სერბეთის ქალაქ ნოვისადში ჩატარდა ევროპის ჩემპიონატი, ბერძნულ-რომაულ ჭიდაობაში, 20 წლამდე ასაკის მოჭიდავეთა შორის, სადაც საქართველოს ნაკრებთან ერთად, ოზურგეთელი სპორტსმენი, მოჭიდავე ნიკა ღლონტი მონაწილეობდა.
ის, მიუხედავად იმისა, რომ არც ისე უბრალო ტრავმა მიიღო, თავმდაბლად საუბრობს საკუთარ თავზე და გვპირდება, რომ მსოფლიო ჩემპინატიდან, სექტემბერში, რომელიც ესპანეთში გაიმართება, გამარჯვებული დაბრუნდება.
_სერბეთის ქალაქ ნოვისადში, ევროპის ჩემპიონატზე, დავიცავი საქართველოს ღირსება და ვიასპარეზე 72 კგ წონით კატეგორიაში. კარგად დაიწყო ჩემპიონატი, მოვიგე ორი შეხვედრა, მესამე შეხვედრაზე დავმარცხდი თურქ მოწინააღმდეგესთან, გამოცდილ მოჭიდავესთან. თუმცა, მანამდე მოლდოველ მოჭიდავესთან მივიღე მცირე ტრავმა, მივირე დაზიანება, ეს იყო წარბთან ჭრილობა, მაგრამ ვერ ვიტყვი , რომ დიდი გავლენა მოახდინა ჩემს ჭიდაობაზე. ამ წაგებას ვერ დავაბრალებ ამ ტრავმას. მაჯობა მოწინააღმდეგემ ან მომზადებაში, ან ფსიქოლოგიურ ფაქტორში, მაგრამ არაუშავს, წინ მსოფლიო ჩემპიონატია. ვაგრძელებ აქტიურ მზადებას.
ჩემთვის რთული იყო ევროპის ჩემპიონატიდან მედლის გარეშე წამოსვლა, ამდენი ბრძოლის, ამდენი მოგებული შეხვედრის შემდეგ, თუმცა არაუშავს, დიდი გამოცდილება იყო ეს. ვეცდები, მოვემზადო მსოფლიო ჩემპიონატისთვის. ვაგრძელებ მომზადებას იგივე გუნდთან, იგივე ბიჭებთან, იგივე კატეგორიაში. მსოფლიო ჩემპიონატზე, ესპანეთში , დავიცავ საქართველოს ღირსებას. ვეცდები, მსოფლიო ჩემპიონატზე მივიღო ტიტული, გამოვასწორო ევროპის ჩემპიონატზე დაშვებული შეცდომა. ეს ჩემპიონატი დიდი გამოცდილება იყო ჩემთვის.
ყველანაირად ვეცდები, მსოფლიო ჩემპიონატიდან ჩამოვიტანო მედალი, გავახარო ჩემი სოფელი, ჩემი ქვეყანა, პირველ რიგში კი ჩემი ოჯახი.
უპირველესად კი ვიტყვი, რომ მადლობა ყველაფრისთვის საქართველოს ნაკრებს, მწვრთნელებს, ექიმებს, რომლებმაც ყველაფერი გააკეთეს იმისთვის, რომ მეასპარეზა ევროპის ჩემპიონატზე. ყველანაირად დამეხმარნენ იქამდე მიღებული ტრავმების მოშუშებაში. მქონდა ტრავმები ნეკნზე.
ყველაფერი წინ არის, დიდი გამოცდილება იყო ეს ევროპის ჩემპიონატი ჩემთვის, _ თქვა „გურია ნიუსთან“ საუბრისას ნიკა ღლონტმა.
როგორც ნიკამ გვითხრა, ის სექტემბერში, ესპანეთში მიიღებს მონაწილეობას მსოფლიო ჩემპიონატში.
ჩვენ ვგულშემატკივრობთ და გამარჯვებას ვუსურვებთ ნიკა ღლონტს!
ფოტო: united world wrestling
ავტორი
