატოვებდა, გასულ ზაფხულსაც დადიოდა, თუმცა, ეს პროცესი გადაიდო. გიორგის სურვილის შესახებ მაშინაც ცნობილი იყო. მამარდაშვილი ისეთ ასაკშია, რომ მუდმივი განვითარება სჭირდება, ევროთასების გარეშე კი, ეს ძალიან რთულია.
ბოლო პერიოდში მამარდაშვილს ყველაზე ხშირად იტალიურ და ინგლისურ კლუბებს უკავშირებენ. პირველ პლანზეა „მილანი“, რომელიც დიდი ალბათობით, ფრანგ გოლკიპერ მენიანს დაემშვიდობება და ახალი მეკარის მოძიება მოუწევს. ასახელებენ „ტოტენჰემსა“ და „ჩელსისაც“.
გიორგი მამარდაშვილმა „ლა ლიგის“ მიმდინარე სეზონში 25 შეხვედრაში 29 გოლი გაუშვა, 8 თამაშში კი კარის მშრალად შენახვა შეძლო, რითაც „ვალენსიაში“ თავისი რეკორდი გააუმჯობესა. რუბენ ბარახას გუნდი 26 ტურის შემდეგ 36 ქულით მე-9 ადგილზეა, მომდევნო ტურში კი 2 მარტს, შინ ლიდერ მადრიდის „რეალს“ დაუპირისპირდება.
ავტორი
