ოზურგეთში მცხოვრებმა, გიორგი მეხუზლამ საქართველოს პრემიერ-მინისტრს, ირაკლი კობახიძეს ფეისბუქის მესენჯერში წერილი მისწერა.
გიორგი მეხუზლამ არაერთი ვიდეო და ტექსტი გაავრცელა სოციალურ ქსელში, რომ ქალაქის ტერიტორიაზე არ ხდება გზაზე არსებული ორმოების მოწესრიგება.
„გამარჯობათ ბატონო ირაკლი, გწერთ ოზურგეთიდან, თითქმის ყველა უბნის გზაზე მანქანით გადაადგილება გამოუვალი მდგომარეობაა, სირცხვილია რომ ეს არავის ადარდებს, პრობლემით რომელიც თვეებია აწუხებს მთელ ოზურგეთს, თუმცა პატრონი არავინ ჩანს, გადათხარეს მთელი ქალაქი და იმის მაგიერ რომ ორმოები ხრეშით მაინც ამოევსოთ იმასაც არ კადრულობენ, ისე არიან დარწმუნებული საკუთარ (თავხედობაში) ვართ უპატრონოთ მიტოვებული, საარჩევნოდ ყვირილით და მოწოდებით რომ თქვენ მოგწერდით ნაწილი ორმოებისა (რომელიც მთელი ქალაქის მაშტაბითაა) ძვლივს ამოვავსებინეთ, ნაწილობრივ. მოგმართავთ თხოვნით ; თუ საერთოდ ვინმეს აინტერესებს ოზურგეთი და ოზურგეთელები, ორმოები მაინც ამოავსონ ხრეშით, ასფალტის დაგებაზე ხომ ზედმეტია საუბარი, იქნებ ვინმემ ჩაგვთვალოს ადამიანებად და დაგვეხმაროს ამ პრობლემის მოგვარებაში.“ – წერია გიორგი მეხუზლას გაგზავნილ წერილში.
ოზურგეთის მუნიციპალიტეტის მერიის პრესსამსახურში გვითხრეს, რომ ქალაქის ტერიტორიაზე საქართველოს გაერთიანებული წყალმომარაგების კომპანია ახორციელებს პროექტს. აქედან გამომდინარე ეტაპობრივად მოხდება არსებული პრობლემის მოგვარება.
„გურია ნიუსი“ ამ საკითხზე მუშაობას აგრძელებს და დამატებით ინფორმაციას მოგვიანებით შემოგთავაზებთ.
