“ოთხი პარტია უნდა აიკრძალოს” _  როგორ აფასებენ კობახიძის განცხადებას  ოპოზიციონერები გურიაში

მთავრობის ადმინისტრაციის გავრცელებული ინფორმაციით, “ლელო“, “ნაციონალური მოძრაობა“, “ახალი“, “გახარია საქართველოსთვის” არაკონსტიტუციურ პარტიებად უნდა გამოცხადდეს. როგორც მთავრობის ადმინისტრაცია იუწყება, შესაბამისი განცხადება პრემიერ–მინისტრმა ირაკლი კობახიძემ გააკეთა.

“150 ახალგაზრდა მარტო ქუჩაში მოკლეს _ პირდაპირ საჩვენებელ მკვლელობებს აწყობდნენ შუა ქუჩაში; ციხეებში 140-ზე მეტი ადამიანი კვდებოდა წლის განმავლობაში. რომ ავიღოთ 2010-2011 წლების სტატისტიკა, 140-ზე მეტი ადამიანი კვდებოდა და სტატისტიკა საშუალოდ 20-ს ჩამოსცდა, როგორც კი ხელისუფლება შეიცვალა. ეს პირდაპირ ნიშნავს იმას, რომ 100-ზე მეტ ადამიანის მარტო ციხეებში კლავდნენ ყოველწლიურად, ამ დონის რეჟიმი იყო ჩამოყალიბებული.

ბიზნესის რეკეტი პირდაპირ შეეხო ათი ათასობით ადამიანს, დაახლოებით ათი ათასმა კაცმა სახელმწიფოს აჩუქა თავის ქონება.

მედიასთან დაკავშირებით, ჩემზე კარგად გახსოვთ ყველაფერი, რა ვითარება იყო.

ომი დაიწყეს და 400-ზე მეტი ადამიანი, ჯარისკაცი და სამოქალაქო პირი შეეწირა მათ მიერ დაწყებულ ომს.

უამრავ ადამიანს მარტო სიცოცხლის დაკარგვის დონეზე შეეხო ეს რეჟიმი, რომ არაფერი ვთქვათ ჯანმრთელობასა და კეთილდღეობაზე და ნერვებზე.

დღეს რეალურად ვიხსენებთ იმას, რაც ყველას გვახსოვდა, უბრალოდ ემოციურ დონეზე გვქონდა მივიწყებული, ამიტომ ძალიან მნიშვნელოვანია ის პროცესი, რომელიც წარიმართება საგამოძიებო კომისიაში.

 კიდევ ერთხელ იკრიბება ფაქტები, რომლებიც საფუძვლად უნდა დაედოს საკონსტიტუციო სასამართლოში შეტანილ სარჩელს, ეს არის მთლიანად ჩვენი გუნდის განზრახვა, რომ ამ პროცესის საფუძველზე მოვამზადოთ სარჩელი, რომელიც შევა საკმაოდ მალე საკონსტიტუციო სასამართლოში.

ვფიქრობთ, რომ ყველანაირი საფუძველი იქნება მომზადებული იმისთვის, რომ კოლექტიური “ნაცმოძრაობა“, მასთან დაკავშირებული პარტიები, გამოცხადდეს არაკონსტიტუციურად საკონსტიტუციო სასამართლოს მიერ.

ვფიქრობ, რომ ოთხივე პარტიაზე უნდა გავრცელდეს, ამას გვიჩვენებს პროცესი როდესაც მომზადდება შესაბამისი სარჩელი, მერე წარიმართება პროცესი სასამართლოში. ვფიქრობ, რომ წინასწარი ჩემი ანალიზი მაძლევს იმის თქმის საშუალებას, რომ თავისუფლად არის შესაძლებელი, ეს შედეგი გავრცელდეს კოლექტიურ “ნაცმოძრაობასთან” მოაზრებულ ოთხივე პარტიაზე _  ეს არის “ნაცმოძრაობა“, “ახალი“, რა განსხვავებაა “ახალსა” და “ნაცმოძრაობას” შორის? ერთი პარტიაა ორად გაყოფილი. რაც შეეხება “ლელოს” _ ამ პოლიტიკური პარტიის წარმომადგენლები პირდაპირ იყვნენ ჩართული უმძიმეს ქმედებებში. გახარიას, დღესაც ოთხ მუნიციპალიტეტში აქვს შექმნილი კოალიცია იმ პარტიასთან, რომელიც მაშინ სისხლიან რეჟიმს ხელმძღვანელობდა.

