ლანჩხუთის მუნიციპალიტეტის საკრებულოს მორიგ სხდომაზე, რომელსაც თავმჯდომარე ბესიკ ტაბიძე უძღვებოდა, დღის წესრიგის შესაბამისად, დეპუტატებს ორ ძირითად საკითხზე მოუხდათ გადაწყვეტილების მიღება.
“ქონების საპრივატიზაციო ობიექტების ნუსხისა და ლანჩხუთის მუნიციპალიტეტის ქონების პრივატიზაციის გეგმის დამტკიცების შესახებ” 2019 წელს მიღებულ განკარგულებაში ცვლილების შეტანის თაობაზე საკითხი მერიის ქონების მართვის სამსახურის უფროსმა გიორგი ნაჭყებიამ გააცნო დეპუტატებს და მათი მხარდაჭერაც უპირობოდ მიიღო.
საკრებულოს წევრთა თანხმობით დაიწყო ადმინისტრაციული წარმოება მუნიციპალიტეტის მერიის ადმინისტრაციული და შესყიდვების სამსახურის დებულების დამტკიცების შესახებ 2017 წლის დადგენილებაში ცვლილების შეტანის თაობაზეც.
ძირითადი საკითხების ამოწურვის შემდეგ კი სხვადასხვა საკითხზე საუბრის ჯერიც დადგა და საკრებულოს წევრებსაც მეტი აქტიურობა დაეტყოთ.
პირველად სიტყვა აცანის მაჟორიტარმა, ემზარ თედორაძემ ითხოვა და აქცენტი სოფელ აცანაში გაყიდულ ქონებაზე გააკეთა. თედორაძის თქმით, აქ გაყიდული ქონებიდან შემოსული თანხის ნაწილი მაინც სოფელს უნდა მოხმარდეს გარკვეული პრობლემების მოსაგვარებლად:
“გია ნაჭყებიამ თავის გამოსვლაში თქვა, რომ მუნიციპალიტეტის ბიუჯეტში გარკვეული ოდენობის თანხა შემოვიდა გაყიდული ქონებიდან. როგორც ვიცი, 273 ათასი ლარი ჩვენი აცანელების შენახული ქონების გაყიდვის შედეგად შემოვიდა. კი, ბატონო, გაყიდა მუნიციპალიტეტმა, მაგრამ ჩემი თხოვნაა, ამ თანხის გარკვეული ნაწილი _ ყველას ხომ არ ვითხოვ _ მოხმარდეს აცანას. ათასი პრობლემაა სოფელში _ გაზი არაა, გზა არაა და უამრავი რამ არაა”, _ თქვა აცანის წარმომადგენელმა ლანჩხუთის საკრებულოში.
ლელა ჩახვაძემ, რომელიც საკრებულოში ოპოზიციის მანდატით სარგებლობს, სოფელ ნინოშვილში წყლის მიწოდებასთან დაკავშირებით არსებულ პრობლემაზე ისაუბრა. მისი თქმით, ნინოშვილის მოსახლეობის ნახევარი წყლის გარეშეა დარჩენილი:
“ნინოშვილში მოსახლეობის ნახევარს წყალი არ მიეწოდება. შარშან გთხოვეთ დახმარება. შემპირდით, რომ პრობლემა არ იქნებოდა და მილს შეუძენდით სოფელს, მაგრამ ერთი წელი გავიდა. რა არის ეს! ნუთუ ვერ მოხერხდა ამ მილის შეძენა?!” _ კითხვით მიმართა ჩახვაძემ სხდომაზე მყოფ მუნიციპალიტეტის პირველ პირს ალექსანდრე სარიშვილს.
სარიშვილის თქმით კი, მილი რამდენიმე დღის წინ შეიძინეს და გააკეთეს კიდეც ნინოშვილში:
“მეცხრე ბლოკი აფეთქდა, თუ რა ხდება?!” _ კიდევ ერთი კითხვით მიმართა ლანჩხუთის მერს, ლელა ჩახვაძემ. როგორც მან თავის გამოსვლაში აღნიშნა, რამდენიმე დღის განმავლობაში სისტემატურად უწყდება ელექტროენერგიის მიწოდება სოფელ ნინოშვილის მოსახლეობას:
ლელა ჩახვაძე: “მეცხრე ბლოკი აფეთქდა, თუ რა ხდება?!”
“სხვაგან როგორაა, არ ვიცი, მაგრამ ათი დღის განმავლობაში, სოფელ ნინოშვილში, დენის მიწოდება შვიდჯერ შეწყდა სხვადასხვა დროით. ერთი დღე 12 საათით იყო გამორთული. რა ხდება, ბოლოს და ბოლოს, ვერ ვხვდები. მეცხრე ბლოკი აფეთქდა?!” _ კითხვა დასვა დეპუტატმა.
