“ნურავის ექნება იმედი, ოთხოზორიასა და ტატუნაშვილის სიცოცხლის ხელყოფა დავიწყებას მიეცემა”

საპარლამენტო უმრავლესობის ერთ-ერთი ლიდერი არჩილ თალაკვაძე  პარლამენტის წევრებს არჩილ ტატუნაშვილის გარდაცვალებასთან დაკავშირებით უმრავლესობის მიერ მომზადებულ რეზოლუციას აცნობს.

როგორც თალაკვაძე აღნიშნავს, საქართველოს ხელისუფლება მაქსიმუმს აკეთებს იმისთვის, რომ ტატუნაშვილის ცხედარი ოჯახს დროულად გადმოეცეს.

აგრარულ საკითხთა და ადამიანის უფლებათა დაცვისა და სამოქალაქო ინტეგრაციის კომიტეტების გაერთიანებული სხდომაზე პარლამენტარებმა ტატუნაშვილისა და ოთხოზორიას გარდაცვალებას წუთიერი დუმილი მიაგეს.

“როგორც იცით, ადგილი ჰქონდა ძალიან მძიმე დანაშაულს ჩვენი მოქალაქის  სიცოცხლის წინააღმდეგ, კერძოდ,  ცხინვალის რეგიონში, რუსეთის მიერ ოკუპირებულ ტერიტორიაზე  მოხდა არჩილ ტატუნაშვილის სიცოცხლის ხელყოფა. სამწუხაროდ, ამ მომენტისთვის, ჯერჯერობით, ოჯახს არ გადმოეცა არჩილ ტატუნაშვილის ცხედარი და ამ მომენტამდე არ გვაქვს  შესაძლებლობა, რომ  ღირსეულად  მივაბაროთ მიწას ჩვენი თანამოქალაქე.

როგორც იცით, მიმდინარე პერიოდში ჩვენ მიერ იქნა ინიცირებული პარლამენტის რეზოლუციის პროექტი,  სადაც ერთის  მხრივ, ძალიან მკაცრი შეფასებები  ეძლევა არჩილ ტატუნაშვილის სიცოცხლის ხელყოფის ფაქტს.  ასევე, ხელმეორედ ძალიან  მკაცრი შეფასებები ეძლევა გიგა ოთხოზორიას  სიცოცხლის ხელყოფის ფაქტს.

შეფასებების გარდა, ამ რეზოლუციით  ჩვენ მოვითხოვთ კონკრეტულ რეაგირებას. პირველ რიგში,  ეს  არის მოთხოვნა, რომ დაუყოვნებლივ გამოეცეს ოჯახს  არჩილ ტატუნაშვილის ცხედარი,  ჩატარდეს საფუძვლიანი გამოძიება, მათ შორის, საერთაშორისო  ფაქტორების  მონაწილეობით და ოკუპირებულ ტერიტორიებზე დაშვებულ იქნას ადამიანის უფლებათა დაცვისა  და მონიტორინგის საერთაშორისო მექანიზმები

საქართველოს ხელისუფლება აკეთებს ყველაფერს იმისათვის, რომ ცხედარი დროულად გადმოეცეს ოჯახს და  ფაქტებთან დაკავშირებით საერთაშორისო დონეზეც იყოს მკვეთრი და  ობიექტური რეაგირება, ნურავის ექნება იმედი, რომ გიგა ოთხოზორიას და არჩილ ტატუნაშვილის სიცოცხლის  ხელყოფის ფაქტები დავიწყებას მიეცემა. ჩვენ ამ საკითხს დავაყენებთ ყველა საერთაშორისო ფორმატში მანამდე, სანამ ამასთან დაკავშირებით რუსეთის  ფედერაციის მხრიდან არ იქნება სათანადო  პასუხები გაცემული  და  სათანადო რეაგირება . მიგვაჩნია, რომ  ეს არის სწორედ იმის გარანტია, რომ   მომავალში ადამიანის უფლებების ასეთი მძიმე  დარღვევები ოკუპირებულ ტერიტორიებზე აღარ მოხდეს”, _ განაცხადა თალაკვაძემ.