რაც მთავარია, ეს პარტიები, ყველა ერთად დღეს არიან ჩართული ანტიკონსტიტუციურ საქმიანობაში ჩვენი ქვეყნის წინააღმდეგ, არც მალავენ ამას, პირდაპირ დადიან დერეფნებში და ითხოვენ ქვეყნის დასჯას, დასანქცირებას, ათასი ტიპის შეზღუდვების შემოღებას და ეს ხომ ხელის გულზე დევს? პირდაპირ ხომ უპირისპირდებოდნენ კანდიდატის სტატუსის მიღებას. დღესაც ხომ აღშფოთდნენ ტრამპის წერილთან დაკავშირებით? არც აშშ–სთან დაახლოება უხარიათ, არც კანდიდატის სტატუსი უხარიათ, პირიქით _ უპირისპირდებიან ამ ყველაფერს.

 ეკონომიკასთან დაკავშირებით ერთმანეთის მიყოლებით საუბრობდნენ, რომ წელს ჩამოიქცეოდა ეკონომიკა და საშუალო ზრდა გვაქვს პირველი კვარტალში 9 პროცენტზე მეტი _ ეს ხელის გულზე დევს.

 პირდაპირ თანამშრომლობენ უცხოურ ძალებთან იმისათვის, რომ ზიანი მიაყენონ ჩვენს ქვეყანას ქვეყნის მოსახლეობას, ეს ყველაფერი იძლევა საფუძველს იმისათვის, რომ ამ პარტიების არაკონსტიტუციურად გამოცხადებასთან დაკავშირებით შევიტანოთ სარჩელი საკონსტიტუციო სასამართლოში“, _ განაცხადა ირაკლი კობახიძემ.

ირაკლი კობახიძის განცხადებას იმის შესახებ, რომ “ახალი”  და “ნაციონალური მოძრაობა” ორად გაყოფილი ერთი პარტიაა, აბსურდულს უწოდებს “ერთიანი ნაციონალური მოძრაობის” ლანჩხუთის რაიონული ორგანიზაციის თავმჯდომარე, კახა ასკურავა:

_ ერთ პარტიას აქვს ერთი ლოგო და ერთი ნომერი. კობახიძეს ერთ ქვაბში ჩაყრა და მოხარშვა სურს, მაგრამ ჩვენ გვაქვს ჩვენი ნომერი, ჩვენი ლოგო. კი, წლების განმავლობაში ჩვენ ერთად ვიყავით, მაგრამ 4 ნომერში ასევე არიან ადამიანები, რომლებიც არასდროს ყოფილან ნაციონალურ მოძრაობაში. ამაზე კობახიძის ნათქვამი აბსურდულია, _ გვეუბნება კახა ასკურავა.

რაც შეეხება პარტიების აკრძალვის შესახებ გაკეთებულ განცხადებას, კახა ასკურავას შეფასებით, “ხელისუფლება ოპონენტებისგან ველის მოსუფთავებას ცდილობს, რაც არ გამოუვა”:

_ ამ ხელისუფლებისგან არაფერია გამორიცხული. მუშაობენ პირდაპირ იმაზე, რომ ველი მოისუფთავონ, ყველა ოპონენტი გაანადგურონ. ემუქრებიან მედიასაც, რაც მოხდა “ფორმულასთან“, “მთავარ არხთან“, “ტვ პირველთან” დაკავშირებით. ჩვეულებრივი მცდელობაა, რომ პოლიტიკური პარტიებისგან, რომელიც არ მოსწონთ და კრიტიკული მედიისგან,  გაათავისუფლონ ქვეყანა და დაამყარონ საქართველოში რუსული ჰიბრიდული ტოტალიტარული სახელმწიფო, რაც არ გამოუვათ. იმ ეგრეთ წოდებული კომისიის მუშაობაც აქეთკენ არის მიმართული, რომ მომხდარიყო პოლიტიკური პარტიების აკრძალვა, განსაკუთრებით “ნაციონალური მოძრაობის“, რომელსაც წლების განმავლობაში ებრძოდა ბიძინა ივანიშვილი და მისი რეჟიმი, _ ამბობს კახა ასკურავა.

