სერბეთის ქალაქ ნოვი სადში მიმდინარე თავისუფალ ჭიდაობაში ევროპის პირველობაზე გუშინ ორი ქართველი ფალავანი ასპარეზობდა და ორივემ ბრინჯაოს მედლის მოპოვება შეძლო.
65 კილოგრამ წონით კატეგორიაში ზურაბ იაკობაშვილი ნახევარფინალამდე მივიდა. სამწუხაროდ რუსთა მომავალ ჩემპიონ ილიას ბეკბულატოვთან დამარცხდა, მაგრამ მესამე ადგილისთვის გადამწყვეტ ბრძოლაში აზერბაიჯანელი გიტინომაგომედ გაჯიევი დამაჯერებლად დაამარცხა.
ელიზბარ ოდიკაძე 97 კილოგრამ წონით კატეგორიაში ასპარეზობდა. ისიც ნახევარფინალში დამარცხდა თურქ რიზა ილდირიმთან. სამაგიეროდ მესამე ადგილისთვის ორთაბრძოლაში დაღესტნური წარმოშობის მაკედონიელი მაგომედგაჯი ნუროვს მოუგო.
დღეს ნოვი სადში კიდევ ორი ქართველი ფალავანი იასპარეზებს. 61 კილოგრამ წონით კატეგორიაში ჩვენი მთავარი იმედი, ოლიმპიური ჩემპიონი ვლადიმერ ხინჩეგაშვილი იჭიდავებს. რასაკვირველია ქომაგები მისგან ოქროს მედლებს ველით. 74 კილოგრამ წონით კატეგორიაში დღეს ახალგაზრდა ავთანდილ კენჭაძე გამოვა.
ქართული სპორტული მასმედიის ინფორმაციით, თბილისში, ილია ჭავჭავაძის 54-ე ნომერში გამოჩენილი ქართველი მწვრთნელის ანდრო ჟორდანიას მემორიალური დაფა გაიხსნა. ჟორდანია 1974 წლის 25 აპრილს თბილისში გარდაიცვალა და იმ დღის შემდეგ მისი მემორიალის გახსნას თავი ვერ მოება. საბედნიეროდ ეს შეცდომა უკვე გამოსწორებულია.
ანდრო ჟორდანიას ქართული ფეხბურთის განვითარებაში უდიდესი წვლილი მიუძღვის. თავის დროზე მისი აღმოჩენილია მიხეილ მესხი, მურთაზხურცილავა, სერგო კოტრიკაძე, შოთა იამანიძე, გიორგი სიჭინავა, ვლადიმერ ბარქაია, გურამ ცხოვრებოვი, გივი ჩოხელი, გურამ პეტრიაშვილი, ზაურ კალოევი და სხვა არაერთი გამოჩენილი მოთამაშე.
გუშინ გაიმართა ევროპის ჩემპიონთა ლიგის კიდევ ერთი ნახევარფინალური შეხვედრა. „მონაკომ“ იტალიურ „იუვენტუსს“ უმასპინძლა და დამარცხდა – 0:2. მატჩის გმირი არგენტინელი გონსალო იგუაინი აღმოჩნდა რომელმაც მასპინძელთა კარის აღება ორჯერ მოახერხა.
მომდევნო კვირაში განმეორებითი ნახევარფინალური მატჩები გაიმართება, მაგრამ დიდი ალბათობით უკვე შეიძლება თქმა რომ ჩემპიონთა ლიგის გადამწყვეტ შეხვედრაში ერთმანეთს მადრიდის „რეალი“ და „იუვენტუსი“ დაუპირისპირდებიან.
გუშინვე ჩატარდა ევროპის ლიგის პირველი ნახევარფინალური შეხვედრა. ამსტერდამში „აიაქსმა“ ფრანგული „ლიონი“ მიიღო და დამაჯერებლად დაამარცხა – 4:1. საინტერესოა რომ „ამსტერდამ არენას“ რამდენიმე დღის წინ სახელი გადაერქვა და „იოჰან კრუიფ არენად“ მოინათლა. ადგილობრივმა გუნდმაც „ახალ“ სტადიონზე პირველი გამარჯვება იზეიმა.
დღეს ევროპალიგის კიდევ ერთი შეხვედრა გაიმართება. ესპანეთში „სელტა“ „მანჩესტერ იუნაიტედს“ უმასპინძლებს.
გუშინ ცნობილი გახდა რომ მიმდინარე საფეხბურთო სეზონის დასრულების შემდეგ ცნობილი იტალიელი ფეხბურთელი, 39 წლის ფრანჩესკო ტოტი პროფესიულ კარიერას ოფიციალურად დაასრულებს და დიდ ფეხბურთს მოთამაშის რანგში გამოეთხოვება. ლეგენდარული მოთამაშე „რომას“ დირექტორთა საბჭოში გადაინაცვლებს და მუშაობას ახალ სამსახურში შეუდგება.
