“ერთი წამით არ ჩათვალოთ, რომ მე თქვენზე გაბრაზებული ვარ, _ ასე მიმართა „ნაციონალური მოძრაობის“ თავმჯდომარემ ნიკა მელიამ პლენარულ სხდომაზე „ქართული ოცნების“ დეპუტატებს.
მისივე თქმით, ოპოზიცია მმართველ გუნდს შემოდგომაზე დაამარცხებს და შექმნის კოალიციურ მთავრობას.
„მე თქვენთან ბევრი სალაპარაკო არ მაქვს, ერთი წამით არ ჩათვალოთ, რომ მე თქვენზე გაბრაზებული ვარ. მიუხედავად იმისა, რომ მართლაც როგორც მაუზერიანმა ბოლშევიკებმა მიიღეთ ორჯერ გადაწყვეტილება, იგივე ხდებოდა 30-იან წლებში, როცა ხვრეტდნენ თავიანთ კოლეგებსაც კი. მე თქვენ არ აღგიქვამთ როგორც კოლეგებს, პოლიტიკოსებს, ერთხელაც არ გამჩენია სურვილი თქვენთან ტელედებატებში მოხვედრის, მიუხედავად იმისა, რომ თქვენც არ გაქვთ სურვილი. რაზე უნდა გესაუბროთ? რაზე უნდა ვისაუბროთ ჩვენ?! ამიტომ, მე მირჩევნია ვესაუბრო საზოგადოებას, ვესაუბრო იმ საზოგადოებას, რომელთან ერთადაც ოპოზიცია ძალიან მალე, მიმდინარე წელს, დაამარცხებს ამ რეჟიმს. კოალიციურ მმართველობაში მოვა. მე ასე ვხედავ ამ ქვეყნის განვითარებას. ერთია, რომ ქვეყანა ოლიგარქის კლანჭებიდან ვიხსნათ და მეორეა, რომ ქვეყანა მართლაც იმართოს ერთობლივად. თქვენი, როგორც რეჟიმის წარმომადგენლების დამარცხება, რომლებიც ხართ ოლიგარქის მსახურებაში, თუკი სადმე შემიძლია პატივი დაგდოთ არის ეს – ჩვენი მხრიდან თქვენი დამარცხება ვერავითარ შემთხვევაში ვერ იქნება ვიწროპარტიული ამოცანა და ეს მგონი პატივია უკვე თქვენთვის. თქვენი დამარცხება უკვე არის ეროვნული ამოცანა, თითოეული ჩვენგანის, ვინც ოპოზიციაში ვართ.
მიუხედავად იმისა, რომ ცდილობთ, ერთმანეთს წავეკიდოთ, ხელებს იფშვნეტს ყველა, განსაკუთრებით ოლიგარქი, თქვენ ნახავთ უახლოეს პერიოდში საერთო მიზნის გარშემო კვლავ გამოვნახავთ უნარს, რომ ამ მავნებელი რეჟიმის წინააღმდეგ გავერთიანდეთ“, – განაცხადა ნიკა მელიამ.
მან, ასევე აღნიშნა, რომ როგორც ის სამაჯური უხუთავდა სულს, რომელიც მოიხსნა, ისე უხუთავს საზოგადოებას არსებული პარლამენტი სულს.
,,ძალიან კარგად მაქვს გათვითცნობიერებული თუ რა ბრძოლაში ვარ მეგობრებთან ერთად, ამიტომ, როგორც მე მიხუთავდა სულს ის სამაჯური, რომელიც მე მოვიხსენი, საზოგადოების დიდ ნაწილს ზუსტად ისე უხუთავს ეს პარლამენტი სულს”, _ აღნიშნა მელიამ.
