ლანჩხუთის მერიის ინიციატივით, მიმდინარე წლის ადგილობრივ მთავარ საფინანსო დოკუმენტში ცვლილებების გახორციელებაა დაგეგმილი. განმარტებითი ბარათი შესატან ცვლილებებთან დაკავშირებით ლანჩხუთის მერიამ განსახილველად საკრებულოს წარუდგინა და ბიუროს სხდომაზე ერთობლივად განიხილეს კიდეც.
მერიის საფინანსო სამსახურის მიერ მომზადებული დოკუმენტიდან ირკვევა, რომ “საქართველოს რეგიონებში გასახორცილელებელი პროექტების ფონდიდან” ლანჩხუთის მუნიციპალიტეტს დამატებით ორი მილიონ 50 ათასი ლარი გამოეყო. დოკუმენტის მიხედვით, აღნიშნული თანხიდან ერთი მილიონ 300 ათასი ლარი აკეთის ადმინისტრაციულ ერთეულში სოფელ შუხუთიდან სოფელ გაგურის ცენტრამდე გზის რეაბილიტაციას მოხმარდება. ამ სამუშაოების შესასრულებლად ადგილობრივ ბიუჯეტს 68 422 ლარის გაღება მოუწევს, სულ კი პროექტის ჯამური ღირებულება ერთი მილიონ 368 422 ლარითაა განსაზღვრული. რეგიონული ფონდიდან გამოყოფილი თანხიდან ქალაქში, გორგასლის ქუჩაზე მდებარე მრავალბინიანი საცხოვრებელი კორპუსის საძირკვლის გამაგრებაზე 254 ათასი ლარი მიიმართება, ადგილობრივი ბიუჯეტის თანადაფინანსების წილი კი 400 160 ლარითაა განსაზღვრული. სულ კი 654 160 ლარის ღირებულების სამუშაოები უნდა შესრულდეს.
რეგიონული ფონდიდან გამოყოფილი თანხით მოხდება შიდა სასოფლო გზების რეაბილიტაცია ნიგოითის, გვიმბალაურის, ნინოშვილის, მამათის, აცანის, შუხუთის, ჯურუყვეთის, ნიგვზიანის, ჩოჩხათის, ლესის და სუფსის ადმინისტრაციულ ერთეულებში, რომლის პროექტის სრული ღირებულება 735 465 ლარს შეადგენს. აქედან 496 ათასი ლარი რეგფონდისაა, ხოლო 239 465 ლარი ადგილობრივი ბიუჯეტის თანადაფინასებაა.
ირკვევა, რომ მიმდინარე წელს სუფსის სამუსიკო სკოლის სახურავის რეაბილიტაციაა გათვალისწინებული, რისთვისაც 28 730 ლარის ღირებულების სამუშაოები უნდა შესრულდეს, აქედან ცენტრალური ბიუჯეტის წილი 13 650 ლარია, ხოლო ადგილობრივი ბიუჯეტის- _15 080 ლარი.
ბიუჯეტში გასახორციელებელი ცვლილებების მიხედვით მიმდინარე წლის დარჩენილ პერიოდში 2 700 ლარით იზრდება ახალგაზრდული პროგრამების დაფინანსებაც. კულტურის დაწესებულებათა გაერთიანებაში კი ბიუჯეტის 15 ათასი ლარით გაზრდაა გათვალისწინებულია.
იმ არგუმენტით, რომ საწვავ-საპოხ მასალებზე ფასების ზრდაა, იგეგმება წლის დარჩენილ პერიოდში მუნიციპალური ტრანსპორტის მოვლა-შენახვის და ექსპლუატაციის ხარჯები 78 400 ლარით იზრდება. საკრებულოში ამ კუთხით 35 ათასი ლარით უნდა გაიზარდოს დაფინანსება, მერიაში _ 40 ათასით ლარით, ხოლო სამხედრო სამსახურში _ 3 400 ლარით.
მერიის წინადადებით, გარე განათების ქსელის გაფართოების გათვალისწინებით უნდა გაიზარდოს მოხმარებული ელექტროენერგიის ხარჯის დაფინანსება 136 373 ლარით.
მერიის საფინანსო სამსახურის მიერ საკრებულოში წარდგენილი განმარტებითი ბარათის მიხედვით, მუნიციპალიტეტის ბიუჯეტიდან ინფრასტრუქტურული პროექტების თანადაფინანსებაზე მიმართული თანხების და მიმდინარე ხარჯების ზრდის დაფინანსების უზრუნველყოფა დამატებითი ღირებულების გადასახადისა ( 770 600 ლარი) და ქონების გადასახადიდან მისაღები შემოსავლის (185 ათასი ლარი) საპროგნოზო მაჩვენებლების ზრდის ხარჯზე იგეგმება.
ავტორი
