ერთიანი ნაციონალური მოძრაობის, ოზურგეთის რაიონული ორგანიზაციის თავმჯდომარემ, დავით მჟავანაძემ პარტიის ოფისში, პარტიის სახელით ჟურნალისტებისთვის ბრიფინგი გამართა.
საკითხი ეხებოდა კარგად ნაცნობ თემას _ კარიერებიდან, კონკრეტულად ამ შემთხვევაში კი, ოზურგეთის მუნიციპალიტეტის სოფელ მელექედურის ტერიტორიაზე, მდინარე ნატანების ხეობაში ქვიშა-ღორღის მოპოვების საკითხს.
ბრიფინგის დაწყებამდე დავით მჟავანაძემ დაწვრილებით ისაუბრა ადმინისტრაციული საჩივრის თაობაზე, რომლითაც სოფელ მელექედურის მოსახლეობის წარმომადგენლებთან ერთად, ამ წლის თებერვალში მიმართა ეკონომიკის სამინისტროს _ საჩივარში ითხოვდნენ ლიცენზიის შეჩერებას. თუმცა, საპასუხოდ უარი მიიღეს. ამის შემდეგ კი, როგორც მან თქვა, მიიღეს გადაწყვეტილება, მიმართონ სასამართლოს და ამის შესახებ აცნობონ ხალხს.
დავით მჟავანაძემ ნატანების ხეობიდან ქვა-ღორღის გატანაში დაინტერესებულ პირებად სახელმწიფო მოხელეები, კერძოდ კი, არჩილ და ავთანდილ თალაკვაძეები დაასახელა და მათი ფოტოების ჩვენებით დაიწყო საუბარი.
_ მათ სურთ, ფინანსური კეთილდღეობის წყაროდ აქციონ მდინარე ნატანების ხეობა. დამლაგებლად კი დავით გოლიაძე ჰყავთ, ადამიანი, რომლის ფოტო არ იძებნება. ის არის სუს-ის ოდეერი და ალაგებს საქმეს კრიმინალებსა და სუს-ს შორის. მათ სურთ, მდინარე ნატანების ხეობა კეთილდღეობის წყაროდ აქციონ, _ განაცხადა მჟავანაძემ.
ჩვენს კითხვაზე, თუ საიდან იცის, რომ თალაკვაძეები და გოლიაძე განაგებენ და „ალაგებენ“ ამ ყველაფერს, რაზეც მტკიცებით ფორმაში საუბრობს, მჟავანაძემ გვითხრა, რომ ეს ყველაფერი ხალხის საუბრიდან იცის:
_ ოზურგეთი პატარაა და საზოგადოებაში მალე ვრცელდება ამბავი.
მჟავანაძემ, ასევე თქვა, რომ გოლიაძე მოსახლეობაშიც დადის და ხალხის დაშინებასაც არ ერიდება.
კითხვაზე, დაესახელებინა, ვინ იყვნენ ეს დაშინებული ადამიანები, მან გვითხრა, რომ გასაგები მიზეზების გამო, ვერ დაასახელებს.
_ ჩვენ ყველა მტკიცებულება შევაგროვეთ ამ მდინარის ხეობაში არსებული მდგომარეობის ირგვლივ და შემდეგ მივმართეთ ეკონომიკის სამინისტროს ლიცენზიის შეჩერების მოთხოვნით. თუმცა, მათ არ შეისმინეს. აქ ქვა-ღორღის ამ მასშტაბით ამოღება არ შეიძლება. ეს პრობლემას უქმნის სასმელ წყალს, სამ ხიდს, დაიკარგება პატარა მდინარეები. ჩვენ არ ვაპირებთ გაჩერებას _ „ნაციონალურმა მოძრაობამ“ მიიღო გადაწყვეტილება, მივმართოთ სასამართლოს, _ თქვა მჟავანაძემ და წარმოადგინა ფურცლები ბეჭდური სახით:
_ აქ პირველ გვერდზე წერია, რომ არ შეიძლება აქ ქვა-ღორღის ამოღება და რომ ეს საფრთხის შემცველია. ბოლო გვერდზე კი წერია, რომ ჩვენი მოთხოვნა არ დაკმაყოფილდება. აი, ეს არის აღმაშფოთებელი, როცა ეკონომიკის სამინისტრო ქვემდებარე უწყების დასკვნას ეწინააღმდეგება. როცა დეპარტამენტი წარადგენს ექსპერტთა დასკვნას, რომ არ შეიძლება ქვა-ღორღის ამოღება, ხოლო თვით სამინისტრო არ ეთანხმება! ამიტომ ჩვენ შევიტანთ სარჩელს სასამართლოში სამინისტროს წინააღმდეგ, _ თქვა მჟავანაძემ.
ეკონომიკის და მდგრადი განვითარების სამინისტროსადმი გაგზავნილ ადმინისტრაციულ საჩივარს, რაზეც მჟავანაძემ ისაუბრა, ხელს აწერენ სოფელ მელექედურის მცხოვრებლები: ლილი და მერაბ ცეცხლაძეები, ნაზი სალუქვაძე და ზურაბ მგელაძე, ასევე, დავით მჟავანაძე.
