“ლეიბორისტული პარტიის” ლიდერმა შალვა ნათელაშვილმა სკანდალური განცხადება გააკეთა – მისი მტკიცებით, “ქართული ოცნების” თავმჯდომარე ვლადიმერ პუტინთან აფხაზეთისა და ცხინვალის რეგიონების დამოუკიდებელ სახელმწიფოებად აღიარების შესახებ ფარულ მოლაპარაკებებს აწარმოებს.
ნათელაშვილის თქმით, ამ მოლაპარაკებებში რუსული ოლიგარქია და პუტინის ახლო გარემოცვაც არიან ჩართულები.
ლეიბორისტების ლიდერის თქმით, ოლიგარქ ივანიშვილს აფრთხილებს, რომ “ქართველი ხალხის რისხვას ვერ გაასწრებს”.
,,დღეს, როდესაც რუსეთის აგრესიამ უკრაინაში მთელ მსოფლიო დააყენა მესამე მსოფლო ომის ზღვართან, საქართველოს დიქტატორი მმართველი, ბიძინა ივანიშვილი ცდილობს, ისარგებლოს მომენტით, ჩაიდინოს მორიგი ეროვნულ-ისტორიული ღალატი რის შედეგადაც ქართული სახელმწიფო აღარ უნდა დარჩეს. კარგა ხანია, პერმანენტულ რეჟიმში კრემლთან კონულტაცია-მოლაპარაკებებს აწარმოებს, აფხაზეთისა და ცხინვალის რეგიონის დამოუკიდებელ სახელმწიფოებად აღიარებაზე. ვიმეორებ, პუტინსა და ივანიშვილს შორის მოლაპარაკებები აქტიურად მიმდინარეობს.
გამოვიდეს და საჯაროდ დაგმოს რუსეთის აგრესია. თავისი მილიარდებიდან, გადაურიცხოს თანხა უკრაინელ ბავშვებს. ეს იქნება დადასტურბა, რომ მისი რუსეთთან კავშირები ჭორია”,– განაცხადა ნათელაშვილმა.
შალვა ნათელაშვილმა, აშშ-ს ივანიშვილისთვის სანქციების დაწესებისკენ კიდევ ერთხელ მოუწოდა.
ავტორი: მერაბ ცაავა
