“ლადო _ სიმბოლო თავისუფლების”. ამ სლოგანით განახორციელა სასწავლო პროექტი სამტრედიის მუნიციპალიტეტის სოფელ ნიგორზღვის საჯარო სკოლის მოსწავლეებთან ერთად ქართული ენისა და ლიტერატურის პედაგოგმა, ნათია ნაცვლიშვილმა და პოეტის დაბადების დღეს, 23 ივნისს დაუკავშირეს ლადო ასათიანის მშობლიურ სოფელში სტუმრობა.
,,ბავშვებმა უკვე ხელში არაერთგზის აიღეს ამ ქვეყნიდან ნაადრევად წასული, ფილტვებმტკივანი, მოავადე, მაგრამ მაინც სტრიქონმოგიზგიზე ჭაბუკის წიგნები. მან ხომ სასიკვდილო სარეცელთან მყოფმა დაგვიწერა “ბასიანის ბრძოლა”. მოსწავლეებმა მთელი წლის განმავლობაში შეისწავლეს მწერლის შემოქმედებითი ბიოგრაფია, ლადოს პოეტური მარგალიტები. პროექტის დასკვნითი,შემაჯამებელი აქტივობა ბარდნალაში, ლადოს სამსაუკუნოვანი სახლის აივანზე მოეწყო. რატომ თავისუფლების სიმბოლო? ქართველი კაცი ლადოს ლექსით შეეგება 1989 წლის 9 აპრილს,რუსთაველის გამზირზე გამოსულ რუსული იმპერიის ტანკებს თუ ჯალათებს.
“დაუკარით,რომ ძველ ხანჯალს ელდა ეცეს” ეს სიმღერა აღმოხდათ უსინათლოებს 2008 წლის აგვისტოს. ომის დროსაც კვლავ მიაშურა ქართველმა კაცმა ლადოს პოეტურ საგანძურს და სკივრიდან წყება_წყებად ამოალაგა მარგალიტები:.”რა ქართველი ხარ და რა ჭაბუკი,თუ მამულს თავი არ ანაცვალე”_ კითხულობდნენ ლადოს ლექსებს პოეტის უსაყვარლეს რუსთაველზე გამოსული ქართველი არტისტები. ჩვენ სიმბოლურად დავიბნიეთ გულზე ყაყაჩო,ისევე როგორც ტიციანთან მიხაკი, ლადოსთან ასოცირდება ეს უნაზესი ყვავილი. ჩვენც აგვაბრიალა “კრწანისის ყაყაჩოების” ავტორის პოეზიის ცეცხლმა და ვალდებულნი ვართ , გვახსოვდეს პოეტის დანაბარები “მაგრამ კეთილო,მიხვდი,გაიგე ადრე წასული კაცის ფიქრები”.- ,, გურია ნიუსთან” ასე ახსნა სასწავლო წლის აქტივობა ნიგორზღვის საჯარო სკოლის პედაგოგმა, პროფესიით ჟურნალისტმა ნათია ნაცვლიშვილმა.
დღეს, 23 ივნისს ლადო ასათიანის გარდაცვალებიდან 81 წელი გავიდა. ამ დღეს სიმბოლურად დაამთხვიეს ნიგორზღვის საჯარო სკოლის მოსწავლეებმა და ქართული ენისა და ლიტერატურის პედაგოგმა, ნათია ნაცვლიშვილმა მათ მიერ განხორციელებული პროექტის პრეზენტაცია ლადოს მშობლიურ სოფელ ბარდნალაში. სამსაუკუნოვანი სახლის აივანზე მის პოეზიაში კიდევ ერთხელ გააცოცხლეს ნიგორზღველმა მოსწავლეებმა და მათმა პედაგოგმა ამქვეყნიდან ნაადრევად წასული უნიჭიერესი და ქართველი ხალხისთვის უსაყვარლესი პოეტი, ლადო ასათიანი. ნიგორზღვის საჯარო სკოლა მცირეკონტიგენტიანია. ცხრაკლასიან სასწავლო დაწესებულებაში ამჯერად 15 მოსწავლე ირიცხება.
ავტორი