ალექსანდრე სარიშვილის თქმით, როცა ელექტროენერგია ითიშება, აბონენტს წინასწარ ეგზავნება სმს-ს შეტყობინება და თუ ასეთი რამ არ ხდება, მაშინ ელექტროენერგიის შეწყვეტის მიზეზი ავარიული გამორთვაა.
ლელა ჩახვაძეს დასტური ნინოშვილის მაჟორიტარმა დათო ჩხარტიშვილმაც მისცა. მისი თქმით, ექმნება შთაბეჭდილება, რომ ყველაზე მეტად დაჩაგრული მუნიციპალიტეტის ეს ზონაა:
“ვეთანხმები ლელას გამოსვლას. აი, თუნდაც, ელექტროენერგიასთან დაკავშირებით. ფაქტობრივად, დღე არ გავა, რომ 7-8 საათი სოფელს დენის მიწოდება არ შეუწყდეს. შთაბეჭდილება რჩება, რომ ყველაზე დაჩაგრული ეს ზონაა. თუ ასე ბევრი რამაა გასაკეთებელი, გათიშონ დენი ერთხელ სამი-ოთხი დღით, გააკეთონ ბოლომდე და შემდეგ დაგვანებონ თავი. სულ რეაბილიტაცია სად გაგონილა?! არასასიამოვნო სიტუაციაა. თან ახლა ზაფხული მოდის, ხალხს მაცივარი სჭირდება”, _ აღნიშნა ნინოშვილის მაჟორიტარმა, რომელმაც მერს ნინოშვილი-მაღალჯუმათის გზაზე ჩამოწოლილი მეწყრის პრობლემაც შეახსენა და გზების დეპარტამენტთან სოფელ გულიანის საზღვარზე არსებული მეწყერული ზონის სიტუაციის გარკვევაც სთხოვა:
“დაგვენგრევა იქ სახლები თავზე. მერე გაცილებით ძვირი დაჯდება იმ სახლების აღდგენა და მოსახლეობასთან სიტუაციის დალაგება. ხალხიც ცოდვაა და ჩვენც უხერხულ მდგომარეობაში აღმოვჩნდებით. იქნებ, დავალაგოთ სიტუაცია, რომ გამაგრებითი სამუშაოები გააკეთოს გზების დეპარტამენტმა”.
შუქის მიწოდების პრობლემასთან დაკავშირებით ალექსანდრე სარიშვილმა შესთავაზა დეპუტატებს, რომ “ენერგო-პრო ჯორჯიას” ლანჩხუთის მენეჯერი მოეწვიათ და მისგან მოესმინათ განმარტებები საკითხთან მიმართებაში. რაც შეეხება ნინოშვილი-მაღალ ჯუმათის გზაზე ჩამოწოლილ მეწყერს, მერის თქმით, მუნიციპალიტეტში არსებული ტექნიკით შეუძლებელია იქ გაწმენდითი სამუშაოების წარმოება:
“იმხელა მასაა წამოსული, გამორიცხულია ჩვენი ტექნიკით მისი გაწმენდა. ვმუშაობთ, რომ ტექნიკა ვიშოვოთ და ჯუმათის მხრიდან მოხდეს ჩამოწოლილი მასის გატანა, აქეთ მხრიდან შეუძლებელია სამუშაოების წარმოება _ ვიწრო გზაა და ვერ გავიტანთ. რაც შეეხება მეორე საკითხს, ამის თაობაზე არა ერთხელ მივმართე გზების დეპარტამენტს. იქ რამდენიმე ოჯახს სერიოზული პრობლემა ექმნება _ ეს ოჯახები მეწყერულ ზონაში არიან და მივმართეთ ლტოლვილთა და განსახლების სამინისტროს. მიმდინარე სიტუაციაში ჩემთან იყვნენ ჩამოსულები ნინოშვილის მცხოვრებლები, კიდევ ერთხელ მივმართე გზების დეპარტამენტს. მოკლედ, ყველა იქ არსებული პრობლემა ასახულია და გადამისამართებულია”, _ განმარტა ალექსანდრე სარიშვილმა.
ლესის მაჟორიტარმა ელისო ჭიჭინაძემ სოფელში შიდა გზების პრობლემაზე ისაუბრა. იგივე პრობლემა გააჟღერა ქალაქის მაჟორიტარმა გიგი გვარჯალაძემც და აქცენტი ქალაქის ტერიტორიაზე მრავალბინიანი საცხოვრებელი სახლების პრობლემებზეც გააკეთა.
