გუშინ, გამოცემა „Gazzetta Dello Sport“-ის ჟურნალისტმა კარლო ლაუდიზამ განაცხადა, რომ ხვიჩა კვარაცხელიას „ნაპოლისთან“ კონტრაქტის განახლება გადაწყვეტილია.
ჩვენი იტალიელი კოლეგის მტკიცებით, საუბარია ხელშეკრულების ერთი წლით, 2028 წლის ზაფხულამდე გახანგრძლივებაზე, რომლის თანახმად, ქართველის ხელფასი სეზონში 2.5 მილიონ ევროს მიაღწევს.
„კვარაცხელიას კონტრაქტის განახლება ეჭვს არ იწვევს. ეს უახლოეს მომავალში მოხდება, ფეხბურთელის გარემოცვისგან დადებითი ნიშნებია. ოსიმენი? მას „ბაიერნი“ მიჰყვება, მაგრამ მსგავსი გარიგების გაკეთება მხოლოდ ინგლისურ კლუბებს შეუძლიათ“. – განაცხადა კარლო ლაუდიზამ.
მიუხედავად ამ ინფორმაციისა, გასაკვირი არაა, რომ ქართველი ფეხბურთელის გადაბირება არაერთ კლუბს მაინც სურს და შესანიშნავი სეზონის შემდეგ, მზად არიან მასში დიდი თანხა გადაიხადონ.
გუშინ, გამოცემა „90min“-ის ჟურნალისტმა, გრემ ბეილმა დაადასტურა რომ ქართველის გადაბირება კლუბ „ნიუკასლს“ კვლავინდებურად სურს.
„იცით, რომ „ნიუკასლი“ „ნაპოლის“ კვარაცხელიას ინტენსიურად აკვირდება. ჩვენი ინფორმაციით, ოსიმენისთვის რთული იქნება, რომ „ჩელსიში“ არ გადავიდეს. „ნიუკასლი“ ამ ფეხბურთელებზე კითხვებს სვამს, რაც იმაზე მიანიშნებს, რომ მათ ტრანსფერებისთვის 75 მილიონ დოლარზე მეტი ბიუჯეტი აქვთ“.
ცნობილმა იტალიელმა მწვრთნელმა ანტონიო კონტემ კი არეცოში გამართულ პრესკონფერენციაზე „ნაპოლისა“ და ხვიჩა კვარაცხელიას შესახებ ისაუბრა.
„ვულოცავ „ნაპოლის“ ფეხბურთელებს, ლუჩანოს და კლუბს. ნეაპოლში გამარჯვება ადვილი არ არის. სპალეტიმ რაღაც მნიშვნელოვანი გააკეთა და კლუბმა მოახერხა შესაფერისი ფეხბურთელების შეძენა. „ნაპოლიმ“ ლამაზი ფეხბურთი ითამაშა, კარგები იყვნენ. მიუხედავად ძალიან აქტიური ფეხბურთისა, ისინი ბურთის დაბრუნებაშიც ძალიან ორგანიზებული იყვნენ. მათ იპოვეს ისეთი მოთამაშეები, როგორებიც კვარაცხელია და კიმი არიან, რომლებიც ძალიან მნიშვნელოვანი იყვნენ, ლობოტკა და ოსიმენი ძალიან გაიზარდნენ და სპალეტიმ კარგად მოახერხა კონკურენტული ბალანსის შენარჩუნება. სამწუხაროა, რომ სპალეტის კარიერა „ნაპოლიში“ დასრულდა. საფუძველი მყარი იყო და სპალეტის შეეძლო კიდევ ერთხელ მოეგო „სკუდეტო“, მაგრამ მისი არჩევანი პატივისცემას იმსახურებს. თუმცა, ვფიქრობ, რომ მათ გამარჯვებული ციკლის გახსნა შეეძლოთ“. – განაცხადა ანტონიო კონტემ.
გამოცემამ „Repubblica“ გაავრცელა ინფორმაცია, რომ „ნაპოლი“ ახალ მთავარ მწვრთნელს უახლოეს დღეებშიწარადგენს. გამოცემის მტკიცებით, ლუჩანო სპალეტის „პსჟ“-ს ყოფილი თავკაცი კრისტოფ გალტიე შეცვლის.
გალტიემ საფრანგეთის ჩემპიონობა ორჯერ მოიპოვა, ჯერ „ლილის“, შემდეგ კი „პარი-სენ ჟერმენის“ თავკაცობისას. ის „ნიცასა“ და „სენტ ეტიენშიც“ მუშაობდა.
ცნობილი იყო, რომ, „მეცის“ თავდამსხმელი გიორგი მიქაუტაძით „მილანთან“ ერთად „იუვენტუსიც“ დაინტერესებული იყო.
გუშინ, გამოცემამ „Calciomercato“ დაწერა, რომ „იუვენტუსს“ რთული სატრანსფერო პერიოდი ელის. ანხელ დი მარიას და ლეანდრო პარედესის წასვლა უკვე გადაწყვეტილია, დუშან ვლაჰოვიჩის გაყიდვაზე „ჩელსისთან“ მიმდინარეობს
ალექს სანდროს, ადრიენ რაბიოს, ხუან კუადრადოს და არკადიუშ მილიკის საკითხი გადასაწყვეტია. კლუბი რაბიოსთან თანამშრომლობის გაგრძელებას, ხოლო მილიკთან დაკავშირებით საიჯარო ხელშეკრულების გაგრძელებას იმედოვნებს, რომლის კონტრაქტის „მარსელისგან“ გამოსყიდვაზე უარი თქვა.
პოლონელის ალტერნატივად მოულოდნელად გიორგი მიქაუტაძის კანდიდატურა გამოჩნდა, რომელმაც გასულ სეზონში საფრანგეთის ლიგა 2-ში 23 გოლი გაიტანა.
„დაცვის ფლანგების გასაახლებელი ახალი შესაძლო სახეების, ფაბიანო პარიზისა („ემპოლი“) და ფილიპო მისორის („რომა“) გარდა, მილიკის ალტერნატივად ქართველი გიორგი მიქაუტაძე იქნა შეთავაზებული. ახლა ბურთი სრული დატვირთვით მომუშავე სატრანსფერო გუნდს გადაეცემა, რომელიც „ნაპოლიდან“ ჯუნტოლის მოსვლასთან დაკავშირებით ალეგრისთან თანამშრომლობის მოლოდინშია“. – დაწერა გამოცემამ.
ავტორი
