,,ნაციონალური მოძრაობის“ თავმჯდომარეობის კანდიდატებად ნიკა მელია და ლევან ვარშალომიძე დასახელდნენ,_ ამის შესახებ პარტიის ცენტრალურ ოფისში პოლიტსაბჭოს სხდომის დასრულების შემდეგ ,,ნაციონალური მოძრაობის“ ერთ-ერთმა ლიდერმა, ზაალ უდუმაშვილმა განაცხადა.
როგორც ზაალ უდუმაშვილი აცხადებს, თავმჯდომარის არჩევა, პარტიის ყრილობაზე მოხდება, რომელიც თვის ბოლოს ჩატარდება.
,,პოლიტიკური საბჭოს სხდომაზე ერთადერთი საკითხი დღის წესრიგში იყო ე ახალი თავმჯდომარის არჩევის წესი. პოლიტსაბჭომ გადაწყვიტა, რომ თვის ბოლოს გაიმართება პარტიის ყრილობა, სადაც დამტკიცდება პარტიის ახალი თავმჯდომარე. მანამდე, ალბათ, პირველად ჩვენი ქვეყნის ისტორიაში პარტიის თავმჯდომარის არჩევა ყველაზე გამჭვირვალედ, ელექტრონულად მოხდება. ათიათასობით მხარდამჭერს და პარტიის წევრს საშუალება ექნება, რომ მიიღოს ამ არჩევნებში მონაწილეობა და თავად განსაზღვროს ვინ იქნება ,,ერთიანი ნაციონალური მოძრაობის“ თავმჯდომარე. დღეს პოლიტსაბჭოზე ფარული კენჭისყრით შეირჩა კანდიდატები, რომლებიც უკვე ელექტრონულ კენჭისყრაში მიიღებენ მონაწილეობას, ესენი არიან ნიკა მელია და ლევან ვარშალომიძე“ – განაცხადა ზაალ უდუმაშვილმა.
როგორც ცნობილია, ,,ნაციონალური მოძრაობის“ თავმჯდომარის თანამდებობა ვაკანტური მას შემდეგ გახდა, რაც გრიგოლ ვაშაძემ, 15 დეკემბერს პარტია და მის მიერ დაკავებული ყველა პარტიული თანამდებობა დატოვა.
როგორც მან Facebook-ზე დაწერა, არ ეთანხმება პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე არჩეულ ტაქტიკას. ასევე მან აღნიშნა, რომ ვერ შეეგუება პარტიის გარშემო და მის შიგნითაც გამოჩნდნენ ოდიოზური ფიგურები.