ჩიბათის მაჟორიტარმა გიორგი ჩახვაძემ სხდომაზე მყოფებს სოფლის ახალგაზრდობის სახელით ესაუბრა და მათი გულისტკივილი გააცნო:
“მინდა ჩიბათის სკოლისა და ახალგაზრდობის გულისტკივილი გაგაცნოთ. ლანჩხუთის მუნიციპალიტეტში არ არსებობს სკოლა, სადაც თუნდაც ღია სპორტული მოედანი მაინც არ იყოს. ამდენი წელია, ვამბობ, რომ ჩიბათის სკოლას ასეთი არაფერი აქვს. რამდენ მინისტრს შევხვდი, რესურსცენტრის ხელმძღვანელს ლამის ყოველდღე ვესაუბრები. არ შეიძლება, ხალხო, იყოს ასეთი ინფრასტრუქტურულად მოწესრიგებული სკოლა, როგორიც ჩიბათშია, დარბაზს თავი რომ დავანებოთ, ღია მოედანი მაინც არ ჰქონდეს. მომეხმარეთ იმაში, რომ ღია მოედანი მაინც გაკეთდეს ამ სკოლაში.
ამას რომ თავი დავანებოთ, სოფლის ახალგაზრდობა პასუხს მთხოვს ხელოვნურსაფარიანი სტადიონის გამო _ ხუთი წელია რომ შემოგვირაგვე აქაურობა მოსაჩვენებლად, მერე რა ხდებაო?! არ არსებობს, ალბათ, საქართველოში ობიექტი, რომლის გაკეთება დაიწყო და ხუთი წლის განმავლობაში არ დასრულებულა. დიდ მშენებლობებზე არ ვამბობ, 50-ათასიან ობიექტზეა საუბარი. იქნებ, წელს ეს საქმე მიმაყვანინოთ ბოლომდე. 20 ათასი ლარის სამუშაოები უკვე შესრულებულია, რაც დარჩა 30 ათასი ლარი დაჯდება. რომ დავიწყეთ ხუთი წლის წინ დასასრული ხომ უნდა ჰქონდეს?!” _ იკითხა ჩახვაძემ.
ხმაურიანი გამოდგა სხდომის ფინალი _ მმართველი გუნდის წევრთა მხრიდან ხმამაღალი ტონი “ნაციონალური მოძრაობის” წევრის კახა ასკურავას მხრიდან იმუნიზაციის თემასთან დაკავშირებით გაჟღერებულ კითხვას მოჰყვა.
ასკურავა დაინტერესდა, თუ რა მდგომარეობა იყო მუნიციპალიტეტში კოვიდ 19-ის ვაქცინაციასთან მიმართებით. ასკურავას ბრალდების მთავარი ადრესატი ლანჩხუთის საზოგადოებრივ ჯანდაცვის ცენტრი გახდა. მისი თქმით, აღნიშნულ სამსახურს არაფერი გაუკეთებია იმისთვის, რომ მოსახლეობა მეტად ინფორმირებული იყოს ვაქცინაციის თემასთან დაკავშირებით:
“ლადო ჩხაიძის სამსახურიდან გაშვება იყო მთავარი იმ სამსახურში?! არაფერი მაქვს ახლანდელი უფროსის, ნატო მენაღარიშვილის საწინააღმდეგო _ ნამდვილად პროფესიონალი კადრია, მაგრამ ფაქტია, რომ ამ სამსახურს არაფერი გაუკეთებია, რომ მოსახლეობა იყოს მეტად ინფორმირებული ვაქცინაციის თემასთან დაკავშირებით”, _ თქვა ასკურავამ თავის გამოსვლაში და სხდომაზე მყოფ მერს, ალექსანდრე სარიშვილს კითხვაც დაუსვა: “რამდენი ლანჩხუთელია ვაქცინირებული, თუ იცით? სამწუხაროა, რომ არ იცით.”
“მე ამ ყველაფერს პოლიტიკური ნიშნით არ ვამბობ. სამი მაღაზია მაქვს და სამივე გაჩერებულია. შია ხალხს, კატასტროფული მდგომარეობაა. არაფერი არ მუშაობს ამ ქვეყანაში”, _ კრიტიკის ტონით გააგრძელა საუბარი ოპოზიციონერმა დეპუტატმა.
სწორედ ენმ-ის წევრის ამ გამოსვლასა და შენიშვნებს მოჰყვა მერისა და უმრავლესობის წევრ დეპუტატთა უკმაყოფილება.
“სირცხვილია ეს, რასაც ამბობ, საზოგადოებრივი ჯანდაცვა მუშაობს სრული დატვირთვით. ბოდიში მოიხადე, ძალიან გთხოვ!” _ ურჩია ალექსანდრე სარიშვილმა ასკურავას.
