“ნენა, ნენა!” _ შეხვედრა გამოტირებულ დედასთან

ცნობილი მწერლის, ლანჩხუთელი გივი გოგიჩაიშვილის მეუღლე, ბასკი ქალბატონი მარტინა მინტეგი ბილბაო საქართველოში 1937 წელს, 10 წლის ასაკში მოხვდა, როცა ესპანეთში მიმდინარე სამოქალაქო ომს გამოექცა. როდესაც მარტინა გურულების რძალი გახდა, მან ქართული სრულებით არ იცოდა. ცოტა ხანში მარტინამ ენა გაიტეხა. ქართული წერა-კითხვა მას მამამთილმა, ძველმა და გამოცდილმა პედაგოგმა ასწავლა.

1966 წელს, ოცდაცხრა წლის შემდეგ, მარტინა პირველად ჩავიდა სამშობლოში და საკუთარი შთაბეჭდილებები გადმოსცა წიგნში ,,ჩემი ბასკეთი”
ხომ წარმოგიდგენიათ, რა შეხვედრა ექნებოდა ამდენი ხნის უნახავ ნათესავებთან.

მაგრამ ერთმა შეხვედრამ ის გულწასულობამდე მიიყვანა.

გთავაზობთ ამონარიდს: ,,მოხუცი ქალი საწოლზე წამომჯდარა, თვალებგაფართოებული კარისკენ იყურებოდა, ნერვიულობისა და მოლოდინისაგან დანაოჭებულ ფერმკრთალ ღაწვებზე სიწითლე შეჰპარვია. მოხუც ქალს თვალი შევავლე და კარის ზღურბლთან გავშეშდი.

ღმერთო ჩემო! ერთბაშად თვალნათლივ, მკაფიოდ, ჩემ თვალწინ დედაჩემის, ჩემი მშობელი დედის სახემ იელვა. ეს ხომ მისი სახის ნაკვთებია, მისი ფართო თვალები… საწოლზე ჩემგან გამოტირებული მშობელი დედა იჯდა, დაბერებული, მოტეხილი, იჯდა და ჩურჩულით მოთქვამდა _ ნენა! ნენა (ნენა ბასკურად პატარას ნიშნავს)!

ამდენ განცდას კი ვერ გავუძელი და თურმე იქვე გონწერთმეული დავცემულვარ…”