საჩივრის დაკმაყოფილებაზე უარით ნაპასუხევ სამინისტროს განცხადებაში ნათქვამია შემდეგი (გთავაზობთ ამონარიდებს) :
„ადმინისტრაციული წარმოების ფარგლებში, სამინისტრომ გამოარკვია შემდეგი: 2023 წლის 18 ივლისს შპს „ კავკაზ ცემენტ ჯორჯიამ“ სააგენტოში წარადგინა განაცხადი და მოითხოვა ოზურგეთს მუნიციპალიტეტში, მელექედურის და ქ.ოზურგეთის ადმინისტრაციული ერთეულების ტერიტორიაზე ქვიშა-ხრეშის მოსაპოვებლად, 5 წლის ვადით, სასარგებლო წიაღისეულის მოპოვების ლიცენზიის გაცემის მიზნით აუქციონის გამოცხადება“.
აქვე მითითებულია ყველა მომდევნო ქმედება, რომ ლიცენზიის გაცემის მიზანშეწონილობის საკითხი შეთანხმდა გურიის მხარეში სახელმწიფო რწმუნებულის ადმინისტრაციასთან.
სასარგებლო წიაღისეულის მოპოვების ლიცენზიის გაცემის მიზნით, სააგენტოს უფროსის 2023 წლის 28 ოქტომბრის ბრძანებით გამოცხადდა ელექტრონული აუქციონი ოზურგეთის მუნიციპალიტეტში, მელექედურის და და ქალაქ ოზურგეთის ადმინისტრაციული ერთეულების ტერიტორიაზე.
ადმინისტრაციული წარმოების მასალაში წარმოდგენილია, სსიპ მინერალური რესურსების ეროვნული სააგენტოს (შემდგომში საგენტოს) „სასარგებლო წიაღისეულის მართვის დეპარტამენტის“ უფროსის , 2023 წლის 13 ნოემბრის მოხსენებითი ბარათი, სადაც მითითებულია, რომ მიმდინარე წლის ცხელი ზაფხულის შემდეგ, , საქართველოს ბარის ტერიტორიაზე უჩვეულოდ მაღალი ტემპერატურაა, რაც იწვევს როგორც ზედაპირული წყლების, ასევე გრუნტის წყლების დონეების მკვეთრ ვარდნას. განსაკუთრებით კრიტიკული მდგომარეობაა დასავლეთ საქართველოში მდინარე ნატანების აუზში, სადაც დაფიქსირდა რამდენიმე უსახელო შენაკადის დაშრობა.
სამინისტროს პასუხში ნათქვამია, რომ სამინისტრო ვერ გაიზიარებს საჩივრის ავტორების პოზიციას იმის შესახებ, რომ „ლიცენზიის გაცემაზე პასუხისმგებელმა ადმინისტრაციულმა ორგანომ არ შეაფასა გარემოზე და მოსახლეობაზე ზემოქმედების რისკები და არ არსებობს შესაბამისი ექსპერტების დასკვნა. ადმინისტრაციული წარმოების ფარგლებში , სააგენტოს გეოლოგების მიერ, შესწავლილი იქნა ტრიტორია და შემუშავდა საინფორმაციო პაკეტი, რომელშიც აღნიშნულია, რომ სალიცენზიო ობიექტების უბნებზე ინერტული მასალის მოპოვება არ გამოიწვევს არსებული გეოდინამიკური სიტუაციის გაუარესებას“.
ჩამოთვლილია ლიცენზიის მფლობელის მთელი რიგი ვალდებულებები.
მარტივად რომ გავიგოთ, სამინისტროს პასუხიდან იკვეთება, რომ სააგენტოს ექსპერტების მიერ გაცემული უარყოფითი დასკვნის საფუძველზე, შეისწავლეს ტერიტორია და არსებული საფრთხეების მიუხედავად, დაადგინეს, რომ ინერტული მასალის მოპოვება. მნიშვნელოვან ცვლილებას არ გამოიწვევს.
_ ეკონომიკის სამინისტრო ქვემდებარე უწყების დასკვნას ეწინააღმდეგება. ჩვენ არაფრით არ გავჩერდებით. დღეიდან სასამართლოში გადავინაცვლებთ. ეს მოხდება პარტიის სახელით, _ კიდევ ერთხელ განაცხადა დავით მჟავანაძემ მდინარე ნატანების სიახლოვეს არსებულ, როგორც მან უწოდა, „ქვა-ღორღის მთებთან“ დაკავშირებით. მან ასევე თქვა, რომ აქ წინა დღით იყვნენ და ადგილზე მომუშავე ტრაქტორები ნახეს. ახლა კი, ფრთხილობენ და დღეს აღარ გამოჩენილანო.
იქვე მართლაც იდგა ექსკავატორი და სატვირთო მანქანები. თუმცა, მძღოლები ან მომუშავე პერსონალი არსად ჩანდა.
თუ როდის გაიმართება სასამართლო, ძნელი სათქმელია. დავით მჟავანაძემ გვითხრა, რომ ახლა ის ცოტა ხნით მთაში მიდის დასასვენებლად და მალე ისევ საქმეს შეუდგება.
ავტორი
