2018 წელს ჩოხატაურის მუნიციპალიტეტის ბიუჯეტის სოციალური დაცვის მუხლში პროგრამა “ოჯახში ძალადობის მსხვერპლთა ფინანსური დახმარების შესახებ” ჩაიდო. პროგრამა მუნიციპალიტეტში პირველად ამოქმედდა და ბიუჯეტში ამისთვის 5 000 ლარი იყო გათვალისწინებული.
ჩოხატაურის მუნიციპალიტეტის მერიის სოციალურ საკითხთა განყოფილების უფროსი სპეციალისტი ნინო კაპანაძე ამბობს, რომ თითოეულ ბენეფიციარზე გაიცემა თანხა 500-დან 1500 ლარამდე. მიმდინარე წელს მუნიციპალიტეტის მერიას აღნიშნული დახმარების თაობაზე განცხადებით მომართა სამმა მოქალაქემ (სამივე ქალია), ერთმა ისარგებლა 1000 ლარით, ორს ჩაერიცხა 600-600 ლარი. თანხის მოთხოვნა ხდება კონკრეტული საჭიროებიდან გამომდინარე ხდება.
“პროგრამა გაგრძელდება მომავალ წელსაც, ბიუჯეტი უცვლელი რჩება.შესაბამისად, ნებისმიერ მოქალაქეს, რომელიც თვლის, რომ ძალადობის მსხვერპლია და აქვს მსხვერპლის სტატუსი, შეუძლია მოგვმართოს და აღნიშნული დახმარებით ისარგებლოს.
ძალადობა ეს არის პრობლემა, ეს არის დანაშაული, რომლის წინააღმდეგ გაერთიანებაც თითოეული ჩვენგანის პასუხისმგებლობაა. მნიშვნელოვანია, დავამსხვრიოთ სტერეოტიპული მიდგომები და ხმამაღლა ვისაუბროთ ძალადობაზე, როგორც პრობლემაზე”, _ გვითხრა ნინო კაპანაძემ.
აღნიშნული პროგრამა 2019 წელსაც გაგრძელდება. ამჯერად, ბიუჯეტში 13 000 ლარია გათვალისწინებული. ამ პროგრამით სარგებლობას აპირებს ჩვენი რესპონდენტი მარიკა გურიელი (სახელი და გვარი შეცვლილია). მან აღნიშნული პროგრამით 2018 წელსაც ისარგებლა.
“ოჯახში ძალადობის მსხვერპლი ვარ. საქმე სასამართლომდეც იყო მისული, მაგრამ ჩემს მეუღლეს ვაპატიე და კიდევ ერთი შანსი მივეცი. ოთხი შვილის დედა ვარ და ვიფიქრე, ბავშვების გამო იქნებ დაწყნარდეს-მეთქი, მაგრამ ასე არ მოხდა. ისევ მაყენებდა სიტყვიერ და ფიზიკურ შეურაცხყოფას. თან მემუქრებოდა, თუ წავიდოდი, ყველგან მომაგნებდა და მომკლავდა. ავდექი და პოლიციას დავუკავშირდი. საქმე ისევ სასამართლოშია.
ამ ეტაპზე მეუღლის სახლში ვართ, რადგან ჩემი ქმარი ციხეშია, მაგრამ, კაცმა არ იცის, რა მოხდება. როცა მეუღლე გარეთ იყო, ჩოხატაურის მუნიციპალიტეტის მერიის პროგრამით ვისარგებლე. ძალიან კარგ ოჯახში ვცხოვრობდით. 600 ლარი ჩაირიცხა და ოჯახის დიასახლისმა, წიწილები იყიდა ჩემთვის.
ამ ეტაპზე კონკრეტული გეგმები არ მაქვს, მაგრამ როდესაც ბავშვები სკოლას დაასრულებენ, აუცილებლად ვაპირებ სხვა ქალაქში ცხოვრებას, მინდა, ყველა მათგანმა უმაღლესი განათლება მიიღოს. ახლა მხოლოდ სოციალურ დახმარებას ვიღებ, მაგრამ ძლივს გვყოფნის. ჩემმა ქმარმა ძროხა და ქათმები არ გამიჩერა სახლში, ყველაფერი გაყიდა და ახლა ჩემი ცხოვრება ნულიდან იწყება”, _ გვითხრა მარიკა გურიელმა.
შინაგან საქმეთა სამინისტროს ადამიანის უფლებათა დაცვის დეპარტამენტის განსაკუთრებით მნიშვნელოვან საქმეთა ინსპექტორი გოგა ხატიაშვილი “გურია ნიუსთან” საუბრისას ამბობს, რომ, ოჯახში ძალადობის მსხვერპლისთვის სახელმწიფოს სხვა უწყებების ჩართულობას ძალიან დიდი მნიშვნელობ აქვს.
“როდესაც ჩვენს დეპარტამენტს მსხვერპლებთან აქტიური კომუნიკაცია აქვს, ჩვენ ვეხმარებით გადამისამართებაში, რომ მსხვერპლი შესაბამის თავშესაფარში მოხვდეს. მისასალმებელია, თუ მათ დამატებით სერვისებს თვითმმართველობაც სთავაზობს. ვფიქრობ, უფრო მეტად უნდა გავაძლიეროთ სახელმწიფოს სხვა უწყებების როლი ამ მიმართულებით და კონკრეტული სერვისების მხრივ. ამავდროულად, თვითმმართველობების როლი აქ არის ძალიან მნიშვნელოვანი. თვითმმართველობას აქვს ორი მნიშვნელოვანი ფუნქცია მიმართულებით: პირველი ის, რომ საინფორმაციო კამპანია უნდა იყოს ძალიან ძლიერი, რადგან თვითმმართველობამ ძალიან კარგად იცის მათ ტერიტორიაზე რა სიტუაციაა და მეორე – მსხვერპლთა მხარდამჭერი სერვისები თვითმმართველობამ უფრო მეტად უნდა გააძლიეროს. ამაში ვგულისხმობ, რომ ზოგიერთ რეგიონს აქვს, მაგალითად, ისეთი ბენეფიტები, რომ რაღაც ფულად თანხას ურიცხავს მსხვერპლს ან მისთვის სახლს ქირაობს. ვფიქრობ, ეს პროცესი თანმიმდევრული უნდა გახდეს და თვითმმართველობის დონეზე მთელი რიგი კომპონენტები უნდა გაიწეროს. ამით უფრო მეტად გააძლიერებენ მსხვერპლს. როდესაც, მაგალითად, დღის წესრიგში დადგება საკითხი მსხვერპლმა რა არჩევანი უნდა გააკეთოს, დარჩეს მოძალადესთან თუ მას განერიდოს, მას უნდა ქონდეს სხვა ალტერნატივები იმისათვის, რომ თავი დააღწიოს ამ ტიპის ძალადობას. ერთია შინაგან საქმეთა სამინისტროს მყისიერი რეაგირება, რა თქმა უნდა, ამაზე ყოველდღიურად ვმუშაობთ, რომ ეს სისტემა კიდევ უფრო დავხვეწოთ და მეორეა, სხვა უწყებების როლი. რაც ძალიან მნიშვნელოვანია იმიტომ, რომ სხვა ტიპის პრევენციასთან ერთად ამ სერვისების გაუმჯობესებაზე, სხვა შეთავაზებაზე იმუშაონ”, _ თქვა ჩვენთან საუბრის დროს გოგა ხატიაშვილმა.
