მუნიციპალური განვითარების ფონდმა, ერთი ხელშეკრულების ფარგლებში, Design-Build მეთოდით, ჩოხატაურის მუნიციპალიტეტის სოფელ იანეულში (ს/კ: 28.13.23.046) და ლანჩხუთის მუნიციპალიტეტის სოფელ მამათში (ს/კ: 27.01.42.186) 25 ბავშვზე გათვლილი საბავშვო ბაღებისთვის დეტალური საპროექტო დოკუმენტაციის კორექტირების მომსახურებისა და სამშენებლო სამუშაოების სახელმწიფო შესყიდვა გამოაცხადა.
წინადადებების მიღება 27 სექტემბერს დაიწყება და 2 ოქტომბერს დასრულდება.
ოფიციალური ინფორმაციით, შესყიდვის სავარაუდო ღირებულება 3 524 660 ლარს შეადგენს. სამუშაოების შესასრულებლად კი 15 თვეა განსაზღვრული.
ინფრასტრუქტურის სამინისტროს განცხადებით, პროექტების მიზანია სკოლამდელი განათლების ხელმისაწვდომობის გაზრდა, თანამედროვე სტანდარტების შესაბამისი ინფრასტრუქტურის შექმნა და ბავშვებისთვის უსაფრთხო და კომფორტული გარემოს უზრუნველყოფა.
როგორც “გურია ნიუსს” ჩოხატაურის მუნიციპალიტეტის მერიაში განუცხადეს, ამჟამად სოფელ იანეულში არსებული შენობის დემონტაჟისთვის საჭირო პროცედურებს მერია ახორციელებს, რის შემდეგაც მუნიციპალური განვითარების ფონდი ახალი შენობის მშენებლობის პროცედურებს დაიწყებს.
სსიპ “საქართველოს მუნიციპალური განვითარების ფონდის” მიერ ჩოხატაურისა და ლანჩხუთის მუნიციპალიტეტებში გამოცხადებული ბაზრის კვლევა, რომელიც ამ სოფლებში 25 ბავშვზე გათვლილი ობიექტების მშენებლობას ისახავდა მიზნად, ივლისში ორჯერ გამოცხადდა და ორივეჯერ უშედეგოდ _ “არ შედგა” სტატუსით დასრულდა.
სახელმწიფო შესყიდვების ერთიანი ელექტრონული სისტემის მონაცემებით, მუნიციპალური განვითარების ფონდმა ჩოხატაურის მუნიციპალიტეტის სოფელ იანეულსა და ლანჩხუთის მუნიციპალიტეტის სოფელ მამათში 25 ბავშვზე გათვლილი საბავშვო ბაღების დეტალური საპროექტო დოკუმენტაციის კორექტირებისა და სამშენებლო სამუშაოების (CPV 45200000) ბაზრის კვლევა პირველად მიმდინარე წლის 6 ივლისს დაარეგისტრირა.
წინადადებების მიღება 10 ივლისს დაიწყო და 13 ივლისს დასრულდა, თუმცა, სახელმწიფო შესყიდვა არ შედგა.
ამის შემდეგ ფონდმა ხელახალი მცდელობა 16 ივლისს დაიწყო. განმეორებითი ბაზრის კვლევის ფარგლებში წინადადებების მიღების ვადად 22 ივლისიდან 23 ივლისის 16:00 საათამდე პერიოდი განისაზღვრა. მიუხედავად განმეორებითი მცდელობისა, შედეგი იგივე აღმოჩნდა.
ბაზრის კვლევის მთავარი მიზანი შესყიდვის ობიექტის სავარაუდო ღირებულებისა და პოტენციური პრეტენდენტების გამოცდილების დადგენა იყო.
შესყიდვა საკმაოდ კომპლექსურ სამუშაოებს მოიცავს _ მომავალ კონტრაქტორს ევალება ორივე სოფელში არსებული საპროექტო დოკუმენტაციის დეტალური კორექტირება და შემდგომ უშუალოდ სამშენებლო სამუშაოების წარმართვა.
ტექნიკური დავალება აერთიანებს სრულ პაკეტს: არქიტექტურას, კონსტრუქციულ ნაწილს, გათბობა-ვენტილაციას, წყალ-კანალიზაციას, ენერგოეფექტურობის დეკლარაციას, ელექტრობასა და სუსტ დენებს.
მოგვიანებით, კიდევ ერთი განაცხადი ბაზრის კვლევის შესახებ მუნიციპალური განვითარების ფონდმა 6 აგვისტოს გამოაცხადა. წინადადებების მიღება 12 აგვისტოს დაიწყო, ხოლო 13 აგვისტოს დასრულდა.
ამასთან, ჩოხატაურის მუნიციპალიტეტში სხვა საბავშვო ბაღების სარეაბილიტაციო სამუშაოებიც მიმდინარეობს.
