ახლახან, ოზურგეთში, პარტია “საქართველოსთვის“ ოფისის წინ, პარტიის თავმჯდომარე გიორგი გახარია ოზურგეთელ მხარდამჭერებს შეხვდა და მერობის კანდიდატი, წარმოშობით ოზურგეთელი გია ცეცხლაძე წარადგინა.
გიორგი გახარიამ საკმაოდ ვრცლად ისაუბრა სამომავლო მიზნებზე და თქვა, რომ მისი გუნდის ჰობია ძლიერი სახელმწიფოს შექმნა.
_ დიდი ფიქრის აუცილებლობა არ გვქონია, ვინ უნდა ყოფილიყო ჩვენი კანდიდატი ოზურგეთში. დიდი ხანია, ეს ადამიანი საჯარო სამახურშია. ოზურგეთელებმა იციან მისი მშობლების შესახებ, რომლებსაც დიდი დამსახურება აქვთ რაიონის წინაშე.
ამიერიდან ამ სახლის და არა ოფისის კარი ღია იქნება ყველა ოზურგეთელისთვის.
მე მესმის და სამართლიანიცაა კითხვა, კაცო, იქ არი იყავიო? გაგეკეთებინაო. მართალი კითხვაა. იქ ვიყავი, იქედან მოვდივარ და კი არ უნდა ვიჭორავოთ. იქ ძალიან ბევრი კარგი ადამიანია, მაგრამ იყო შეცდომები და ახლა ამ შეცდომების გამოსწორებაა საჭირო. ამიტომ ვერავინ კომპლექსს ვერ შემიქმნის. ჩემი არჩევანი არის ჩემი სამშობლოს მსახურება და არა დანარჩენი პარტიების, თუნდაც იმის, რომელიც ახლა შევქმენი, _თქვა გახარიამ და მოუწოდა შეხვედრის ოზურგეთელებს, მხარი დაუჭირონ გია ცეცხლაძეს.
ოზურგეთელმა, სოფელ ცხემლისხიდის მკვიდრმა ნუგზარ გიორგაძემ სიტყვა ითხოვა და გამოთქვა თავისი მოსაზრება:
_ მე გახლავართ “ქართული ოცნების“ ერთ-ერთი დამფუძნებელი ოზურგეთში. ჩემს სოფელში თბილისიდან დავბრუნდი. მე ბიძინა ივანიშვილის მომხრე და მხარდამჭერი ვარ და დღესაც მადლობას ვუხდი.
მინდა, ვთქვა, რა მოხდა აქ. ავირჩიეთ ერთი მაჟორიტარი, გვიღალატა, ავირჩიეთ მეორე დეპუტატი, იმანაც გვიღალატა, ლაფი დაგვასხეს თავზე, იმის ნაცვლად, გვერდით დაგვდგომოდნენ.
მე ქვეყნის მოსიყვარულე ადამიანი ვარ და პირველ რიგში გიხდით მადლობას, იმისთვის, რომ თქვენ მოუმატეთ პენსია პენსიონერებს, ჯარს პატივს სცემთ. მინდა, მადლობა ვუთხრა თქვენს მშობლებს, იმ სკოლას, სადაც გაიზარდეთ. მე თქვენი პარტიის წევრი არ ვარ, დღეს მოვედი აქ, მხარს გიჭერთ და იმიტომ. ჩემი მეუღლე “ქართული ოცნების“ დამფუძნებელი და ბიუროს წევრი, ამ დაუფასებლობის გამო წამოვიდა,
კიდევ ერთხელ მადლობას ვუხდი ბიძინა ივანიშვილს და თქვენ გიჭერთ მხარს, _ განაცხადა მან.
გიორგი გახარიამ პასუხად თქვა, რომ ყველაფერი კარგი წამოსაღებია და ცუდი დასატოვებელია იქ, სადაც იყო.
_ არ დავკარგოთ, კარგი რაც იყო და ცუდი დავტოვოთ იქ, სადაც იყო.
გიორგი გახარია ესაუბრა ჟურნალისტებს, მერე კი ოზურგეთის ცენტრში, ეროვნული გმირის, ზაზა დამენიას საფლავის მოსანახულებლად წავიდა.
ბოლოს, ოზურგეთის ბაზარში, გახარია და მის თანმხლები პირები რიგით ადამიანებს შეხვდნენ.
[sexy_author_bio]
