“ნაციონალების” და “ოცნების” გარიგება _ რა მოხდა ოზურგეთის საკრებულოში

ოზურგეთის მუნიციპალიტეტის საკრებულოს ფრაქცია “ქართულ ოცნებას” ახალი თავმჯდომარე ჰყავს. რამდენიმე წუთის წინ გამართულ სხდომაზე თავმჯდომარედ გელა ჩავლეიშვილი აირჩიეს, რომელიც ამ დრომდე ფრაქციის თავმჯდომარის მოადგილე იყო.

ჩავლეშვილმა ტარიელ აროშიძე ჩაანაცვლა, რომელიც თანამდებობიდან “ნაციონალური მოძრაობის” დეპუტატის, ბესო ქათამაძის ცემის გამო გადადგა და დღეიდან მოადგილის პოსტი დაიკავა.

უფრო მარტივად რომ ვთქვათ, აროშიძემ და ჩავლეიშვილმა ადგილები გაცვალეს, თუმცა, როგორც ჩვენი წყარო ამბობს დროებით _ სულ რაღაც ორი თვით.

როგორც ჩვენი წყარო ამბობს, “ქართულ ოცნებაში” გარიგება შედგა _ აროშიძეს თანამდებობა ორი თვით, ხმაურის ჩასაწყნარებლად დაატოვებინეს, სანაცვლოდ კი “ნაციონალურ მოძრაობას” პროკურატურაში წერილის შეტანა მოსთხოვეს, რაზეც ეს უკანასკნელები დაეთანხმნენ _ წყაროს თქმით, ბესო ქათამაძემ, რომელიც თანაგუნდელებთან ერთად აროშიძის დასჯას და თანამდებობიდან გადადგომას აქციებით და შიმშილობით ითხოვდა, პოლიტიკური ქულების დაწერის სანაცვლოდ _ რაც ფრაქციის თავმჯდომარის გადაყენებას გულისხმობდა, პროკურატურაში წერილი შეიტანა, რომელშიც აღნიშნულია, რომ მას აროშიძესთან პრეტენზიები არ აქვს.

სწორედ ქათამაძის წერილს მოჰყვა საკრებულოს თავმჯდომარის დავით დარჩიას ბრიფინგი, რომელზეც ცნობილი გახდა, რომ აროშიძე თანამდებობას ტოვებდა.

პროკურატურაში წერილის შეტანის ფაქტს ბესო ქათამაძე “გურია ნიუსთან” ადასტურებს და ამბობს, რომ ეს გადაწყვეტილება პარტიაში მიიღეს:

_ ჩვენ გამოვიჩინეთ ჰუმანურობა, რადგან არ გვინდა ვინმე ციხეში წავიდეს, _ აღნიშნავს ქათამაძე და ამბობს, რომ აროშიძეს ბრალიც კი დაუმძიმდა.

“ქართული ოცნების” წევრების მიერ გალახული “ნაციონალური მოძრაობის” დეპუტატი პრობლემას ვერც იმაში ხედავს, რომ  აროშიძე ფრაქციის თავმჯდომარეობიდან მხოლოდ ორი თვით გადადგა:

_ მარტო აროშიძე არ ყოფილა იქ _ იყვნენ გოჩა კილაძე, დავით ჭაკნელიძე, გენო ჩავლეშვილი. ჩვენ ამ ადამიანების დასჯასაც ვითხოვთ და ვამბობთ, რომ ეს იყო პოლიტიკური ნიშნით ჩადენილი დანაშაული, _ ამბობს ქათამაძე.

დანაშაულზე არა, თუმცა პოლიტიკურ პასუხისმგებლობაზე საუბრობს ტარიელ აროშიძე _ “ქართული ოცნების” ფრაქციის ყოფილი თავმჯდომარე და ახლა უკვე მოადგილე, ქათამაძის ცემის შემდეგ  პირველ კომენტარს “გურია ნიუსთან” აკეთებს და აღნიშნავს, რომ მას თანაგუნდელების უხერხულ მდგომარეობაში ჩაყენება არ სურდა:

_ მე გადავდექი იმიტომ, რომ ჩემი თანაგუნდელები  უხერხულ მდოგმარეობაში არ ჩამეყენებინა. იმ ინცინდენტს დიდი ხმაური მოჰყვა და ეს გადაწყვეტილებაც ამიტომ მივიღე, _ გვითხრა აროშიძემ.

