დღეს, 22:00 საათზე, უმნიშვნელოვანესი თამაში გაიმართება საქართველოს ოცდაერთწლამდე ნაკრების მონაწილეობით _ ჩვენი ბიჭები ნიდერლანდებს სტუმრობენ და ქალაქ ვენლოში ევროპის 2025 წლის ფინალურ ეტაპზე მოხვედრისთვის ძალიან საჭირო ქულებისთვის იბრძოლებენ.
საქართველომ 7 მატჩში 16 ქულა დააგროვა, ნიდერლანდებს ერთით მეტი თამაში და ას პროცენტიანი შედეგი აქვს, შვედეთს კი ასევე 7 შეხვედრაში _ 13 ქულა. ხვალ შვედები მოლდოველებს სტუმრობენ.
გარდა ამ თამაშისა, საქართველოს ნაკრებს კიდევ ორი შეხვედრა დარჩა გასამართი _ სტუმრად შვედეთთან და შინ ჩრდილო მაკედონიასთან. ასე რომ, თითოეულ ქულას გადამწყვეტი როლი ენიჭება რამაზ სვანაძის გაწვრთნილი ბიჭებისთვის.
აღსანიშნავია ის ფაქტიც, რომ ნიდერლანდებში ჩვენი ნაკრები კარგი განწყობით ჩადის _ 5 სექტემბერს, ბათუმში, ჩვენმა გუნდმა მოლდოვას ნაკრები დამაჯერებელი ანგარიშით (3:0) დაამარცხა.
შეგახსენებთ, რომ შესარჩევი ციკლის ფორმატის თანახმად, 9 ჯგუფში გადანაწილებილი ნაკრებებიდან ჯგუფის გამარჯვებულები და 3 საუკეთესო მეორეადგილოსანი პირდაპირ მოხვდებიან დასკვნით ეტაპზე, დარჩენილი 6 მეორეადგილოსანი კი დარჩენილ სამ საგზურს პლეი-ოფში გაითამაშებს (მეორეადგილოსნების ქულების შედარებისას არ იქნება გათვალისწინებული მეექვსე ადგილოსანთან დაგროვებული ქულები). ამ 15 ნაკრებს ფინალის მასპინძელი სლოვაკეთი დაემატება. ევროპირველობა 2025 წლის 12-29 ივნისს ჩატარდება.
აქვე გეტყვით, რომ ხვალ 22:45 საათზე, ალბანეთის დედაქალაქ ტირანაში ჩვენი ეროვნული ნაკრები გამართავს ერთთა ლიგის მორიგ შეხვედრას. წარმატება ვუსურვოთ ჩვენს ბიჭებს.
U21 შემადგენლობა
მეკარეები: მიხეილ მაქაცარია (დინამო თბილისი), ლუკა ხარატიშვილი (დინამო ბათუმი), ლევან თანდილაშვილი (თელავი).
მცველები: დავით გოგოტიშვილი (თელავი), საბა ხვადაგიანი (დინამო თბილისი), ნიკოლოზ უგრეხელიძე (დინამო თბილისი), საბა მამაცაშვილი (სირიუსი, შვედეთი), ზურაბ რუხაძე (დილა გორი), დავით ზურაბიანი (კოლხეთი ფოთი 1913), ლადო ოდიშვილი (თელავი), საბა საზონოვი (ტორინო, იტალია).
ნახევარმცველები: ლაშა ოდიშარია (რფს რიგა, ლატვია), ოთარ მამაგეიშვილი (იბერია 1999), გიზი მამაგეიშვილი (იბერია 1999), ლევან ოსიყმაშვილი (დინამო თბილისი), ირაკლი იეგოიანი (ვიტესი, ნიდერლანდები), ლუკა გაგნიძე (დინამო მოსკოვი, რუსეთი), ნოდარ ლომინაძე (დილა გორი), თორნიკე მორჩილაძე (თელავი).
თავდამსხმელები: ვასილიოს გორდეზიანი (დინამო თბილისი), გიორგი კვერნაძე (ფროზინონე, იტალია), გიორგი აბუაშვილი (კოლხეთი ფოთი 1913), ჯადული იობაშვილი (დინამო თბილისი).
ავტორი
