გუშინ ცნობილი გახდა რომ კომპანია „Netflix“-ის წინააღმდეგ სამართლებრივ ბრძოლაში ნონა გაფრინდაშვილის ინტერესებს ძლიერი და გამოცდილი ადვოკატების ჯგუფი დაიცავს.
ქართველმა იურისტმა კახა შარაბიძემ, რომელიც გაფრინდაშვილის ინტერესების ერთ-ერთი დამცველია, განაცხადა, რომ მათ გუნდს უახლოეს დღეებში როდ სმოლა და ალექს რუფუს აისაკი შეუერთდებიან. პირველი აშშ-ში იურისპრუდენციის ერთ-ერთი თვალსაჩინო წარმომადგენელია; არანაკლები სახელი გააჩნია ალექს რუფუს აისაკსაც, რომელიც ამჟამად მსახიობი ჯონი დეპისა და გამოცემა „ The Sun”-ის ცნობილ დავაშია ჩაბმული.
მიმდინარე სკანდალური მოვლენების ფონზე, გუშინ ქართულ მასმედიაში გავრცელდა ცნობა, რომ ევროპის საჭადრაკო კავშირის პრეზიდენტმა ზურაბ აზმაიფარაშვილმა სერიალი „ლაზიერის გამბიტის“ შემქმნელებსა და მსახიობებს სატელევიზიო პრემია „ემის“ მოპოვება ოფიციალურად მიულოცა. ამ ინფორმაციამ ჩვენს ქვეყანაში არაერთგვაროვანი რეაქცია გამოიწვია, რადგან ნონა გაფრინდაშვილის მოსალოდნელი სასამართლო დავის პირობებში სოციალური ქსელების არაერთ მომხმარებელს ამ სახის განცხადების გაკეთება არაკეთილსინდისიერ ნაბიჯად მიაჩნია.
ესპანეთის საფეხბურთო პირველობაზე, „ვალენსიას“ ძირითად შემადგენლობაში ზედიზედ მეექვსე შეხვედრა ჩაატარა თბილისის „ლოკომოტივის“ ყოფილმა კარის დარაჯმა გიორგი მამარდაშვილმა. მისი ამჟამინდელი კლუბი სტუმრად „სევილიასთან“ დამარცხდა – 1:3, თავად ქართველმა კი მეტად არადამაჯერებლად იასპარეზა.
რასაკვირველია ესპანურ მასმედიაში მამარდაშვილის თამაშს არაერთი კომენტარი მიეძღვნა.
„Marca“: „მამარდაშვილის მონუმენტური შეცდომით სეზონის ერთ-ერთი ყველაზე აბსურდული გოლი მივიღეთ _ „ვალენსიას” მეკარემ „სევილიას” მე-2 ბურთი მას შემდეგ აჩუქა, რაც ის მცველ ლოტოს მოხვდა”.
„AS“: „თუკი გიორგის „ლა ლიგის“ პირველი ტური არასდროს უნდა დაავიწყდეს, „სანჩეს პისხუანზე” გამართული შეხვედრა თავიდან მალე უნდა ამოიგდოს. მეკარეს სამივე გოლის ეპიზოდში იღბალმა ზურგი აქცია _ ჯერ ცენტრში დარჩა, მეორე გოლისას სერიოზული შეცდომა დაუშვა, შემდეგ კი კარიდან ნახევრად გამოვიდა და ბურთი თავზე გადაუგდეს. თითქოს ორი გაშვებული გოლი მისი ბრალი არ იყო, თუმცა, მაინც შეეძლო, სხვაგვარად ემოქმედა.
„სევილიამ“ ერთი დარტყმით ორი გოლი გაიტანა და შემდეგ მესამეც მიაყოლა. მამარდაშვილს სულელური დღე ჰქონდა _ მისი შეცდომები საოცარი იყო. მან საკუთარი ადგილი დაკარგა. გიორგი დამაჯერებელი არც ბენზემას გოლის დროს იყო. ამ ყველაფრიდან გამომდინარე, სავარაუდოა, რომ „ატლეტიკის“ წინააღმდეგ სილესენი დაბრუნდება. მაგრამ არა ცუდი თამაშის გამო. ჩვენ ყველამ საჯაროდ მხარი უნდა დავუჭიროთ მამარდაშვილს. ის მომავალ კვირაში 21 წლის ხდება. ჩვენ, რომ „ვალენსია“ ვიყოთ, დღესვე გამოვისყიდდით მას თბილისის „დინამოდან“ და სიხარულით წარვადგენდით, რადგან ქართველი მეკარე მომავალი წლების ინვესტიციაა. ცხადია, მამარდაშვილის შეცდომებმა „ვალენსია“ სანჩეს პისხუანზე დასცა, მაგრამ ეს ყველას მოსდის“.
