ოზურგეთის მუნიციალიტეტში, ნარუჯის შიდა საუბნო გზების სიგრძე, როგორც ადგილობრივები გვეუბნებიან, 13 კილომეტრამდეა.
_ამოდით წვიმიან ამინდში და მაშინ ნახავთ ჩვენს გასაჭირს, – მოგვმართეს მათ. თუმცა, როცა სოფელში ავედით, გარდა წვიმის წყლით სავსე გუბეებისა, რომელიც გზებზე ძალზე ბევრია, ვნახეთ ასევე მთლიანად ამორტიზირებული მონაკვეთები.
ადგილობრივი მცხოვრებლები, თამაზ ჯავახიძე, რეზო კახაძე და სხვები ამბობენ, რომ დიდი ხანია, ითხოვენ შიდა გზების გაკეთებას, თუმცა დღემდე საამისოდ ნაბიჯი არ გადადგმულა. მათივე თქმით, თითოეული რაიონიდან ასი ბავშვი მაინც დადის სკოლაში და უჭირთ ამ გზებზე სიარული. ხოლო ავტომანქანები, ამ ამორტიზირებულ გზებზე ფუჭდებიან, ორმოებსა და დახეთქილ ასფალტზე სიარულის შემდეგ.
_ნარუჯის შიდა გზები მთლიანად ამორტიზირებულია. სულ ექვსი რაიონია. ამას თუ დავუმატებთ ფაბრიკის და ჩოლოქის უბნებს, რვა არის. ახლა მეორე რაიონის გზას ხომ ხედავთ? ამაზე უარესია ყველა უბანში. 700 კომლი ცხოვრობს ნარუჯაში. არიან მძიმე ავადმყოფები, გულით დაავადებული ადამიანები, რომლებსაც განსაკუთრებული მზრუნველობა სჭირდებათ და ერთ-ერთი კეთილმოწყობილი გზაა. როცა სასწრაფო მოდის და მათი გადაყვანა უხდებათ ამ მთლიანად ამორტიზირებულ გზებზე, ამ ადამიანთა ჯანმრთელობა საგრძნობლად უარესდება. მოსახლეობა, დიდი ხანია, ითხოვს ამ გზების კეთილმოწყობას, _ გვითხრა ადგილობრივმა მცხოვრებმა შუშანა ფუტკარაძემ.
„ყველა არჩევნებზე, წინასაარჩევნო უპირველესი დაპირება მუდამ იყო შიდა გზების ინფრასტრუქტურის გაუმჯობესება. დღემდე არაფერი გაკეთებულა. იმედია, სამომავლოდ მაინც იქნება ბიუჯეტში გათვალისწინებული. ზოგადად გაკეთდა ცალკეული, მოკლე ბეტონის აღმართები, სადაც შესაძლებელი გახდა მსუბუქი ავტომობილების გადაადგილება, რომლებიც მანამდე ვერ მოძრაობდნენ, _გვითხრა ოზურგეთის საკრებულოს წევრმა, რაინდი დუმბაძემ, რომელიც ნარუჯისა და ლაითურის მოსახლეობის მიერაა არჩეული.
_ეს გზები კომუნისტების დროს დაგებულია. იმიტომაა ასფალტი ასე დაგლეჯილი. ასევე გარე განათება არ გვაქვს. კი არის ბოძები, ხაზები, მაგრამ ორასამდე ნათურაა გადამწვარი და შესაცვლელია. ბავშვებს წვიმაში გადაადგილება უჭირთ. შორიდან მიკროავტობუსს დაჰყავს. უფრო მოკლე მანძილიდან კი ორმოებსა და ტალახში უწევთ სიარული და ხტომა, – გვითხრა ადგილობრივმა მცხოვრებმა ნანი დუბაძემ.
ადგილობრივმა მკვიდრმა რეზო პაქსაძემ, რომელსაც მიკრავტობუსი ჰყავს, შემოგვჩივლა, რომ მანქანა დაეშალა ამ გზაზე სიარულით.
_უმჯობესი იქნება, პოლიტიკური პარტიები ერთმანეთს თუ არ გაეჯიბრებიან და ამ გზების კარგად გაკეთებაში შეეჯიბრებიან ერთმანეთს. აი, მაშინ ნახავენ, თუ არ დაუფასებს ხალხი. არავინ არ ასრულებდა დაპირებებს არასდროს, რომ ეს შიდა გზები გაკეთებულიყო,-გადმოგვძახა მან მიკროავტობუსიდან.
ვრცლად ნარუჯის გზებზე არსებული მდგომარეობის შესახებ, მალე გიამბობთ.
[sexy_author_bio]