“ირაკლი კობახიძის განცხადება, რომ ოთხი ოპოზიციური პარტიის არაკონსტიტუციურად ცნობის სარჩელი მზადდება, კიდევ ერთი ნათელი მაგალითია იმისა, თუ როგორ ცდილობს მმართველი გუნდი პოლიტიკური პლურალიზმისა და დემოკრატიის სრულად დაშლას. ეს პირდაპირი შეტევაა მრავალპარტიულობაზე და მცდელობაა, კრიტიკული აზრი სისხლის სამართლის ჩარჩოში მოაქციონ“, _ ასე პასუხობს  ჩოხატაურის მუნიციპალიტეტის საკრებულოს წევრი, კოალიცია “ცვლილებებისთვის” წარმომადგენელი ბაჩო ახალაძე “გურია ნიუსის”  კითხვას _ როგორ აფასებთ კობახიძის განცხადებას ოთხი პარტიის არაკონსტიტუციურად ცნობის შესახებ სარჩელის მზადებაზე?

ბაჩო ახალაძის განცხადებით, “ხელისუფლება წყვეტს სამართლებრივი სახელმწიფოს გზით სვლას და შურისძიებაზე გადადის”:

“კონსტიტუციის სახელით პოლიტიკური ოპონენტების დევნა არ არის არც სამართლებრივი და არც მორალური მოქმედება – ეს არის ავტორიტარიზმისთვის დამახასიათებელი ქმედება, რომელსაც არ აქვს არაფერი საერთო არც ევროპულ ღირებულებებთან და არც დემოკრატიის იდეალებთან.

ხელისუფლება აშკარად წყვეტს სამართლებრივი სახელმწიფოს გზით სვლას და გადადის შურისძიებაზე, რაც ყოვლად მიუღებელია იმ ქვეყნისთვის, რომელიც ევროკავშირის წევრობაზე აცხადებს პრეტენზიას“, _ აცხადებს ბაჩო ახალაძე.

ირაკლი კობახიძის განცხადების შეფასება ვთხოვეთ ჩოხატაურის მუნიციპალიტეტის საკრებულოს ფრაქცია “ჩოხატაური საქართველოსთვის” თავმჯდომარეს,  გოგი ბოლქვაძეს:

“ბატონი კობახიძის განცხადება და ოთხი ოპოზიციური პარტიის არაკონსტიტუციურად ცნობა, სამწუხაროდ, ასახავს ხელისუფლების შიშს განსხვავებული აზრისა და თანამშრომლობის წინაშე“, _ გვპასუხობს გოგი ბოლქვაძე.

პარტია “ლელო – ძლიერი საქართველოს” ლანჩხუთელი ლიდერი გოჩა ჯანაშია ირაკლი კობახიძის განცხადებას “თითიდან გამოწოვილი თამაშის ნაწილს” უწოდებს.

“კობახიძის და საერთოდ ხელისუფლების მიზნებზე რა უნდა გითხრათ, როცა სურთ, რომ გაწმინდონ პოლიტიკური ველი და დარჩნენ მარტო პრორუსულ ამომრჩეველთან? აქედან გამომდინარე, საფრთხეს ხედავენ იმ პროდასავლურ ძალებში, რომლებიც ჯერ კიდევ შემორჩენილია ჩვენს ქვეყანაში და მაშინ, როდესაც “ქართული ოცნება” გავსებულია ძველი “ნაცებით“, მაშინ როდესაც მართავენ სტრუქტურებს ის ადამიანები, ვინც მაშინ მართავდა, ცოტა სასაცილოა ასეთი საუბარი.

თუ გადავხედავთ ვინ არის “ლელოში” და ვინ არის “ქართულ ოცნებაში“, წარმოუდგენელია ასეთი რამ, რომ “ნაციონალური მოძრაობის” დრის ჩადენილი დანაშაულების გამო ლეგიტიმაცია შეუჩერდეს თუნდაც “ლელოს” ან რომელიმე სხვა პარტიას. ნებისმიერ პარტიას მისი ამომრჩეველი აძლევს ლეგიტიმაციას. თითიდან გამოწოვილი თამაშის ნაწილი მგონია“, _ ამბობს გოჩა ჯანაშია.

ცნობისთვის, ოპოზიციური პარტიების აკრძალვის შესახებ საუბარი “ოცნებამ” ჯერ კიდევ 2024 წლის საპარლამენტო არჩევნების წინ დაიწყო.