„Sofascore“-მა „ვალენსიას” მხრიდან ყველაზე დაბალი შეფასება გიორგი მამარდაშვილსა და ავტოგოლის გამტანს, 23 წლის ტონი ლატოს დაუწერა _ 5.9, საუკეთესო კი 21 წლის ნახევარმცველი ჰუგო დურო იყო _ 6.9.
რატომღაც ბოლო დღეებია ქართულ სოციალურ ქსელებში გიორგი მამარდაშვილის მიმართ კრიტიკულმა განწყობამ იმატა. რჩება შთაბეჭდილება რომ მავანი და მავანი გიორგის შეცდომებით ხარობს და ჩასაფრებულიც არის რომ 20 წლის ფეხბურთელზე ავი სიტყვების დაწერა არ დაიზაროს. რას იზამ, ეს საქართველოა, სადაც ყველასა და ყველაფერს დაუნდობლად აკრიტიკებენ.
ერთ საყურადღებო ციტატას გაგაცნობთ რომელიც გუშინ ერთ-ერთ ვებ გვერდზე ამოვიკითხე და მის ავტორს სრულიად ვეთანხმები:
„ძალიან ნერვიულობს მამარდა, მაგრამ ასეთი დაუნდობელია სპორტი! გამოფხიზლდი, გიორგი! მორჩა სიზმარი! გუშინწინ „რეალს“ ეთამაშე, გუშინ „სევილიას“. ხომ ხედავ რომ ორივე გუნდში ჩვეულებრივი ადამიანები იყვნენ. გადააგორე ახლა ეგეც და მორჩი ამ პანიკას! შეცდომებზე სწავლობს ყველა და ყურების ჩამოყრის დროს ნამდვილად არაა! ამხელა სკოლა გაიარე ამ 6 თამაშში, შენი ასაკის ზოგი მეკარე რომ ვერც კი იოცნებებდა და შენ მანდ ხარ უკვე! ასე რომ, მორჩა ტირილისა და ვაი-უის დრო! გადი და დაამტკიცე რა შეგიძლია, თორემ მოგიწევს „სამტრედიაში“ ან „დინამოში“ უკან, გამხმარ ბალახზე ხტუნაობა!“
ცნობილმა რუსმა საკალათბურთო კომენტატორმა ვლადიმირ გომელსკიმ ქართველი ცენტრების შესახებ ისაუბრა. შეკითხვაზე ამ სამეულიდან _ ნიკოლოზ დერიუგინი, ზაზა ფაჩულია, ვლადიმერ სტეფანია, რომელი იყო საუკეთესო, გომელსკიმ შემდეგი პასუხი გასცა:
„ჩამოთვლილი კალათბურთელების თაობაზე მხოლოდ პირადი და სუბიექტური დახასიათების მოცემა შემიძლია.
კოლია დერიუგინი შეტევაში ძალიან მწვავედ მოქმედებდა და შეტევაში ფართო ტექნიკური არსენალი გააჩნდა. პირით ხაზთან მისი ტრიალი სწრაფი და აგრესიული იყო. შედეგად, დაცვა ვერ ასწრებდა. ამას გარდა, დერიუგინს მარჯვენა ხელიდან ბრუნში კარგი სროლა ჰქონდა. დაცვაში მისი თამაში ნაკლებად ეფექტური იყო, თუმცა, მაინც საკმაოდ საიმედოდ თამაშობდა.
ზაზა ფაჩულია დაცვითი ყაიდის ცენტრის მკაფიო მაგალითია. შეტევაში ის ნაკლებად შესამჩნევი იყო. მისი თამაშის ძირითადი მახასიათებლები თავდადება და სიხისტე გახლდათ.
ვლადიმერ სტეფანიას თავიდანვე არ გაუმართლა. საქმე ის გახლდათ, რომ ის ბავშვთა გუნდებში ყველაზე მაღალი იყო, ამდენად, მწვრთნელები მას თავიდანვე ცენტრობისთვის ამზადებდნენ. ჩემი აზრით, ეს შეცდომა იყო. იმ სისწრაფისა და კოორდინირებულობის გათვალისწინებით, რომელიც სტეფანიას ჰქონდა, მისი ამპლუა 4 ნომერი უნდა ყოფილიყო. ცენტრის პოზიციისთვის ვლადიმერს ფიზიკური ძალა და კუნთოვანი მასა აკლდა.
ამდენად, ამ სამეულში დერიუგინი პირველ ადგილზეა”.
[sexy_author_bio]