კითხვაზე, დაბრუნდება თუ არა ორ თვეში თანამდებობაზე გვიპასუხა, რომ არ იცის, რა იქნება ორი თვის შემდეგ, თუმცა, აღნიშნავს, რომ გარიგებას ადგილი არ ჰქონია:

_ არ ვიცი, რა გარიგებაზე მესაუბრებით. მოხდა ის, რაც მოხდა. არავითარი გარიგება არ ყოფილა, _ ამბობს აროშიძე.

_ ბატონო ტარიელ, თქვენი გადადგომის შესახებ განცხადება საკრებულოს თავმჯდომარემ მას შემდეგ გააკეთა, რაც ქათამაძემ პროკურატურაში წერილი შეიტანა, რომელშიც აღნიშნულია, რომ თქვენს მიმართ პრეტენზიები არ აქვს…

_ ეს ბესოს გადაწყვეტილება იყო…

_ და ამის შემდეგ თანამდებობას ტოვებთ თქვენ და დროებით ადგილს უცვლით მოადგილეს..

_ მე მეტ კომენტარს ვერ გავაკეთებ.

_ ბატონო ტარიელ, ჩვენთვის ისიც ცნობილია, რომ შიდა პარტიული შეთანხმებით, თქვენი სახელფასო ანაზღაურება იგივე იქნება, რაც ფრაქციის თავმჯდომარეობისას _ იმ სხვაობას, რაც მოადგილის და თავმჯდომარის ხელფასებს შორისაა, ჩავლეიშვილი გაასწორებს

_ მე არ ვიცი მასეთი გარიგების შესახებ, _ გვითხრა აროშიძემ.

გარიგებას უარყოფს გელა ჩავლეშვილიც, რომელიც 2012 წელს სოფელ ბოხვაურში “რესპუბლიკელების” კვოტით იყრიდა კენჭს, ახლა კი “ქართულ ოცნებას” წარმოადგენს. აროშიძის მსგავსად ისიც აღნიშნავს, რომ არ იცის, რა მოხდება ორი თვის შემდეგ.

ფრაქციის ახალ თავმჯდომარესთან ჩვენი წყაროს მიერ მოწოდებული კიდევ ერთი ინფორმაცია გადავამოწმეთ _ წყარო ამბობს, რომ ჩავლეიშვილი, რომელიც დღეს “ქართული ოცნების” ფრაქციის თავმჯდომარედ აირჩიეს, 2017 წლის თვითმმართველობის არჩვენების დროს “:ქართული ოცნების” კანდიდატის ბეგლარ სიორიძის წინააღმდეგ მუშაობდა და დღევანდელ მერს კონსტანტინე შარაშენიძეს ეხმარებოდა.

ჩავლეიშვილი ამბობს, რომ ეს ინფორმაცია სწორი არ არის და დღეს, მას მერთან მხოლოდ საქმიანი ურთიერთობა აქვს.

მისივე თქმით, ასევე, არასწორია ინფორმაცია იმის თაობაზე, რომ ტარიელ აროშიძეს ხელფასიდან ყოველთვიურად 400 ლარი უნდა მისცეს _  სწორედ 400 ლარია განსხვავება ფრაქციის თავმჯდომარის და მოადგილის ანაზღაურებას შორის.

აღსანიშნავია კიდევ ერთი დეტალი_ ბესო ქათამაძე, რომლის ცემის შემდეგაც დაიწყო ეს პროცესები, შესაძლო გარიგებაში განსაკუთრებულს ვერაფერს ხედავს. იგი “გურია ნიუსთან” საუბრისას ამბობს, რომ “ქართულ ოცნებაში” შესაკრებთა ადგილის გადანაცვლება შიდა პარტიული საქმეა და მას არ ეხება.