„მიხეილ სააკაშვილის გაქრობა “ქართული ოცნების“ გაქრობას ნიშნავს„ _ გრიგოლ გეგელია

„ივანიშვილის გაპრემიერება გამოსავალი არ არის. რეგიონებსა თუ ქალაქებში უამრავი პრობლემაა. ადამიანები ვერ საქმდებიან, არ არსებობს რეგიონების განვითარებისა და უმუშევრობის დაძლევის კომპლექსური გეგმა. ამ ფონზე, ბიძინა ივანიშვილის გაპრემიერება რას შეცვლის?! “_ აღნიშნა „გურია ნიუსთან“ პოლიტოლოგმა გრიგოლ გეგელიამ.

მისივე თქმით, „პოლიტიკაში სააკაშვილის ფაქტორი რომ გაქრეს, „ქართული ოცნებაც“ გაქრება და მარტივ მამრავლებად დაიშლება“.

_ ბატონო გრიგოლ, მმართველ პარტიაში მოსალოდნელი საკადრო ცვლილებების გახორციელების პარალელურად,  ბოლო დღეების განმავლობაში, კიდევ უფრო გააქტიურდა საუბარი იმის შესახებ, რომ „ქართული ოცნების“ ლიდერმა ბიძინა ივანიშვილმა, ქვეყანაში რიგი პრობლემების აღმოფხვრის მიზნით, პრემიერის თანამდებობა უნდა გადაიბაროს. მიგაჩნიათ, რომ ბიძინა ივანიშვილის გაპრემიერება ქვეყანაში არსებულ პრობლემებს აღმოფხვრის?

_ ბიძინა ივანიშვილის შესაძლო გაპრემიერების შესახებ საზოგადოება დიდი ხანია საუბრობს. რეალურად, ყოველი კრიზისის დროს, საზოგადოება ბიძინა ივანიშვილს უხმობს, ის ქვეყანაში შექმნილი რთული ვითარების დაძლევას შეძლებსო. ვფიქრობ, რომ  ივანიშვილის გაპრემიერება გამოსავალი არ არის. რეგიონებსა თუ ქალაქებში უამრავი პრობლემა იყრის თავს _ ადამიანები ვერ საქმდებიან, არ არსებობს რეგიონების განვითარებისა და უმუშევრობის დაძლევის გეგმა. ამ ფონზე, ბიძინა ივანიშვილის გაპრემიერება რას შეცვლის?! ცვლილებების გახორციელება იმ თანამდებობიდანაც შეუძლია, რომელსაც ამჟამად იკავებს.

_ მოგეხსენებათ, საქართველო საპარლამენტო რესპუბლიკაა, სადაც პირველი პირი პრემიერ-მინისტრია. როგორ ფიქრობთ, ივანიშვილის გაპრემიერება არაფორმალურ მმართველობასთან დაკავშირებით ნაკლებ შეკითხვებს არ გააჩენს?

_ არაფორმალური მმართველობა დემოკრატიული ქვეყნისთვის შესაფერისი ნამდვილად არ არის. ეს პრობლემა ნაწილობრივ მაშინ აღმოიფხვრა, როცა ივანიშვილმა „ქართული ოცნება-დემოკრატიული საქართველოს“ თავმჯდომარის თანამდებობა დაიკავა. გვქონდა შემთხვევა, როცა ქვეყანას კულუარებიდან მართავდა, ახლა კი ასე აღარ არის.

_ აღნიშნეთ, რომ ქვეყანაში არსებული პრობლემების გადაჭრას, ხელისუფლების მხრიდან კომპლექსური გეგმის შემუშავება სჭირდება, თუმცა არ გითქვამთ, შესწევს თუ არა ხელისუფლებას ამ გეგმის შემუშავებისა და  რეალობაში გახორციელების უნარი?

_ ქვეყანაში ახალი  პოლიტიკური პარტიები უნდა გამოჩდნენ, რადგან, ფაქტობრივად, მთელმა პოლიტიკურმა სპექტრმა პოლიტიკაში მოღვაწეობის მაქსიმუმს მიაღწია. ადამიანები პოლიტიკაში შემთხვევით მოხვდნენ, პოლიტიკოსობა ითამაშეს და  საკუთარი თავი ამოწურეს.  ამიტომ გამოსავალს ახალი ძალების გამოჩენაში ვხედავ.  

_ არსებობს მოსაზრება, რომ საქართველოს ყოფილი პრეზიდენტი მიხეილ სააკაშვილი გაერთიანებული ოპოზიციის „ძალა ერთობაშიას“ მარცხის ფორმულაა. მიხეილ სააკაშვილი საკუთარ გუნდს აძლიერებს თუ პირიქით, ასუსტებს?

_ მიხეილ სააკაშვილს გვერდით ჰყავს ისეთი ხალხი, რომლებიც სააკაშვილს  „კომუნისტურ პარტიაშიც“ შეჰყვებიან. გაერთიანებულ ოპოზიციაში მან ბევრი ადამიანი მიიზიდა, მაგრამ  ამავე დროს, ოპოზიციის, როგორც დემოკრატიულ პარტიად ჩამოყალიბების მტერიც გახდა. „ქართული ოცნება“ საკუთარ ამომრჩეველს ჯერ კიდევ მიხეილ საკაშვილის ფაქტორით აშინებს. სააკაშვილი  პოლიტიკიდან უცებ რომ წავიდეს,  „ქართული ოცნება“ ერთ დღეში დაემხობა. „ქართულ ოცნებას“ შინაგანი იდეოლოგია არ გააჩნია. ამ პარტიას, ფაქტობრივად, მომხრეებიც არ ჰყავს. ამომრჩეველი მმართველ პარტიას ხმას იმიტომ აძლევს, რომ  ხელისუფლებაში სააკაშვილი არ დაბრუნდეს. ქართულ პოლიტიკაში სააკაშვილის ფაქტორი რომ გაქრეს, „ქართული ოცნებაც“ გაქრება და მარტივ მამრავლებად დაიშლება. მიხეილ სააკაშვილი „ქართული ოცნების“ ყველაზე დიდი საჩუქარია. ბიძინა ივანიშვილისთვის მიხეილ სააკაშვილის არსებობა ბედნიერების ტოლფასია.

 _ საპარლამენტო არჩევნებამდე ბიძინა ივანიშვილმა პრინციპული დაპირება გასცა, ერთ წელიწადში რიგი პრობლემების აღმოფხვრას შევძლებ, საზოგადოების იმედებს გავამართლებო.  2020 წელს  „ქართული ოცნების“ პოლიტიკურ მომავალზე როგორ აისახება აღნიშნული დაპირებების შესაძლო შეუსრულებლობა?

_ პოლიტიკისთვის ორი წელი დიდი დროა. ამ ეტაპზე ივანიშვილის ძალიან არაერთგვაროვანი გამონათებები აქვს. ჯერჯერობით, ქვეყანაში არაფერი შეცვლილა. ივანიშვილი მენეჯერია და ქვეყანას ისე უყურებს, როგორც აქტივს, სწორედ ამაშია პრობლემა. ის ქვეყანას მართავს, როგორც ბიზნესს და ამიტომ აქვს პრობლემები. ვფიქრობ, 2020 წლისთვის „ქართული ოცნება“ ქვეყნის ერთპიროვნული მმართველი აღარ იქნება.