თბილისში გაერთიანებული ოპოზიცია მხარდამჭერებთან ერთად საპარლამენტო არჩევნების შედეგებს აპროტესტებს.
“ევროპული საქართველოს“ ლიდერმა, დავით ბაქრაძემ რუსთაველის გამზირზე მიმდინარე აქციაზე სიტყვით გამოსვლისას განაცხადა.
ბაქრაძის თქმით, დღეს დაიწყო ბრძოლა, რომელიც ქართველი ხალხის და საქართველოს გამარჯვებამდე გაგრძელდება.
„ნაციონალური მოძრაობის“ ერთ-ერთმა ლიდერმა, გლდანის მაჟორიტარი დეპუტატობის კანდიდატმა, მელიამ პროკურატურის მიერ დამაგრებული ელექტრონული სამაჯური საჯაროდ, რუსთაველის გამზირზე მიმდინარე საპროტესტო აქციაზე მოიხსნა.
მისი განცხადებით, სამაჯური არის უსამართლობის სიმბოლო და როგორც ციხეში, ასევე გარეთ აპირებს მოსახლეობასთან ერთად ბრძოლას.
,,ცივი გონებით ვფიქრობდი, გავაკეთო ის, რისი გაკეთებაც მინდა. ბუნებით ჯიუტი ადამიანი ვარ და რისიც მჯერა, იმას ვაკეთებ. გამორიცხულია, რომ ჩემს თავს ვუღალატო. ეს არის ჩემთვის ყველაზე მნიშვნელოვანი. ჩემი ოჯახის ერთ-ერთმა ახლობელმა მითხრა, ნიკა, მთავარია შენს ცხოვრებაში შენს თავს არ უღალატოო, თუ ჩვენ ჩვენს თავს არ ვუღალატებთ, სხვებსაც ვერ ვუღალატებთ. მე უბრალოდ აღარ ვაპირებ ამ სამაჯურის ტარებას, გამორიცხული ამბავია. მე ამ სამაჯურს აღარ ვატარებ იმიტომ, რომ ეს არის უსამართლობის სიმბოლო, ძალადობრივი სამაჯური, რომელსაც მე აღარ შევიბამ. ზუსტად ვიცი, ვიჯდები ციხეში, თუ ვიქნები გარეთ თქვენთან ერთად ერი გაიმარჯვებს და ვიქნებით გამარჯვებულები. მე ვერ მოვთხოვ ჩემს ოჯახის წევრს, რომ ვიბრძოლოთ მაშინ, როდესაც მე ვარ სამაჯურშებმული. ასე რომ, ნახვამდის სამაჯურო“, – განაცხადა მელიამ.
პარლამენტის წინ მიმდინარე აქციაზე წაიკითხეს “ლელოს თავმჯდომარის, მამუკა ხაზარაძის წერილიც, რომელიც პოლიტიკოსმა საავადმყოფოდან გამოაგზავნა.
“მეგობრებო, ბოდიშს გიხდით, რომ ახლა ფიზიკურად არ ვარ თქვენთან, თუმცა ვარ თითოეულ ადამიანთან, ვინც ახლა რუსთაველზე დგას და ვინც ტელევიზიის საშუალებით აკვირდება პროცესს და თითოეული აქ შეკრებილი მოქალაქის სამართლიან მოთხოვნას! ქართველ ხალხს გუშინდელი არჩევნებით წაართვეს ყველაზე მთავარი – თავისუფალი არჩევანის უფლება! ჩვენ მოგვპარეს ხმები, რომელიც ჩვენი ქვეყნის მოქალაქეებმა საქართველოს მომავალს მისცეს. ჩვენ, “ლელო” ამ არჩევნებს ვაცხადებთ არალეგიტიმურად! მოვუწოდებ სრულიად ოპოზიციურ პარტიებს ერთიანობისკენ, ჩვენ გავიმარჯვებთ, ჩვენ მართლები ვართ,” – განაცხადა ხაზარაძემ.
პარლამენტთან მიმდინარე აქციას უხმაუროდ არ ჩაუვლია.
ცოტა ხნის წინ დაპირისპირება მოხდა აქციის მონაწილეებსა და სამართალდამცავებს შორის. დაპირისპირების მიზეზი აქციის მონაწილეების მიერ კარვების გაშლის მცდელობა გახდა. ისინი მთელი ღამე რუსთაველის გამზირზე დარჩენას და კარვების გაშლას გეგმავდნენ, რისი უფლებაც მათ პოლიციამ არ მისცა.
მანამდე კი აქციის მონაწილეებმა პარლამენტის მიმდებარე ტერიტორიიდან ივანიშვილის ბიზნესრეზიდენციასთანაც გადაინაცვლეს. თუმცა, მათ ბიზნესცენტრთან მ,იახლოების საშუალება პოლიციამ არ მისცა.
“არ გვჭირდება ზედმეტი გეგმები და ა.შ. აქ გადაწყვეტს მოვიდეს ხალხი, აქ მოვა, „ქართული ოცნების“ ოფისთან გადაწყვეტენ მისვლას, იქ მივალთ, ასე იქნება აქციები, თავისუფალი ადამიანების თავისუფალი აქციები, – ამის შესახებ ჟურნალისტებს „ევროპული საქართველოს“ ერთ-ერთმა ლიდერმა გიგი უგულავამ აქციაზე განუცხადა.
როგორც ამ დროისთვის ცნობილია, პარლამენტთან ღამის გათევას პოლიტიკოსების აპირებს.
“გურია ნიუსი” რუსთაველის გამზირზე იმყოფება და იქ განვითარებულ მოვლენებს შემოგთავაზებთ.