ჩოხატაურის მუნიციპალიტეტის მერიის მიერ 25 ივლისს გავრცელებული ინფორმაციით, მიმდინარე სამუშაოები ადგილზე დაათვალიერეს გურიის მხარეში სახელმწიფო რწმუნებულმა გიორგი ღურჯუმელიძემ, მუნიციპალური განვითარების ფონდის აღმასრულებელმა დირექტორმა გიორგი შონიამ, ჩოხატაურის მერმა მინდია ჟღერიამ და საკრებულოს თავმჯდომარემ ჯუმბერ ბერძენიშვილმა.
ორივე დაწესებულება 100-100 აღსაზრდელზეა გათვლილი. პროექტების ფარგლებში გახორციელდა შენობების კონსტრუქციული გამაგრება, განახლდა საინჟინრო სისტემები, მოეწყო ენერგოეფექტური გათბობა-ვენტილაცია, სახანძრო უსაფრთხოების სისტემები, ეზოები და საგანმანათლებლო სივრცეები. შენობები სრულად ადაპტირებულია განსაკუთრებული საჭიროებების მქონე ბავშვებისთვის.
ცნობისთვის, ჩოხატაურის მუნიციპალიტეტის #1 საბავშვო ბაღისა და #1 ბაგა-ბაღის რეაბილიტაციის შესახებ სახელმწიფომ 2023 წლის 5 ივნისს განაცხადა.
ერთი ხელშეკრულების ფარგლებში, Design-Build მეთოდით, ჩოხატაურის მუნიციპალიტეტში ჩოხატაურის #1 საბავშვო ბაღისა და #1 ბაგა-ბაღის რეკონსტრუქცია-რეაბილიტაციისთვის დეტალური პროექტი მოამზადა და მის საფუძველზე შესაბამის სამუშაოებს ამხანაგობა “მეგა ჰაუსი” ახორციელებს.
ხელშეკრულება მუნიციპალური განვითარების ფონდმა 2025 წლის 1 მაისს გააფორმა და ის ძალაში 2028 წლის 31 დეკემბრამდეა.
რაც შეეხება ჩოხატაურის მუნიციპალიტეტის სოფლებში _ გუთურში, გოგოლესუბანში, ზომლეთსა და შუა ამაღლებაში _ 50 ბავშვზე გათვლილი საბავშვო ბაღების საპროექტო-სამშენებლო სამუშაოების გახორციელებას, როგორც მუნიციპალური განვითარების ფონდში “გურია ნიუსს” 2026 წლის 19 მაისს განუცხადეს, 2023 წელს გაფორმებული ხელშეკრულება ფონდმა 2025 წლის 17 თებერვალს ცალმხრივად შეწყვიტა, კონტრაქტორი კომპანიის მიერ ხელშეკრულებით გათვალისწინებული ვალდებულებების შეუსრულებლობის გამო.
ცნობისთვის, შეფერხების ერთ-ერთი მთავარი მიზეზი პირველი ეტაპის კონტრაქტორი კომპანია გახდა. მუნიციპალური განვითარების ფონდმა შპს “ლაგი კაპიტალთან” ხელშეკრულება, რომელიც 2023 წლის 10 მაისს გაფორმდა, 2025 წლის 17 თებერვალს ცალმხრივად შეწყვიტა.
მიზეზი ვალდებულებების შეუსრულებლობა და სამშენებლო ობიექტების თვეობით გაჩერება იყო.
სულ ცოტა ხნის წინ თბილისის საქალაქო სასამართლომ სრულად გაიზიარა პროკურატურის მტკიცებულებები და “ლაგი კაპიტალის” მფლობელები დამნაშავედ ცნო განსაკუთრებით დიდი ოდენობით სახელმწიფო თანხების თაღლითურად დაუფლებაში, ფულის გათეთრებასა და ყალბი დოკუმენტების დამზადება-გამოყენებაში. ბრალდებულებს სასჯელის სახით 10-10 წლით თავისუფლების აღკვეთა განესაზღვრათ.
კონტრაქტის შეწყვეტის შემდეგ ფონდმა ახალი ელექტრონული ტენდერი, აუქციონის გარეშე, 31 მარტს გამოაცხადა, რომლის სავარაუდო ღირებულება 5 129 492 ლარს შეადგენდა.
ტენდერში შპს “მოდერნ ბილდინგ კომპანიმ” გაიმარჯვა, თუმცა, ოთხი საბავშვო ბაღის სამშენებლო სამუშაოების შესყიდვა საბოლოოდ მაინც შეწყდა, რის გამოც ამ სოფლებში მშენებლობა კვლავ გაურკვეველი ვადით შეჩერდა.
ავტორი
