„ნაპოლის“ ვალტერ მაცარი ჩაიბარებს, არადა ყველა დაწმუნებული იყო რომ ნეაპოლურ კლუბს ხორვატი ფეხბურთის სპეციალისტი იგორ ტუდორი გაუძღვებოდა.
აურელიო დე ლაურენტისი ტუდორს რომში შეხვდა, ესაუბრა და მისი თანხმობაც მიიღო. ამის პარალელურად იტალიული მედიასაშუალებებით ვრცელდებოდა ინფორმაცია, რომ ხორვატის თანხმობის მიუხედავად, “ნაპოლის” პრეზიდენტი ვალტერ მაცარისაც ხვდებოდა.
მოგვიანებით ცნობილი გახდა, რომ ტუდორმა სეზონის ბოლომდე გუნდის გაწვრთნაზე უარი თქვა. ამის შემდეგ, გუშინ, დე ლაურენტისი და მაცარი ერთმანეთს კიდევ ერთხელ შეხვდნენ. ამჯერად მოლაპარაკება წარმატებით დასრულდა.
62 წლის მაცარის, რომელსაც „ნაპოლიში“ 2009-13 წლებში უკვე უმუშავია, შვიდთვიან კონტრაქტს გაუფორმებენ, რომელიც გახანგრძლივებას არ ექვემდებარება. ამ დროის განმავლობაში ვალტერი გასამრჯელოდ 1 მილიონ ევროს მიიღებს.
მაცარი “ნაპოლიში” პირველ ვარჯიშს დღეს, 15 ნოემბერს ჩაატარებს.
„იუვენტუსის“ ყოფილმა გენერალურმა დირექტორმა ლუჩანო მოჯიმ კი რუდი გარსიასა და „ნაპოლიზე“ ისაუბრა.
“გარსია შესუსტებული და დემოტივირებულია. წარმოუდგენელია, რომ ოსიმენის არყოფნაში კვარაცხელიაც სკამზე დატოვა, რადგან, როცა ქართველი მოედანზეა, მისი თანაგუნდელებიც უფრო მშვიდად თამაშობენ. ალბათ, გარსიას ეგონა, რომ ადვილი მატჩი იქნებოდა, მაგრამ „ემპოლი“ ბევრს დარბის და „ნაპოლის“ პრობლემები შეუქმნა. არასდროს მინახავს ასე დემოტივირებული ადამიანი. ვერ გეტყვით, ავირჩევდი თუ არა, მე გარსიას მწვრთნელად, მაგრამ სპალეტის და ჯუნტოლის შესანარჩუნებლად ყველაფერს გავაკეთებდი. ახლა გარსიას შენარჩუნებას აზრი არ აქვს, მაგრამ მიზეზი, რამაც კლუბის წარუმატებლობა გამოიწვია, ჯერ კიდევ გასარკვევი“, – განაცხადა ლუჩანო მოჯიმ.
ლუჩანომ აღნიშნა, რომ დე ლაურენტისთან მუშაობა არავის სურს:
„ამჟამად „ნაპოლიში“ მოსვლა ალბათ არავის უნდა, რადგან იქ დე ლაურენტისია. ალბათ, კონტემაც ამიტომ თქვა უარი. დე ლაურენტისი დიდებული მეწარმეა, მაგრამ აქვს ჩვევა, რომ გუნდის ტექნიკურ საკითხებში მუდმივად ერეოდეს, რაც არასწორია“.
იტალიის ნაკრების შეკრებაზე მყოფმა ჯოვანი დი ლორენცომ „ნაპოლის“ შესახებ მცირე კომენტარი გააკეთა.
„ჩვენს მდგომარეობაზე ვერანაირი განცხადებას ვერ გავაკეთებ. ეს არის რთული სიტუაცია, რომელიც არ გვახარებს, ყველაფერს გავაკეთებთ მის მოსაგვარებლად, მაგრამ სხვას ვერაფერს ვიტყვი“, – აღნიშნა დი ლორენცომ.
იტალიის ნაკრების მთავარმა მწვრთნელმა ლუჩანო სპალეტიმ რუდი გარსიაზეც ისაუბრა და აღნიშნა, რომ შედარებების გაკეთება სწორი არ არის.
„ნაპოლიზე“ სათქმელი არაფერი მაქვს. მე ეროვნული ნაკრების მწვრთნელი და ამჟამად კლუბებზე საუბარი სწორი არ მგონია. უსამართლოა ყოველთვის წარსულთან შედარება. ყველა ფეხბურთელი და მწვრთნელი უნდა შეფასდეს იმის გამო, რაც წარსულში გააკეთეს, იმ მცდელობის გამო, რაც გააკეთეს გუნდის გასაუმჯობესებლად, რადგან გაუმჯობესება ყველას შეუძლია. გარსიამ დაამტკიცა, რომ წესიერი ადამიანია მისი გუნდის წარსულთან შედარება პირველივე მატჩიდან არასწორი იყო. მე „ნაპოლისთან“ მშვენიერი ამბავი მაკავშირებს, რომელიც მთლიანად იტალიური ფეხბურთის ლამაზი ისტორიაა“, – თქვა სპალეტიმ.
ამავე თემაზე ილაპარაკა ნეაპოლელმა ჟურნალისტმა უმბერტო კიარიელომ:
„გარსიამ რაღაც გიჟური არჩევანი გააკეთა, თითქოს, სურდა, რომ „ნაპოლიდან“ გაეგდოთ. როგორ შეიძლება 60 წლის და დიდი გამოცდილების მწვრთნელმა იფიქროს, რომ ჟიელინსკი და კვარაცხელია სანაკრებო პაუზის წინ დაასვენოს. მან უარი თქვა საუკეთესო ფეხბურთელებით თამაშის დაწყებაზე, როდესაც ოსიმენიც არ ჰყავს.
დე ლაურენტისმა სხვა შეცდომაც დაუშვა. მან ისეთი სპორტული დირექტორის ნაცვლად, როგორიც ჯუნტოლია, „სპეციადან“ გაშვებული 60 წლის სპორტული დირექტორი მოიყვანა“.
ავტორი
